Yobu 11 - Bibliya Yera 1951 1967 (Burundi)

Zofari abgira Yobu kw azoronka amahoro yihannye

¹ Maze Zofari w’i Nayama arishura,

² ati Mbeg’ isinzi ry’amajambo ntirikwiye kwishurwa? Ugira ng’umuntu yotsindanishirizwa n’ukw ar’ imvuzi?

³ Canke kwihayagiza kwawe gukwiye guhoza abantu? Iy’ utukana nta wuriho yotuma ugira n’udusoni?

⁴ Kuk’ uvuga, ng’ Uk’ uri kwose uragororotse, Kandi ngo Nawe uratunganye mu nyonga zayo.

⁵ Arikw icompa Imana ikavuga, Igateranura akanwa ikakwishura:

⁶ Ikakwereka amabanga y’ ubgenge, Uko bumeze kw ar’ igitangaza: Ni ho womenya yukw Imana itakugiriye ibihwanye n’ ibigabitanyo vyawe.

⁷ Mbega woshobora kugenzura ibidashikīrwa vy’Imana? Woshobora kumenya Īshobora vyose ukanonosora?

⁸ Biri hejuru nk’ijuru; wogira ute? Bir’ i bgina kuruta i kuzimu; womenya iki?

⁹ Urugero rwavyo rusumba isi uburebure, Rusumba ikiyaga ubgaguke.

¹⁰ Iyo yiyiziye, igata abantu mu ngoyi, Igakoranya abo kuja mu rubanza, ni nde yoyibuza?

¹¹ Kukw itayobewe abantu b’ imburakimazi, Ibona n’ibigabitanyo itarinze kuvyitegereza.

¹² Arik’ umuntu we, ubgenge bgiwe n’ubujuju: Mber’ avuka nk’inyana y’ indogoba y’inyeshamba.

¹³ Ariko weho, ni watunganya umutima wawe, Ukaya amaboko imbere yayo;

¹⁴ Namba har’ ukugabitanya mu kuboko kwawe ugute kure, Kandi ntukundire ibitagororotse ko biba mu mahema yawe:

¹⁵ N’ukuri ni ho uzokwunamura amaso yawe ata gasembga ufise; Mber’ uzokomera, ntuzotinya.

¹⁶ Kuk’ uzokwibagira umubabaro wawe, Uzowibuka nk’amazi yatemvye;

¹⁷ Kand’ ubugingo bgawe buzokwaka kurusha umurango w’amashōka; Naho hoba umwiza, hazomera nk’umuco wo mu gatondo‐tondo.

¹⁸ Kand’ uzoba amahoro, kuko harih’ ivyizigiro; Mber’ uzokenguza, wiruhukire ata nkomanzi.

¹⁹ Kand’ uzokwiryamira, ntihagire ūgutera ubgoba; Mbere benshi bazogusaba ng’ ubatonere.

²⁰ Arikw amaso y’abanyakibi azokoboka, Ntibazobona aho guhungira; Kand’ ivyifuzo vyabo n’ugupfa.