Zaburi 139 - Bibliya Yera 1951 1967 (Burundi)

Iyi Zaburi yahawe umukuru w’abaririmvyi: n’iya Dawidi.

¹ Uhoraho waransuzumye, urammenya,

² Urazi iyicara ryanje n’īva hasi ryanje, Umenyera kure ivyo niyumvira.

³ Usorongora inzira zanje n’ iryama ryanje, Urazi iminyuro yanje yose.

⁴ Kukw ata jambo riza mu rurimi rwanje Wewe Uhoraho utararimenya rwose.

⁵ Unkikije inyuma n’imbere, Unshizek’ ukuboko kwawe.

⁶ Kumenya ben’ ukwo n’igitangaza ntobasha; Kuransiga, simbasha kugushikīra.

⁷ Mbega Mpwemu wawe nomuhungira hehe? Canke nohungira hehe mu nyonga hawe?

⁸ Nodūga nkaja mw ijuru, uriyo: Nokwisasira i kuzimu, eh’ uriyo.

⁹ Nokwābīra amababa y’umutwenzi, Nkagerēra ku mpera y’ikiyaga;

¹⁰ Aho na ho ukuboko kwawe kwohandōngōrera, Ukuboko kwawe kw’i buryo kwohamfatira.

¹¹ Nokwibgira, nti N’ukuri umwiza ugira unyubikizeko, N’umuco unkikije uhinduke ijoro;

¹² N’umwiza na wo ntugira ico woguhisha, Ariko mw ijoro habona nko ku murango; Umwiza n’umuco kuri wewe ni bimwe.

¹³ Kukw ari wewe waremye amafyigo yanje; Wanteranirije mu nda ya mama.

¹⁴ Ndagushimira yuko naremwe uburyo buteye ubgoba butangaje: Ibikorwa vyawe n’ibitangaza; Kand’ ivyo, umutima wanje urabizi neza.

¹⁵ Urukanka rw’umubiri wanje ntiwaruhishwa Hamwe naremerwa mu mpisho, Hamwe naremesherezwa ubgenge i bgina mw isi.

¹⁶ Nkir’ urusoro, inyonga zawe zarambona, Mu gitabo cawe handitswemw’ imisi yanje yose, Yashinzwe hatarabaho n’ umwe.

¹⁷ Erega Mana, ivyiyumviro vyawe n’ivy’ igiciro kuri jewe! Ereg’ igitigiri cavyo ni kinini!

¹⁸ Nobiharūra, vyoruta umusenyi mu bginshi: Nikangura nkiri kumwe nawe.

¹⁹ Mana, icompa ukica abanyakibi: Mva i ruhande, mwa bagwisha inkumbi mwe.

²⁰ Bakuvugana icīra bacumura, Abansi bawe bavugira ubusa izina ryawe.

²¹ Uhoraho, mbega sinanka abakwanka? Kandi sinshavuzwa n’abagukūriye hasi?

²² Mbanka urwanko rwuzuye: Kuri jewe n’abansi.

²³ Mana, nsuzuma, umenye umutima wanje, N’uncace, umenye ivyiyumviro vyanje,

²⁴ Urābe yuko harih’ inzira y’ibibi yoba iri muri jewe, Undōngōrere mu nzira y’ ibihe bidashira.