Yohana 15 - Bibliya Yera 1951 1967 (Burundi)

Umuzabibu w’ukuri n’amashami yawo

¹ Jewe nd’umuzabibu w’ukuri, kandi Data ni nyene wo.

² Ishami ryose ryo muri jewe ritāma, arikūraho; kand’ iryama ryose araritūtūrira, ngo rirushirize kwama.

³ N’ubu mwebge mumaze kwezwa kubg’ ijambo nababgiye.

⁴ Ni mugume muri jewe, nanje ngume muri mwebge. Nk’ukw ishami ritabasha kwama ubgaryo, ritagumye mu muzabibu, ni ko namwe mutabibasha, mutagumye muri jewe.

⁵ Ni jewe muzabibu, namwe mur’ amashami: ūguma muri jewe, nanje nkaguma muri we, uwo ni we yama cane, kukw ata co mubasha gukora mutamfise.

⁶ Umuntu n’ataguma muri jewe atabga nk’ukw’ ishami ritererwa inyuma y’uruzabibu, akuma; maze bakayatororokanya, bakayaterera mu muriro, agasha.

⁷ Ni mwaguma muri jewe, amajambo yanje akaguma muri mwebge, musabe ico mugomba cose, kizobabera kuno.

⁸ Mur’ ivyo Data arashimagizwa, ni mwama cane, kandi mukaba abigishwa banje.

Icagezwe c’urukundo

⁹ Nk’uko Data yankunze, ni ko nanje nabakunze: ni mugume mu rukundo rwanje.

¹⁰ Ni mwitondera ivyagezwe vyanje, muzoguma mu rukundo rwanje, nk’uko nanje nitondeye ivyagezwe vya Data, nkaguma mu rukundo rwiwe.

¹¹ Ivyo mbibabgiye, kugira ng’umunezero wanje ube muri mwebge, kandi n’umunezero wanyu wuzuzwe.

¹² Ngiki icagezwe canje: ni mukundane, nk’uko nabakunze.

¹³ Nta wogira urukundo ruruta urw’ uk’ umuntu yigura abakunzi biwe.

¹⁴ Mur’ abakunzi banje, ni mwakora ivyo mbagera.

¹⁵ Sinkibita abashumba, kuk’ umushumba atamenya ico shebuja akora; ariko mweho nabise abakunzi, kukw ivyo numvanye Data vyose nabibamenyesheje.

¹⁶ Si mwebge mwantoranije, ariko ni jewe nabatoranije, nabashizeho kugira ngo mugende murāma imbuto, kandi ngw imbuto zanyu zigumeho, kugira ngw ico muzosaba Data cose mw izina ryanje, akibahe.

¹⁷ Ivyo ndabibageze kugira ngo mukundane.

Ingen’ isi yanka Yesu n’abiwe

¹⁸ Isi ni yabanka, mumenye ko jewe yabanje kunyanka, itarabanka.

¹⁹ Iyo muba ab’ isi, isi iba ikunze icayo, maze kuko mutar’ ab’ isi, ariko nabatoranije mu b’isi, ni co gituma isi ibanka.

²⁰ Mwibuke rya jambo nababgiye, nt’ Umushumba ntaruta shebuja; namba bārampamye, namwe bazobahama; namba bāritondeye ijambo ryanje, n’iryanyu bazoryitondera.

²¹ Arikw ivyo vyose bazobibagirira babahōra izina ryanje, kuko batazi uwantumye.

²² Iyo ntaba naraje ngo ngire ico mbabarira, nta caha baba bafise, ariko none ntibari n’ico bireguza icaha cabo.

²³ Ūnyanka aba yanka na Data.

²⁴ Iyo ntaba narakoreye ibikorwa muri bo bitigeze gukorwa n’uwundi, nta caha baba bafise, ariko noneho twe na Data baratubonye, baraheza baratwanka.

²⁵ Ariko vyabaye birtyo kugira ngw ijambo ryanditswe mu vyagezwe vyabo rishike, ngo Bānyankiye ubusa.

²⁶ Arik’ Umwitsa ah’ azozira, uwo nzobarungikira ava kuri Data, ni we Mpwemu w’ukuri akomoka kuri Data, uwo ni we azonshingira intahe,

²⁷ kandi namwe nyene muranshingira intahe, kuko mwari kumwe nanje uhereye mbere na mbere.