Zaburi 148 - Bibliya Yera 1951 1967 (Burundi)

¹ Haleluya! Mw ijuru ni mushime Uhoraho: Ni mumushimire ahasumba ijuru.

² Yemwe mwa bamarayika biwe mwese, ni mumushime: Yemwe mwa ngabo ziwe zose, ni mumushime.

³ Yemwe zuba n’ukwezi, ni mumushime; Yemwe nyenyeri zaka zose, ni mumushime.

⁴ Yemwe majuru asumba amajuru, ni mumushime, Nawe mazi yo hejuru y’amajuru.

⁵ Ni bishime izina ry’Uhoraho, Kuko yageze bikaremwa,

⁶ Kandi yabihamangiye gushitsa ibihe bitazoshira; Yashinze icagezwe c’intahava.

⁷ Mw isi ni mushime Uhoraho, Yemwe bifi, namwe i bgina hose;

⁸ Namwe muriro n’urubura na shelegi n’igipfungu; Nawe muyaga w’igihuhuta, ushitsa ijambo ryiwe;

⁹ Namwe bisozi birebire n’uturambi twose; Namwe biti vyama bigatengengera, n’ibiti vy’amasederi vyose;

¹⁰ Namwe bikōko n’ibitungano vyose; Namwe ibikwega inda hasi n’ ibifise amababa;

¹¹ Namwe bami bo mw isi n’ amahanga yose; Namwe abahambaye n’abacamanza bose bo mw isi;

¹² Namwe misore n’inkumi; Namwe batāma n’abana:

¹³ Ni bishime izina ry’Uhoraho, Kukw izina ryiwe ryonyene ari ryo rishizwe hejuru: Ubukuru bgiwe buri hejuru y’isi n’ijuru.

¹⁴ Kandi yashize hejuru ihembe ry’abantu biwe, Ni ryo shimwe ry’abakunzi biwe bose, Ni bo Bisirayeli, ihanga yiyegereje. Haleluya!