Zaburi 118 - Bibliya Yera 1951 1967 (Burundi)

¹ Ni mushimire Uhoraho yukw ari mwiza: Kukw imbabazi ziwe zamah’ ibihe bidashira.

² Abisirayeli ni bavuge, Bat’ Imbabazi ziwe zamah’ ibihe bidashira.

³ Ab’ inzu ya Aroni ni bavuge, Bat’ Imbabazi ziwe zamah’ ibihe bidashira.

⁴ Abubaha Uhoraho ni bavuge, Bat’ Imbabazi ziwe zamah’ ibihe bidashira.

⁵ Hamwe nari mu mubabaro, nambaje Uhoraho: Uhoraho aranyitaba, anshira ahantu hāgutse.

⁶ Uhoraho ari mu ruhande rwanje, sinzotinya: Non’ umuntu yoshobora kungira iki?

⁷ Uhoraho ari mu ruhande rwanje, arantabara: Ni co gituma nzokwibonera abanyanka.

⁸ Kugira Uhoraho ubuhungiro kuri n’ikimazi Kuruta kwizigira abantu:

⁹ Kugira Uhoraho ubuhungiro kuri n’ikimazi Kuruta kwizigira abahambaye.

¹⁰ Amahanga yose yantanze irya n’ino; Mw izina ry’Uhoraho ndayarandura.

¹¹ Yantanze irya n’ino, eka mbere yantanze irya n’ino, Mw izina ry’Uhoraho ndayarandura.

¹² Yantanze irya n’ino nk’inzuki, Yahwamye nk’umuriro w’ amahwa, Mw izina ry’Uhoraho ndayarandura.

¹³ Nararirijwe cane kugira ngo ntembe: Maz’ Uhoraho arantabara.

¹⁴ Uhoraho ni we nkomezi zanje n’indirimbo yanje; Kandi yahindutse agakiza kanje.

¹⁵ Mu mahema y’abagororotsi har’ ijwi ry’impundu n’iry’ agakiza: Ukuboko kw’i buryo kw’ Uhoraho gukora ivy’ ubuhizi.

¹⁶ Ukuboko kw’i buryo kw’ Uhoraho gushizwe hejuru, Ukuboko kw’i buryo kw’ Uhoraho gukora ivy’ ubuhizi.

¹⁷ Sinzopfa, ariko nzobaho, Namamaze ibikorwa vy’Uhoraho.

¹⁸ Uhoraho yampannye bikomeye, Ariko ntiyangomoreye urupfu.

¹⁹ Njishurira ibirimba vy’ukugororoka, Ndabicemwo, nshime Uhoraho.

²⁰ Ngiki ca kirimba c’Uhoraho, Abagororotsi ni bo bazogicamwo.

²¹ Ndagushima kuko wanyishuye, Ukampindukira agakiza.

²² Ibuye abubatsi bāgaye Ni ryo ryahindutse irigumya imfuruka.

²³ Ivyo vyavuye k’Uhoraho, Kandi n’igitangaza mu maso yacu.

²⁴ Uyu ni wo musi Uhoraho yashizeho; Turawunezererwako, tukawuhimbarirwako.

²⁵ Dukize turakwinginze, ewe Uhoraho: Uhoraho turakwinginze, uduhe kugubga neza.

²⁶ Hashemezwe ūje mw izina ry’Uhoraho: Tubahezagiriye mu ngoro y’ Uhoraho.

²⁷ Uhoraho ni we Mana, kandi yaduhaye umuco; Muboheshe ikimazi imigozi, Mukijane ku mahembe y’ igicaniro.

²⁸ Ni wewe Mana yanje, nzogushima: Ni wewe Mana yanje, nzogushira hejuru.

²⁹ Ni mushimire Uhoraho yukw ari mwiza: Kukw imbabazi ziwe zamah’ ibihe bidashira.