Yesaya 7 - Bibliya Yera 1951 1967 (Burundi)

Ahazi atewe n’abandi bami Yesaya aja kumuremesha

¹ Ku ngoma ya Ahazi mwene Yotamu, Yotamu wa Uziya, umwami w’i Buyuda, Rezini umwami w’i Siriya na Peka mwene Remaliya umwami w’Abisirayeli badūga i Yerusalemu kuhatera, maze harabananira.

² Babūrira umuryango wa Dawidi, bat’ Abasiriya bifatanije n’Abefurayimu. Maz’ umutima wa Ahazi urahungabana, bo n’imitima y’ abantu biwe, nk’ukw ibiti vyo mu kibira bihungabanywa n’umuyaga.

³ Maz’ Uhoraho abarira Yesaya, ati Sohoka non’ ubu, uje gusanganira Ahazi, wewe na Sheyari‐yashubu umwana wawe, murahūrira ah’ umugende wo ku kidengeri co haruguru ugarukira, ku nzira yo ku kibuga c’umumesuzi;

⁴ maz’ umubarire, uti Witonde, ureme; woye gutinya, kandi nturandurwe umutima n’ivyo bishirīra bibiri bifumba, bo n’uburake bg’inkazi bga Rezini n’Abasiriya n’ubga mwene Remaliya.

⁵ Abasiriya n’Abefurayimu na mwene Remaliya ko baguhigiye imihigo, bakavuga,

⁶ bati Ni muze tudūge dutere i Buyuda, tubakūre imitima, tuhace icuho, twiyimikire umwami hagati muri co, mwene Tabeli:

⁷ ut’ Ico ni co gitumye Uhoraho Imana agize, ngw Iyo migabo ntizohama kandi ntizoshika.

⁸ Kukw iremezo ry’i Siriya ari Damasiko, kand’ iremezo ry’i Damasiko ari Rezini; kand’ imyaka mirongwitandatu n’itanu itarashira Abefurayimu bazovungwavungwa, ntibabe bakiba ihanga;

⁹ kand’ iremezo ry’Abefurayimu ni Samariya, kand’ iremezo ry’i Samariya ni mwene Remaliya. Ariko ni mwanka kwizera, n’ukuri ntimuzoshikama.

Ahazi yanka kuvyemera, Yesaya amubūrira ibizoba

¹⁰ Uhoraho yongera kubarira Ahazi,

¹¹ ati Nyaka ikimenyamenya, jewe Uhoraho Imana yawe, ar’ ic’ i kuzimu cank’ ar’ ico hejuru mw ijuru.

¹² Ariko Ahazi arishura, ati Sinocaka, kandi sinogerageza Uhoraho.

¹³ Yesaya aramwishura, ati Ni mwumve none rero, wa muryango wa Dawidi; ko kibaye icoroshe kuri mwebge kugora abantu, none mugomba kugora n’Imana yanje na yo?

¹⁴ Ni co gitumye Uhoraho ubgiwe ari we agira abīhēre ikimenyamenya: Rāba, inkumi izosama inda, ivyare umwana w’umuhungu, izomwita Imanuweli.

¹⁵ Urubu n’ubūki ni vyo bizomutunga, amaze kumenya ubgenge bgo kwanka ibibi agakunda ivyiza.

¹⁶ Kuk’ uwo mwana ataramenya ubgenge bgo kwanka ibibi no gukunda ivyiza, igihugu c’abo bami bompi wagiriye ubgoba kizocika amatongo.

¹⁷ Uhoraho azogutēza imisi mibi, wewe n’abantu bawe n’inzu ya so, imisi itigeze kubaho, uhereye umusi Abefurayimu bātandukanye n’Abayuda: ni kwo guterwa n’ umwami w’i Ashuri.

¹⁸ Kur’ uwo musi Uhoraho azohamagaza uruhwa isāzi ziri ku mpera z’inzūzi zo muri Egiputa, n’inzuki zo mu gihugu c’i Ashuri.

¹⁹ Bizoza, vyose bizokwarara mu biyaya bisigaye ar’ imisaka, no mu masenga yo mu bitandara, no ku mahwa yose, no ku bgatsi hose.

²⁰ Kur’ uwo musi Uhoraho azomwa ku mutwe n’ubgoya bgo ku mubiri, abimweshe urupfuhe rutiwe ku mahera, ruba hakurya y’uruzi, ni rwo mwami w’i Ashuri, mbere ruzonatōtōra n’ubganwa.

²¹ Kandi kur’ uwo musi umuntu azoragira agaka k’iriza n’intama zibiri;

²² maze kukw amata bikamwa azoba ari menshi, azosamwa n’ urubu: kuk’ urubu n’ubūki bizoba ari vyo bisama umuntu wese azoba asigaye hagati mu gihugu.

²³ Kandi kur’ uwo musi ahantu hose hāba imizabibu igihumbi yagurwa amahera yitwa shekeli igihumbi, hazoba ah’ imikere n’amahwa.

²⁴ Hazoshikay’ abitwaje umuheto n’imyampi, kukw igihugu cose kizoba ar’ imikere n’amahwa.

²⁵ Kandi n’imisozi yose yahora irimishwa isuka, ntuzohēgēra kubgo gutinya imikere n’amahwa, ariko hazoba aho kurishwa umwagambo n’inka, no guhonyangwa n’intama.