Zaburi 141 - Bibliya Yera 1951 1967 (Burundi)

Zaburi ya Dawidi.

¹ Uhoraho, ndagutakambiye: tebuka, uze aho ndi: Utege ugutwi ijwi ryanje, ni nagutakambira.

² Ugusenga kwanje gushirwe imbere yawe nk’imibavu, N’amaboko yanje kuyatarika kube nk’ikimazi co ku mugoroba.

³ Uhoraho, shira umurinzi imbere y’akanwa kanje: Rinda umuryango w’iminwa yanje.

⁴ Ntuhindurire umutima wanje ku kibi na kimwe, Ngo mfatanye ibikorwa vyo kugabitanya N’inkozi z’ibibi: Noye gusangira na zo ibigemanije vyazo.

⁵ Umugororotsi ankubise, bizoba ar’ ukungirira neza; Ampannye, bizoba ari nko kunsīga amavuta ya elayo mu mutwe: Umutwe wanje woye kuvyanka. Ariko gusenga kwanje gukomeza kurwanya ivyaha vya ba bandi.

⁶ Abacamanza babo bazotembagarizwa mu manga, Ni ho abantu bazokwumviriza amajambo yanje, kukw aryoshe.

⁷ Nk’uk’ umuntu arima, agaca isemo, Ni kw amagufa yacu asābagiye ku munwa w’i kuzimu.

⁸ Uhoraho Bgirukiro, ni wewe mpanze amaso, Ni wewe nizigiye: ntunte ngo mbe ruhebga.

⁹ Undinde umutego banteze, N’ibigāmo vy’inkozi z’ibibi.

¹⁰ Abanyakibi abe ari bo bagwa mu rwabo ruriba, Ariko jeho mbisimbe.