Zaburi 1 - Bibliya Yera 1951 1967 (Burundi)

IGITABO CA MBERE

¹ Hahirwa umuntu atagendera mu nama z’ababi, Adahagarara mu nzira y’abanyavyaha, Aticarana n’abacokoranyi.

² Arikw ibimuhimbara biri mu vyagezwe vy’Uhoraho, Kand’ ivyagezwe vyiwe ni vyo ashirak’ umutima ku murango no mw ijoro.

³ Azoba nk’igiti gitewe hafi y’ imigezi y’amazi, Cama igihe caco, Ibibabi vyaco ntivyuma: Ic’ azokora cose kizomubera ko.

⁴ Ababi ntibamera bartyo: Ariko baba nk’umuguruka utwarwa n’umuyaga.

⁵ Ni co gituma ababi batazoshobora guhagarara ku musi w’amateka, Cank’ abanyavyaha mw ikoraniro ry’abagororotsi.

⁶ Kuk’ Uhoraho azi inzira y’ abagororotsi, Arikw inzira y’abanyavyaha ijana mu mahonero.