Yohana 5 - Bibliya Yera 1951 1967 (Burundi)

Uwar’ arwariye ku kidengeri citwa Betesida

¹ Hanyuma y’ivyo haba imisi mikuru y’Abayuda; Yesu adūga i Yerusalemu.

² Kand’ i Yerusalemu hafi y’irembo ry’intama, hār’ ikidengeri, mu Giheburayo citwa Betesida, carikw amabaraza atanu.

³ Muri yo hari haryamye abantu benshi barwaye, n’impumyi, n’abacumbagira, n’abanyunyutse. [Bāri barorereye kw amazi azīkuruka.

⁴ Kuko rimwe‐rimwe umumarayika yamanuka aja muri kino kidengeri, akazīkurura amazi. Maz’ uwītangiye gutambukiramwo, amazi azīkurutse, ni we yakira indwara yamufashe iy’ ari yo yose.]

⁵ Hārih’ umuntu yar’ afise indwara ayimaranye imyaka mirongwitatu n’umunani.

⁶ Yesu amubonye aryamyeho, kand’ amenye kw amaze igihe kirekire, aramubaza, ati Wumva ugomba gukira?

⁷ Uno arwaye aramwishura, ati Mugenzi, nta muntu mfise wo kunyinikīra mu kidengeri iy’amazi azīkurutse: kuko ngira ngo ndaza uwundi akantanga gushungurukiramwo.

⁸ Yesu aramubgira, ati Va hasi, ikorere ikirago cawe, ugende.

⁹ Buno nyene uwo muntu arakira, yikorera ikirago ciwe, aragenda. Arik’ uwo musi hari kw isabato.

¹⁰ Nukw Abayuda babgira uwakijijwe, bat’ Erega ni kw isabato: ntivyemerwa ko wikorera ikirago cawe.

¹¹ Na we arabishura, at’ Uwankijije ni we yambariye at’ Ikorere ikirago cawe, ugende.

¹² Baramubaza, bat’ Uyo muntu ni nde yakubariye ngw Ikorere ugende?

¹³ Arik’ uwakijijwe ntiyar’ azi uw’ ari we, kuko Yesu yaciye yīgīra, kukw aho hantu hār’ abantu benshi.

¹⁴ Hanyuma y’ivyo Yesu amubona mu rusengero, aramubgira, ati Rāba wakize; ntugasubire gukora icaha, kugira ngo ntuz’ ubone ibiruta ivya mbere.

¹⁵ Uno muntu aragenda, abgira Abayuda kw ari Yesu yamukijije.

¹⁶ Ni co catumye Abayuda bahama Yesu, kuko yakoze ivyo kw isabato.

¹⁷ Yesu arababgira, ati Data arakora kugeza n’ubu, nanje ndakora.

¹⁸ Ni co catumye Abayuda barushiriza kurondera ingene bomwica, kukw atākēngereye isabato gusa, arikw agatakw akīta Imana kw ari Se bgite, akīringaniza n’Imana.

Ububasha bga Yesu aho buva

¹⁹ Nuko Yesu asubira kubabgira, ati N’ukuri, n’ukuri ndababgire: Nta co Umwana ashobora kwigenera, atabonye Se agikora, kukw ivyo Se akora vyose n’Umwana aca abikora kuno.

²⁰ Kuko Se akunda Umwana, akamwereka ivy’ akora vyose ubgiwe, kand’ azomwereka ibikorwa biruta ivyo, kugira ngo mwebge mutangare.

²¹ Nk’uko Se azura abapfuye akabaha ubugingo, ni ko n’Umwana aha ubugingo abo agomba.

²² Kuko Se ata n’umwe acira urubanza, arikw imanza zose yazishikirije Umwana,

²³ ngo bose bubahe Umwana nk’uko bubaha Se; ūtubaha Umwana ntaba yubaha Se yamutumye.

²⁴ N’ukuri, n’ukuri ndababgire: Uwumva ijambo ryanje, akizera uwantumye, ni we afise ubugingo budashira, kandi ntazoshirwa mu rukinja, arikw aba avuye mu rupfu, ashitse mu bugingo.

²⁵ N’ukuri, n’ukuri ndababgire: Igihe kiza, kandi kirashitse, ah’ abapfuye bazokwumvira ijwi ry’Umwana w’Imana, kand’ abazoryumva bazoba bazima.

²⁶ Nk’uko Se ari n’ubugingo muri we, ni ko yahaye Umwana kugira ubugingo muri we na we.

²⁷ Yamuhaye ububasha bgo guca imanza, kukw ar’ Umwana w’umuntu.

²⁸ Ntimutangazwe n’ico; kukw igihe kija kuza, ah’ abari mu mva bose bazokwumvira ijwi ryiwe,

²⁹ bakazivamwo; abākoze ivyiza bakazukira ubugingo, abākoze ibibi bakazukira gucirwakw iteka.

³⁰ Nta co nshobora gukora nigeneye; uko numvise ni ko nca urubanza, kand’ urubanza nca rurabereye, kuko ntarondera ivyo nigombera, ariko ndondera ivyo uwantumye agomba.

Igishingira intahe Yesu

³¹ Asangwa nishingira intahe, intahe yanje ntizoba ar’ iy’ ukuri;

³² ariko har’ Uwundi anshingira intahe, nanje nzi yukw intahe yiwe anshingira ar’ iy’ ukuri.

³³ Mwebge mwatumye kuri Yohana, ashingira ukuri intahe,

³⁴ mugabo jewe sindinda gushingirwa intahe n’umuntu; arikw ico mvugiye ivyo n’ukugira ngo mukizwe.

³⁵ Uwo yar’ itara ryaka rikabonesha, kandi namwe mwamaze igihe muhimbawe n’ukwaka kwiwe.

³⁶ Ariko jewe mfise ikinshingira intahe kuruta Yohana, kukw ibikorwa Data yampaye ngo mbiheraheze, ivyo bikorwa nyene nkora ni vyo binshingira intahe yuko Data ari we yantumye.

³⁷ Kandi Data yantumye ni we anshingira intahe. Nta ho murumva ijwi ryiwe, kandi ntimurabona ishusho yiwe,

³⁸ bitayeko ntimufise ijambo ryiwe riguma muri mwebge, kuk’ uwo yatumye mutamwizeye.

³⁹ Mwebge murasesa mu vyanditswe, kuko mugira ngo muri vyo ni ho mufise ubugingo budashira, kand’ ari vyo binshingira intahe,

⁴⁰ ariko mukanka kuza kuri jewe ngo muronke ubugingo.

⁴¹ Singomba gushimwa n’abantu,

⁴² ariko mwebge ndabazi yuko mutagira urukundo rw’Imana mu mitima yanyu.

⁴³ Jewe naje mw izina rya Data, ntimwanyakīra: ni hagira uwundi aza mw izina ryiwe ubgiwe, we muzomwākīra.

⁴⁴ Mwoshobora kwizera mute, ari mwebge mwubahana, arikw icubahiro kiva ku Mana imwe nsa mutakirondera?

⁴⁵ Ntimugire ngo nzobarega kuri Data: harih’ ūbarega, ni Mose uwo mwishimiye.

⁴⁶ Iyo mwizera Mose, nanje muba munyizeye, kukw ar’ ivyanje yanditse.

⁴⁷ Ariko ni mutizera ivy’ uwo yanditse, amajambo yanje muzoyizera mute?