Yona 4 - Bibliya Yera 1951 1967 (Burundi)

Yona aratswa n’ukw Imana ihariye ab’ i Ninewe

¹ Arikw ivyo bishavuza Yona cane, araraka.

² Asenga Uhoraho, ati Mbega, Uhoraho, si co navuze nkiri mu gihugu cacu? Ni co catuma nshōka mpungira i Tarushishi; kuko namenye k’ur’ Imana y’inyabuntu, yuzuye imbabazi, iteba kuraka, igira ikigongwe cinshi, kandi yigarura ngo ntizane ikibi.

³ None rero, Uhoraho, ndakwinginze, pfuma unyica, kuko gupfa kundutiye kubaho.

⁴ Uhoraho aramubaza, ati Mbega k’uratse urtyo, ugize neza?

⁵ Nuko Yona ava mur’ ico gisagara, yicara ku ruhande rwaco rw’i burasirazuba; aba ari ho aca agasago, yicara muri ko mu gatūtu, yiteze kurāba amaherezo yaco.

⁶ Maz’ Uhoraho Imana ameza ikibonobono, gitagarara hejuru y’ aho Yona ari, kugira ngo kimubere igitūtu ku mutwe, kimworohereze amagorwa yarimwo. Maze Yona agira umunezero mwinshi kubg’ ico kibonobono.

⁷ Arikw Imana igera igikogoshi ngo kirye ico kibonobono; buca cākabiranye.

⁸ Maz’ izuba rirashe, Imana igera umuyaga w’indugumba, ng’ uve i burasirazuba; izuba rinaga Yona mu mutwe, bituma ahinduka urusogosogo, yisabira gupfa, ati Gupfa vyondutira kubaho.

⁹ Maz’ Imana ibaza Yona, iti Mbega k’urakijwe urtyo n’ ico kibonobono, ugize neza? Arayishura, ati Ngize neza kugira uburake, mbere bgonyica.

¹⁰ Uhoraho aramubaza, ati K’ ugiriye ikibabarwe ico kibonobono, utākoreye kand’ utāmejeje, cameze ijoro rimwe, ku rindi kikūma,

¹¹ none jewe sinari nkwiye kugirira ikibabarwe Ninewe, ico gisagara kinini, kirimw’ abantu ibihumbi ijana na mirongwibiri basāga, batazi gutandukanya ukuryo n’ukumoso; hakabamwo n’ibitunzwe vyinshi?