Zaburi 102 - Bibliya Yera 1951 1967 (Burundi)

Gusenga kw’umunyamubabaro, iy’ umutima wiwe udendebukiwe, akajojera amaganya yiwe imbere y’Uhoraho.

¹ Zirikana wumve ugusenga kwanje Uhoraho we, Ugutakamba kwanje kugushikeko.

² Ntumpishe mu nyonga hawe ku musi w’umubabaro wanje, N’umbangire ugutwi; Ku musi ntakambako, unyishure vuba.

³ Kukw imisi yanje ishira nk’ umwotsi, Amagufa yanje yaka nk’umuriro.

⁴ Umutima wanje ukubiswe nk’ ubgatsi, urakabiranye: Kuko nibagira kurya igisa canje.

⁵ Ijwi ry’umuniho wanje ritumye Amagufa yanje amatana n’ inyama zanje.

⁶ Mmeze nk’inyanana yo mu bugaragwa, Mpindutse nk’igihuna co mu misaka.

⁷ Mba maso, mpindutse Nk’akanyoni kari konyene ku gatwe k’inzu.

⁸ Abansi banje barantuka umusi ukīra, Abandandamukiye bahinduye izina ryanje agatukisha.

⁹ Kuko ndya umunyota nk’ivyo kurya, Nsukiranya ivyo nnywa n’ amosozi,

¹⁰ Kubg’ ugushangashirwa kwawe n’uburake bgawe Kuko wanteruye, ukanta.

¹¹ Imisi yanje imeze nk’igitūtu kirehutse: Kandi nkabiranye nk’ubgatsi.

¹² Ariko wewe, Uhoraho, uzohangama ibihe bidashira, Icibutso cawe kizohorah’ ibihe vyose.

¹³ Uzohaguruka, ugirire imbabazi i Siyoni: Kukw igihe co kuhagirira ikigongwe gishitse, mber’ igihe cashizweho kirashitse.

¹⁴ Kukw abasavyi bawe bahimbarwa n’amabuye yaho, Umukungugu waho ubateye akagongwe.

¹⁵ Bizotuma amahanga yubaha izina ryawe, Uhoraho, N’abami bose bo mw isi bakubaha icubahiro cawe:

¹⁶ Kuk’ Uhoraho azoba asubiye kwubaka i Siyoni, Kand’ azoba abonekanye icubahiro c’ubgiza bgiwe:

¹⁷ Ashize umutima ku gusenga kw’abatagira shinge na rugero, Ntiyakēngereye ugusenga kwabo.

¹⁸ Ivyo bizokwandikirwa ab’ igihe kizoza; Ubgoko buzoremwa buzoshima Uhoraho.

¹⁹ Kukw azoba arungurutse hasi, ari hejuru, ahēra hiwe; Uhoraho arungurutse isi ari mw ijuru:

²⁰ Kugira ngo yumve ukuniha kw’imbohe, Abohore abāgerewe gupfa;

²¹ Ngw abantu bamenyekanishe izina ry’Uhoraho i Siyoni, N’ishimwe ryiwe i Yerusalemu,

²² Amahanga n’ibihugu vy’abami Aho bazoshengerera gusaba Uhoraho.

²³ Yaciriye intege zanje mu nzira; Yagabanije imisi yanje.

²⁴ Ndavuga, nti Mana yanje, ntunkūreho ngicagatije imisi yanje; Imyaka yawe yamah’ ibihe vyose.

²⁵ Mbere na mbere washizeh’ itanguriro ry’isi, Kand’ amajuru n’igikorwa c’ intoke zawe.

²⁶ Ivyo bizoshira, ariko weho uzohoraho, Mber’ ivyo vyose bizosāza nk’impuzu, Uzobikūranya nk’impuzu, bikūranwe n’ibindi;

²⁷ Ariko weho ur’ uko wamye, Imyaka y’ukubaho kwawe ntizogira iherezo.

²⁸ Abana b’abasavyi bawe bazohora batsindaje, Uruvyaro rwabo ruzocimbatarizwa imbere yawe.