Yohana 2 - Bibliya Yera 1951 1967 (Burundi)

Ubukwe bg’i Kana

¹ Ku musi ugira gatatu haba ubukwe i Kana i Galilaya, kandi nyina wa Yesu ni ho yar’ ari.

² Yesu na we atorerwa ubukwe, bo n’abigishwa biwe.

³ Maze vino ikamye, nyina wa Yesu aramubarira, ati Nta vino bafise.

⁴ Yesu aramwishura, ati Duhūriye hehe ga nyina wanje? Igihe canje ntikiragera.

⁵ Nyina abgira abasuku, at’ Ic’ ababgira cose mugikore.

⁶ Hārih’ impange z’intango zitandatu z’amazi zabājwe mu mabuye, zateretsweho kubg’ ukwihumānura nk’uk’ umugenzo w’Abayuda war’ uri, imwe‐imwe yuzuzwa n’ibibindi bibiri canke bitatu.

⁷ Yesu arababarira, ati Ni mwuzuze izo ntango amazi. Bazuzuza kugeza ku mbiga.

⁸ Arababarira, ati Mudahe ubu nyene, mushīre umuteretsi mukuru. Baramushīra.

⁹ Umuteretsi yumvirije amazi yāhindutse vino, ntiyamenye iy’ ivuye, arikw abasuku bādashe amazi bari babizi; uwo muteretsi ahamagara umukwe,

¹⁰ aramubgira, at’ Umuntu wese ahora abanza gutereka vino ziryoshe, maze bāhimba akabaha izitaryoshe: ariko weho iziryoshe ni zo wabītse gushitsa ubu.

¹¹ Iryo ni ryo tanguriro ry’ibimenyetso Yesu yakoze ar’i Kana i Galilaya, yerekana ubgiza bgiwe; kand’ abigishwa biwe baramwizera.

¹² Hanyuma y’ivyo amanuka i Kaperinawumu, bo na nyina na bene nyina n’abigishwa biwe, amaray’ imisi itari myinshi.

Yesu ahumanura urusengero

¹³ Kandi Pasika y’Abayuda yari hafi; Yesu adūga i Yerusalemu.

¹⁴ Asanga mu rusengero abadandarizah’ inka n’intama n’inuma, n’abavunja amahera bicaye.

¹⁵ Atsiba imigozi ayigira nk’ikimoko, abahinda mu rusengero bose, n’intama n’inka, asēsa amahera y’abariko baravunja, ahenura ameza yabo.

¹⁶ Abarira abadandaza inuma, ati Ni mukūreh’ ivyo, nta co muhindura inzu ya Data kuba inzu y’akaguriro.

¹⁷ Abigishwa biwe bibuka ko handitswe, ngw Ishaka ry’inzu yawe rizondya.

¹⁸ Abayuda baramubaza, bat’ Utwereka ikimenyetso ki, gituma ukora ivyo?

¹⁹ Yesu arabishura, ati Musambure uru rusengero, nanje nzoruhagarika mu misi itatu.

²⁰ Maz’ Abayuda bat’ Uru rusengero rwubatswe imyaka mirongwine n’itandatu: none wewe uzoruhagarika mu misi itatu?

²¹ Ariko we yavuga urusengero rw’umubiri wiwe.

²² Nukw amaze kuzurwa mu bāpfuye, abigishwa biwe bibuka yuko yari yaravuze ivyo, bemera icanditswe, na rya jambo Yesu yavuze.

²³ Kandi yar’i Yerusalemu mu misi mikuru ya Pasika, benshi bizera izina ryiwe, babonye ibimenyetso akora.

²⁴ Ariko Yesu we ntiyabīshimira, kuko yar’ azi abantu bose,

²⁵ ntiyarinda ko hogira ūshingira intahe ivy’ umuntu, kuk’ ubgiwe yar’ azi ibiri mu muntu.