Yobu 12 - Bibliya Yera 1951 1967 (Burundi)

Yobu yishura Zofari kw ar’ abantu buntu

¹ Maze Yobu arishura,

² ati N’ukuri umenga ni mwebge bantu muriho mwenyene, Kandi yuk’ umenga ubgenge buzojana namwe!

³ Erega nanje nzi ubgenge, si mwebge gusa, ntimubundusha; Mbega ben’ ivyo har’ ūtabizi?

⁴ Mpindutse nk’agatwengo kuri bagenzi banje: Nahora ntabaza Imana, ikantabara, Nd’ umugororotsi, nd’ umuntu atunganye, none mpindutse agatwengo.

⁵ Mu mutima w’uwihiririwe habamwo gukēngēra abagowe; Ūnyereye wese aratwengwa.

⁶ Ingo z’abambuzi zigira amahirwe, N’abavyogoroza Imana baba amahoro; Inkomezi zabo ni zo bagize imana yabo.

⁷ Enda baza ibikōko, bizokwigisha; N’inyoni zo mu kirēre, zizokubarira:

⁸ Cank’ uvugane n’isi, izokwigisha; N’amafi yo mu kiyaga azobikudondera.

⁹ N’ikihe mur’ ivyo vyose kitomenya yuk’ ukuboko kw’ Uhoraho ari kwo kwabikoze?

¹⁰ Ni we afise mu kuboko kwiwe ubugingo bg’ikintu cose kizima, N’impwemu z’ababaho bose.

¹¹ Mbeg’ ugutwi si kwo gutondanuza amajambo, Nk’ukw akanwa kumviriza ivyo kurya?

¹² Ubgenge bufiswe n’abatāma, Kand’ ukumenya gufiswe n’ abamaze igihe kirekire.

¹³ Arikw iyo yo ni yo ifise ubgenge n’inkomezi; Ni yo ifise inama no kumenya.

¹⁴ Rāba, irasambura, ntihasubire kwubakika; Yugarana umuntu, ntihashobore kwuguruka.

¹⁵ Rāba, yimana amazi, agakama; Vyongeye yayarekura, akūbika isi.

¹⁶ Ni yo ifise inkomezi n’ubgenge bushitse; Ūgunga n’ūgungwa n’abayo.

¹⁷ Ishorera abajanama ar’ inyagano, N’abacamanza ibahindura ibipfu.

¹⁸ Ikenyurura inkindi z’abami, Ikabakenyeza imigozi.

¹⁹ Ishorera abaherezi ar’ inyagano, Icurikiranya abakomeye.

²⁰ Abār’ imvuzi ibahindura ibiragi, Kand’ abashingantahe ibāka ubgenge bgabo.

²¹ Isuka agakēngērwe ku bahambaye, Ikadohora umukanda w’abahizi.

²² Iserura ibitamenyekana vyo mu mwiza, Kand’ igitūtu c’urupfu igishira ahabona.

²³ Igwiza amahanga, kand’ ikayarandura; Ishwiragiza amahanga, kand’ ikayagarukana.

²⁴ Abatware b’amoko yo mw isi ibāka ubgenge, Ibayerereza mu bugaragwa ahatagira inzira.

²⁵ Bakabakabira mu mwiza ahatagira umuco, Kand’ ibadandabagiranya nk’ imborerwa.