Yobu 4 - Bibliya Yera 1951 1967 (Burundi)

Elifazi abgira Yobu kw Imana idahana abatācumuye

¹ Maze Elifazi w’i Temani aramubarira,

² ati Mbeg’ uwogerageza kugira ico akubarira, vyokubabaza? Ariko se har’ uwokwama afumbije?

³ Rāba ingene wahora wigisha benshi, Wakomeza amaboko areganutse.

⁴ Amajambo yawe yaramira uwarikw aratemba, Kandi wagumisha amavi aregarega.

⁵ Ariko none ni wewe bishitseko, kand’ urihebuye; Biraguteye, uhagarika umutima.

⁶ Mbeg’ ivyizigiro vyawe s’uko wubaha Imana? Kand’ inzira zawe zigororotse si zo wishimira?

⁷ Ibuka ndakwinginze, ni nde yigeze kugesera atācumuye? Canke har’ ah’ abagororotsi bigeze kurandurwa?

⁸ Nk’uko ngenda mbibona, abarima ibigabitanyo, Bakabiba amagorwa, ni vyo bazokwimbura.

⁹ Bagesezwa n’impwemu z’ Imana, Bakamarwa n’igihuhuta c’ uburake bgayo.

¹⁰ Kwivuga kw’intambge, n’ijwi ry’intambge y’inkazi birahezwa, N’imikāka y’imigunza y’intambge iravunagurwa.

¹¹ Intambge nah’ ikomeye yicwa no kubura ico ifata, Kand’ ibibgana vy’intambge birasābagira.

¹² Nuko, har’ ijambo ryanshitseko mu mpisho, Maz’ ugutwi kwanje kwumva utwongoshwa twaryo.

¹³ Nciyumvira ivyiyumviro bivuye mw iravūta ryo mw ijoro, Igihe itiro ryinshi ritwaye abantu,

¹⁴ Mfatwa n’ubgoba n’agatengo, Bituma amagufa yanje yose atetemera.

¹⁵ Maz’ impwemu zihita imbere yanje, Ubgoya bgo ku mubiri wanje buramerereza.

¹⁶ Haca haboneka ikintu gihagaze, ariko sinashobora kwihweza uko casa; Hār’ ishusho imbere y’amaso yanje: Habah’ agacerere, maze numva ijwi rivuga,

¹⁷ Ngo Mbeg’ umuntu buntu yorusha Imana kugororoka? Mbeg’ umuntu yorusha Umuremyi wiwe gutungana?

¹⁸ Rāba kw itizigira abasavyi bayo, N’abamarayika bayo kw ibabonakw amafuti,

¹⁹ None ntivyorushiriza ku baba mu nzu z’ibumba, Amatanguriro yazo akaba mu mukungugu, Bahonyoreka nk’inyenzi?

²⁰ Hagati y’igihe c’igitondo n’ umugoroba baravunagurwa: Bapfa akagīrīre, ntihagire ūbishirak’ umutima.

²¹ Mbeg’ umugozi w’ihema ryabo ntiwabakūwemwo? Bapfa, kand’ ata bgenge.