Zaburi 122 - Bibliya Yera 1951 1967 (Burundi)

Indirimbo yo mw idūga: n’iya Dawidi.

¹ Naranezerewe hamwe bambgira, Bati Tugende tuje ku ngoro y’Uhoraho.

² Ibirenge vyacu bihagaze Mu birimba vyawe, ewe Yerusalemu.

³ Yerusalemu, wubatswe Nk’igisagara c’icomeke:

⁴ Ah’ imiryango ikūkira, ni yo miryango y’Uhoraho, Ngo bibe igishingantahe ku Bisirayeli, Kandi bashime izina ry’Uhoraho.

⁵ Kukw ari ho batereka intebe z’imanza, Intebe z’ab’ inzu ya Dawidi.

⁶ Ni musabire Yerusalemu amahoro; Abagukunda batōtahare.

⁷ Amahoro abe imbere mu nzitiro zawe, Itōto ribe mu ngoro zawe.

⁸ Kubga bene Data na bagenzi banje Ndavuga, nt’ Amahoro abe muri wewe.

⁹ Kubg’ ingoro y’Uhoraho Imana yacu Nzokwendeza ivyiza.