Yosuwa 8 - Bibliya Yera 1951 1967 (Burundi)

Uko banesheje Hayi

¹ Uhoraho abarira Yosuwa, ati Ntutinye, kandi nturanduke umutima; jana ingabo zose, uhaguruke, utere i Hayi: rāba, ngabuye umwami waho mu maboko yawe, bo n’abantu biwe n’igisagara ciwe n’igihugu ciwe.

² Kand’ uz’ ugire Hayi n’umwami waho nk’uko wagiriye Yeriko n’umwami waho; mugabo ivyo muzosahura vyose n’inka zaho, muze muvyitwarire bibe iminyago yanyu. Kandi muze muce igico hirya y’ ico gisagara.

³ Nuko Yosuwa arahaguruka, bo n’ingabo zose, ngo baje gutera i Hayi: maz’ atoranya abantu ibihumbi mirongwitatu b’abahizi, abarungika mw ijoro.

⁴ Arababarira, ati Murumva: muje kubunda hirya y’ico gisagara; ntimukije kure cane, kandi mwese mube mwiteguye.

⁵ Nanje n’ abantu turi kumwe bose tuzokwēgereza igisagara: maze ni badushwabadukira nk’ubga mbere, tuzoca twīgira nk’ababahunze;

⁶ na bo bazoca badukurikira, tubahende, tubavane hafi y’igisagara, bagire ngo turabahunze nk’ubga mbere. Uko ni ko tuzogenda dusa n’ababahunga.

⁷ Maze namwe muze muheze muvyuke aho mubunze mu gico, mutere ico gisagara, kuk’ Uhoraho Imana yanyu azoba akigabuye mu maboko yanyu.

⁸ Maze ni mwamara kukivyagira, muze mugiturire, nk’ukw ijambo ry’Uhoraho ryavuze. N’ivyo, ivyo mbageze.

⁹ Nuko Yosuwa arabarungika; baja aho baja kubunda, baguma hagati ya Beteli na Hayi, ahahera i burengerazuba bga Hayi; ariko Yosuwa we, iryo joro arāra mu ngabo.

¹⁰ Yosuwa ahenga kare mu gatondo akoranya ingabo, adūgana n’abakuru b’Abisirayeli, azigiye imbere, baja i Hayi.

¹¹ Izo ngabo zose zari kumwe na we ziradūga, zishika hafi y’ico gisagara aharābana na co, zisagaza ku ruhande rwaco rw’i burārūko; kandi hār’ umwonga hagati yabo n’i Hayi.

¹² Maz’ atoranya abantu nk’ibihumbi bitanu, abarungika kuja kubunda hagati y’i Beteli n’i Hayi, i burengerazuba bg’ico gisagara.

¹³ Uko ni ko bāciye abantu intēko: itsitsi ry’ingabo risigara i burārūko bg’ico gisagara, abagiye kubunda bakaja i burengerazuba bgaco; ariko Yosuwa we, iryo joro arāra mur’ uwo mwonga.

¹⁴ Maz’ umwami w’i Hayi abibonye, akorokana kare n’abo mur’ ico gisagara, bihutira gushwabadukira Abisirayeli, umwami n’ abantu biwe bose, ngo babasange ku kamanuko kaja mu kiyaya, babasōbōre; ariko ntiyar’ azi ko har’ abābunze hirya y’ico gisagara.

¹⁵ Yosuwa n’Abisirayeli bose bīgira nk’abaneshejwe imbere yabo, bahunga bajanye inzira ija mu bugaragwa.

¹⁶ Uko ni kw abo mur’ ico gisagara bose bāciye bīvuta ngo babakōndōrere inyuma; kandi bakiriko barakōndōrera inyuma ya Yosuwa, arabahenda, abavana hafi y’ico gisagara.

¹⁷ Ntihasigara umugabo n’umwe i Hayi cank’ i Beteli, ataje kwirukana Abisirayeli; basiga igisagara cuguruwe, babakōndōrera inyuma.

¹⁸ Maz’ Uhoraho abarira Yosuwa, ati Tunga i Hayi iryo cumu witwaje, kuko ngira ndahagabure mu maboko yawe. Nuko Yosuwa atunga icumu yitwaje kur’ ico gisagara.

¹⁹ Agitunga ukuboko, abāri babunze baca bavyuka ako kanya aho bāri baryamye, bītera mu gisagara, barakivyagira, bihūtira kugiha impumbi.

²⁰ Ab’ i Hayi bagize ngo barasubiza amaso inyuma, babona imyotsi y’ico gisagara idūze intumbgejuru, bituma bananirwa guhunga, babura epfo na ruguru; maze ba bandi bāri bīgize nk’abahungira mu bugaragwa barabahindukirana.

²¹ Nuko Yosuwa n’Abisirayeli bose babonye kw abāri bīcīye igico bavyagiye ico gisagara, kandi kw imyotsi yaco ipfūndūka, bahindukirana ab’ i Hayi, bagenda barabica.

²² Ba bandi na bo bava mu gisagara, babata hagati, babaturuka hirya no hino; ntihagira n’umwe abajana, canke ngw acike kw icumu.

²³ Umwami w’i Hayi bamufata mpiri, bamuzanira Yosuwa.

²⁴ Maz’ Abisirayeli bahejeje kwicira ab’ i Hayi mu gahinga no mu bugaragwa aho bāri babirukaniye, basize ar’ imihindigiti bishwe n’ inkota iyo bava bakagera, bose basubira i Hayi, bahatōngōza inkota.

²⁵ Nukw abantu b’i Hayi iyo bava bakagera, abishwe uwo musi nyene, abagabo n’abagore, bar’ ibihumbi cumi na bibiri.

²⁶ Kandi Yosuwa ntiyagarura ukuboko yari yatungishije icumu, gushitsa aherengeteje kugeseza ab’i Hayi bose.

²⁷ Mugabo, inka n’ivyo basahuye vyo mur’ ico gisagara, ni vyo Abisirayeli bitwariye ngo bibe iminyago yabo, nk’uk’ Uhoraho yari yarageze Yosuwa.

²⁸ Uko ni ko Yosuwa yaturiye Hayi, ahahindura ikigūngūzi c’amasakamburira gushitsa ibihe vyose; hasigara ar’ amatongo kugeza na bugingo n’ubu.

²⁹ Na we umwami w’i Hayi amumanika ku giti gushitsa ku mugoroba; maze ku kirengazuba Yosuwa abarira abamanura umuvyimba wiwe ku giti, bawuterera imbere y’irembo ry’igisagara, bawurundakw ikirundo kinini c’amabuye; kiracariho na bugingo n’ubu.

Yosuwa yandika ivyagezwe ku mabuye, abisomera abantu

³⁰ Maze Yosuwa yubakira Uhoraho Imana y’Abisirayeli igicaniro ku musozi Ebalu,

³¹ nk’uko Mose umusavyi w’Uhoraho yabariye Abisirayeli, nk’uko vyanditswe mu gitabo c’ivyagezwe vya Mose, igicaniro c’amabuye atabājwe, atigeze gukozwakw icuma; bagitangirakw ibimazi boshereje Uhoraho, batanga n’ibimazi vy’ ishimwe.

³² Maze yandikira imbere y’Abisirayeli ivyagezwe vya Mose ku mabuye, nk’uko Mose yari yaravyanditse.

³³ Abisirayeli bose n’abakuru babo n’abashingantahe n’abacamanza bahagarara imbere y’Abalewi barerura isandugu y’isezerano ry’Uhoraho, bamwe ku ruhande rumwe rw’iyo sandugu, abandi ku rundi: s’ab’ imvukira gusa, ariko n’abanyamahanga na bo; igihimba kimwe cari gihagaze ku ruhande rw’umusozi Gerizimu, ikindi ku ruhande rw’ umusozi Ebalu, nk’uko Mose umusavyi w’Uhoraho yababariye ubga mbere, uko bizogenzwa mu guhezagira Abisirayeli.

³⁴ Hanyuma asoma amajambo yose y’ivyagezwe, imihezagiro n’imivumo, nk’ uko vyari vyaranditswe vyose mu gitabo c’ivyagezwe.

³⁵ Nta jambo na rimwe mu yo Mose yageze yose, Yosuwa atāsomeye imbere y’ikoraniro ry’Abisirayeli ryose, hamwe n’abagore n’abana n’abanyamahanga bāgendana na bo.