Yohana 16 - Bibliya Yera 1951 1967 (Burundi)

¹ Ico mbabaririye ivyo, n’ukugira ngo ntimuze mutsitazwe.

² Bazobaca mu masinagogi, kand’ igihe kigiye kuza, ūzobīca wese azogira ngw agiriye Imana ikimazi.

³ Kand’ ivyo bazobikora kuko batamenye Data, nanje ntibāmmenye.

⁴ Ico mbabaririye ivyo, n’ukugira ngw igihe cavyo ni cashika, muze muvyibuke ko nanje nabibabgiye. Uhereye ubga mbere sinaribgabibabgire, kuko nari nkiri kumwe namwe.

⁵ None ngira ngende ku wantumye, kandi nta n’umwe muri mwebge arushe ambaza at’ Uja hehe?

⁶ Ariko kuko mbabariye ivyo, umubabaro waciye wuzura mu mitima yanyu.

Igikorwa c’Umwitsa

⁷ Ariko jewe ndababgira ukuri: Ikizogira ico kibamarira, n’uko jewe ngenda; kuko ni ntagenda, Umwitsa ntazoza kuri mwebge: ariko ni nagenda nzomubarungikira.

⁸ Uwo ni yaza, azohinyuza ab’ isi, abemeze ivy’ icaha, n’ivy’ ukugororoka, n’ivy’ amateka;

⁹ ivy’ icaha, kuko batānyizeye,

¹⁰ ivy’ ukugororoka, kuko nja kwa Data, kandi namwe muzoba mutakimbona,

¹¹ ivy’ amateka, kuk’ umwami w’iyi si yaciriwekw iteka.

¹² Nari ngifise vyinshi vyo kubabgira, ariko ntimushobora kuvyihanganira ubu.

¹³ Arik’ uwo Mpwemu w’ukuri ni yaza, azobarōngōra abashitse ku kuri kwose, kukw atazovuga ivyo yigeneye, arikw ivy’ azokwumva vyose ni vyo azovuga, kand’ azobamenyesha ibigira bize.

¹⁴ Uwo azoshimagiza jewe, kukw azokwābīra ku vyanje, akabibamenyesha.

¹⁵ Ivyo Data afise vyose n’ivyanje, ni co gitumye mvuga, nti Yābīra ku vyanje, akabibamenyesha.

Umubabaro ukenyuka uzocika umunezero udashira

¹⁶ Hasigaye igihe gito ntimube mukimbona, maze hazoca ikindi gihe gito musubire kumbona.

¹⁷ Bamwe mu bigishwa biwe barabazanya, bati Mbeg’ ivyo atubgiye n’ibiki ngo Hasigaye igihe gito ntimube mukimbona, ngo Maze hazoca ikindi gihe gito musubire kumbona, kandi ngo Kuko nja kwa Data?

¹⁸ Kandi bat’ Ivyo atubgiye n’ibiki, ngw Igihe gito? Ntitumenye ico avuze ic’ ari co.

¹⁹ Yesu amenya ko bagomba kumubaza, arababaza, ati Mbega mubazanya ic’ ari co, ko mbabariye nti Hasigaye igihe gito ntimube mukimbona, nti Maze hazoca ikindi gihe gito musubire kumbona?

²⁰ N’ukuri, n’ukuri ndababgire: Mweho muzorira muboroge, arikw ab’ isi bo bazonezerwa; mweho muzobabara, arik’ umubabaro wanyu uzocika umunezero.

²¹ Umugore iy’ aramutswe, aja mu mubabaro, kukw igihe ciwe kigeze, arikw iy’ umwana amaze kuvuka ntaba acibuka kugorwa kwiwe, kukw anezerejwe n’uk’ umuntu avutse mw isi.

²² Ni ko namwe muri mu mubabaro, ariko nzosubira kubabona, kand’ imitima yanyu izonezerwa, umunezero wanyu nta n’umwe azowubanyaga.

²³ Kur’ uwo musi nta na kimwe muzombaza. N’ukuri, n’ukuri ndababgire: Ni hagira ico musaba Data cose azokibaha mw izina ryanje.

²⁴ Kugeza ubu nta co mwasavye mw izina ryanje; musabe muzohabga, ng’umunezero wanyu wuzuzwe.

²⁵ Ivyo mbibabgiriye mu migani, arikw igihe kizoza sinzoba ngisubira kuvuganira namwe mu migani, mugabo nzobabgira ivya Data mbifoboye.

²⁶ Kur’ uwo musi muzosaba mw izina ryanje, kandi simbabgira ngo nzobasabira Data.

²⁷ Kuko Data na we ubgiwe abakunda, kuko mwankunze kandi mwizeye ko naturutse ku Mana.

²⁸ Navuye kwa Data, nza mw isi; ikindi, isi ndiko ndayivamwo, nje kwa Data.

²⁹ Abigishwa biwe baravuga, bat’ Ubuho urabifoboye, nta mugani uduciriye.

³⁰ Ubuho tumenye k’uzi vyose, kandi ko kubgawe utarinda ko hogira ūkubaza; ni co gituma twizera ko waturutse ku Mana.

³¹ Yesu arabishura, ati Mbega noneho murizeye?

³² Igihe kigira kize, mbere kirashitse, aho muhava musābagira, umuntu wese aje mu vyiwe, munte jenyene, ariko sindi jenyene, kuko Data ari kumwe nanje.

³³ Ivyo mbibabgiye, kugira ngo mugire amahoro muri jewe. Mw isi muri n’amarushwa, ariko ni muhūmure, jewe naranesheje isi.