Yobu 10 - Bibliya Yera 1951 1967 (Burundi)

¹ Umutima wanje urambiwe n’ukubaho; Ngira nziburure amajojwa yanje, Mvugishwe n’akabonge ko mu mutima wanje.

² Mbgire Imana, nti Ntuntsindishe: N’ummenyeshe igituma umbūranya.

³ Mbeg’ ubona ari vyiza wewe guhahaza, Ugakēngēra igikorwa c’amaboko yawe, Ukākishiriza umuco imigabo y’abanyakibi?

⁴ Mbeg’ ufise amaso y’umubiri? Canke se urāba nk’ukw abantu barāba?

⁵ Ah’ imisi yawe ingana n’iy’ umuntu? Canke se imyaka yawe ihwanye n’imisi y’umuntu?

⁶ Bituma ubaririkiriza ibigabitanyo vyanje, Ugasesangura icaha canje,

⁷ Kand’ uzi ko ntarikw igicumuro, Kw ata woshobora kundokora ngw ankūre mu kuboko kwawe?

⁸ Intoke zawe ni zo zambumvye, Ziranteranya uko ndi wese: yamara non’ uranyishe.

⁹ Ibuka, ndakwinginze, yuko wambumvye nk’ibumba: None se ugira unsubize mu mukungugu?

¹⁰ Mbega ntiwansutse nk’amata, Ukamvuza nk’urubu?

¹¹ Wanyambitse urukoba n’ inyama, Undandikanisha amagufa n’ imitsi.

¹² Wampaye ubugingo, ungirira imbabazi; Kungendera kwawe ni kwo kwanzigamiye umutima.

¹³ Yamara rero wamye uhishije ibindi mu mutima wawe, Kand’ ivyo wagabiye nzi kw ar’ ibi:

¹⁴ Iyo nkoze icaha unshinga ijisho, Kandi ntuzomparira ivyo nagabitanije.

¹⁵ Namba narakoze ibibi, mbonye ibara; Kandi namba nd’ umugororotsi, na ho nyene sinkivyutsa umutwe: Nuzuyemw’ ibitētērwa, nkitegereza umubabaro wanje.

¹⁶ Kandi n’iyo novyutsa umutwe, woca umpīga nk’intambge; Maz’ ukongera kunyiyereka ur’ akūmiza.

¹⁷ Usubira kuzana ivyabona vyawe kunyagiriza ukundi gusha; Ukangwizak’ ubushangashirwe bgawe; Ibintera binyungikanako.

¹⁸ None se n’iki catumye unkūra mu nda ya mama? Mba naracikanye, ntihagire ūnkubita ijisho.

¹⁹ Mba narabaye nk’ūtigeze kubaho, Bakanterurira mu mva nkiva mu nda ya mama.

²⁰ Mbeg’ imisi yanje si mike? Ntabara undeke, Umpumekere, kugira ngo nduhuke gatoya,

²¹ Ntaraja aho ntazogaruka ukundi, Mu gihugu c’umwiza n’ic’ igitūtu c’urupfu,

²² Igihugu c’umwiza w’umuzitanya, nk’uk’ umuzimagiza nyene umeze, Ic’ igitūtu c’urupfu, ahatagira umutekano, Ah’ umuco umeze nk’umwiza.