Yobu 22 - Bibliya Yera 1951 1967 (Burundi)

Elifazi arundanya ivyaha kuri Yobu, amubgira ngo yihane

¹ Maze Elifazi w’i Temani arishura,

² ati Mbeg’ umuntu yoshobora kugirira Imana ikimazi? Ushime n’umunyabgenge nta wundi yokigirira shiti kucīgirira ubgiwe.

³ Mbeg’ ukugororoka kwawe kurahimbara Īshobora vyose? Canke se gutunganya ingeso zawe har’ ico biyungura?

⁴ Mbeg’ ukuyubaha kwawe ugira ngo ni kwo kwatumye iguhana, Ikagushira mu rubanza?

⁵ S’ukw ivyaha vyawe bikomeye? Mber’ ibigabitanyo vyawe ntibigira akagero.

⁶ Kuko wanyaze bene wanyu ingwati z’ubusa, Ugakoba impuzu z’abatagira ico bambara.

⁷ Umuntu arushe ntiwamuhaye amazi yo kunywa, Kand’ umushonji wamwimye ivyo kurya.

⁸ Ūhambaye ni we yiganziye igihugu, Ūtinywa mu kigohe akacībēramwo.

⁹ Wirukanye abapfakazi bagenda imvumure, N’amaboko y’impfuvyi aravunagurwa.

¹⁰ Ni co gituma imitego igukikije, Ubgoba bga giturumbuka buguhagaritse umutima,

¹¹ N’umwiza na wo ukagukikiza, ukakubuza kubona, Kand’ amazi menshi akakurengera.

¹² Mbeg’ Imana ntiri hejuru mw ijuru? Kandi rāba inyenyeri ziri hejuru iyo bigwa, ingene zir’ ahītereye kure!

¹³ Nawe ukavuga, ngw Imana izi iki? Kand’ uti Yoshobora ite guca imanza iri mu mwiza w’ umuzitanya?

¹⁴ Ut’ Ibicu bitwaye intunda birayitwikiriye, biyibuza kubona; Yigendagendera ahihese hejuru kw ijuru.

¹⁵ Mbeg’ ugomba gukomeza inzira ya kera, Iy’ abanyakibi bājanye?

¹⁶ Bācakiwe igihe cabo kitaragera; Itanguriro ryabo ryatemvye nk’umugezi.

¹⁷ Bakabgira Imana, bati Tuve i ruhande; Bat’ Īshobora vyose yotumarira iki?

¹⁸ Yamara yujuje inzu zabo ivyiza: Inama z’abanyakibi zikaba kure yayo.

¹⁹ Abagororotsi barabibona bakanezerwa, Abatarikw igicumuro barabatwengera mw ijigo,

²⁰ Bati N’ukuri abāri badukūriye hasi bararanduwe, N’amasigarira yo muri bo atongowe n’umuriro.

²¹ Enda rero ni wiyuzuze na yo, ubone kuba amahoro: Uko ni k’uzobona amahirwe.

²² Ndakwinginze, wemere kwigishwa n’ibiva mu kanwa kayo, Amajambo yayo uyabīke mu mutima wawe.

²³ Ni wagaruka kw Īshobora vyose, Ugashira ukugabitanya kure y’urugo rwawe, uzokomezwa.

²⁴ Rekurira itunga ryawe mu mukungugu, N’izahabu yavuye muri Ofiru uyirekurire mu mabuye yo mu migezi;

²⁵ Maz’ Īshobora vyose izokubera itunga, N’ifeza y’igiciro kinini.

²⁶ Ni ho uzonezererwa Īshobora vyose, Ukunamurira amaso yawe ku Mana.

²⁷ Uzoyisaba, na yo izokwumva; Kand’ uzoshitsa amasezerano yawe.

²⁸ Iy’ ugize ico ugabira, kizokubera uko wagomba, Kand’ umuco uzomurika mu nzira zawe.

²⁹ Ni bagutsinda hasi uzovuga, uti Har’ ikimvyutsa; Kand’ uwicisha bugufi Imana izomukiza.

³⁰ Mber’ izorokora n’ūrikw igicumuro: N’ukuri uzorokorwa no gutungana kw’amaboko yawe.