Yobu 15 - Bibliya Yera 1951 1967 (Burundi)

Elifazi atesha Yobu ngw areke kwitsindishiriza

¹ Maze Elifazi w’i Temani arishura,

² ati Mbeg’ umunyabgenge yokwishurana amagambo asunitswe n’impwemu, Umuyaga akaba ari wo yuzuza inda?

³ Mbega yobūranisha amagambo atagira ikimazi, Canke yovuga ibitagira ico bivūra?

⁴ N’ukuri, kwubaha Imana ugukūyeho, Kand’ ubuzanije no kuyisenga.

⁵ Kukw ibigabitanyo vyawe ari vyo vyigisha akanwa kawe, Nawe wihitiyemw’ ururimi rw’ubugunge.

⁶ Akanwa kawe ubgako ni ko kagutsindisha, si jewe; Mber’ iminwa yawe ni yo ikwagiriza.

⁷ Mbega ni wewe muntu wa mbere yatanguye kuvuka? Canke se wavyawe imisozi itararemwa?

⁸ Mbega wigeze kwumva inama zihishijwe z’Imana? Canke ni wewe wiharije ubgenge?

⁹ Ivy’ uzi tutazi natwe n’ibiki? Ico watahuye tutāmenye n’ iki?

¹⁰ Turimw’ abameze imvi n’ abatāma bukokori, Baruta so ubukuru iy’ atibona.

¹¹ Mbeg’ ukwirura kw’Imana wakwise ubusa, Bo n’amajambo yo kukworohereza?

¹² N’iki gituma umutima wawe ukuzimiza, Amaso yawe agahindurira,

¹³ Ugatera umutima wawe kurwanya Imana, Ugatuma akanwa kawe karokomboka amagambo ameze artyo?

¹⁴ Umuntu vyoshoboka bite kw aba uwera? Cank’ uwavyawe n’umugore, kw aba umugororotsi?

¹⁵ Erega n’abera bayo nta ho ibizigira, Mbere n’ijuru na ryo ntiritunganye mu nyonga zayo,

¹⁶ Nanswe umuntu agayitse kand’ abihiye, Agotomera ibigabitanyo nk’ amazi!

¹⁷ Ngira nkubarire, nawe nyumviriza: Kand’ ivyo nabonye ndabikumenyesha.

¹⁸ Vyāvuzwe n’abanyabgenge, Bābikūye kuri ba sekuruza, ntibābihisha;

¹⁹ Kandi ni bo bonyene bāhawe igihugu, Nta n’umunyamahanga yaca muri bo:

²⁰ Ni vyo ibi, yuk’ umunyakibi ahora aseserewe imisi yiwe yose, Akarinda ashitsa igitigiri c’ imyaka abahahaji bāshingiwe.

²¹ Ijwi ry’ibiteye ubgoba ryama mu matwi yiwe; Akiri mu mahoro umunyazi azomunyaga.

²² Ntiyizigira kw azogaruka ngw ave mur’ uwo muzimagiza, Kandi yumva kw inkota ihora imurorereye.

²³ Ayerēra arondera ivyo kurya, ati Vyoba hehe? Azi k’umusi w’umuzimagiza umwiteze uri hambavu yiwe.

²⁴ Amagorwa n’umubabaro bimutera ubgoba; Biramutsinda bimeze nk’ umwami yiteguriye kurwana,

²⁵ Kuko yabanguriye Imana ukuboko kwiwe, Akīnantaza kw Īshobora vyose,

²⁶ Akayirangirirako afise ubugabo, Yitwaje inkinzo ifise umukondo ukomeye.

²⁷ Asenyuka mu maso hiwe, Akagira ibinyonyori ku mafyinga.

²⁸ Kandi yagerereye mu bisagara vyabaye amatongo, No mu nzu z’imisaka abantu batakibamwo, Zisigaje gatoya zigacika ibirundo vy’amasakamburira.

²⁹ Ntazoba umutunzi, kandi n’ ivyo yar’ atunze ntibizogumaho, Kandi n’ivyo yamuje nta ho bizoregeza ngo bijondajonde hasi.

³⁰ Nta ho azova mu mwiza; Urubeya rw’umuriro ruzobabura amashami yiwe, Impwemu ziva mu kanwa k’ Imana zizomukūraho.

³¹ Yoye kwizigira ivy’ ubusa, yihenda; Kukw ibitagira ikimazi ari vyo ngero yiwe.

³² Azoyihabga igihe ciwe kitaribgashike, Kand’ ishami ryiwe ntirizotoha.

³³ Azokenyanywa nk’uk’ umuzabibu ukorora inzabibu zawo zikir’ ibitumbge, Nk’uk’ umwelayo uhungurutsekw amashurwe yawo.

³⁴ Kukw igihari c’abatubaha Imana kizogumbaha, Kand’ umuriro uzoyigiza ingo z’abarya ingurire.

³⁵ Basama inda z’inabi, bakavyara ibigabitanyo, Mu nda zabo hakuramw’ ubugunge.