Yesaya 57 - Bibliya Yera 1951 1967 (Burundi)

¹ Umugororotsi arikw araherengetera, kandi nta wubishirak’ umutima; abubaha Imana bariko barakūrwaho, kandi nta wubibabaye. Umugororotsi akūwe mu vyago,

² ashitse mu mahoro; umuntu wese muri bo yagendera mu nzira igororotse ashitse mu buruhukiro bgiwe.

³ Ni mwīgire hino, mwa bana b’umurozikazi, mwa ruvyaro rw’ umusambanyi n’umusambanyikazi.

⁴ Uwo mutwenga akāmuhinya ni nde? Uwo muha ibinoko ni nde, mukamucira inyeri? Mbega ntimur’ abana b’ibicumuro, uruvyaro rw’ibinyoma,

⁵ abītera gushuha muri mu biti vy’ imyeloni no musi y’igiti cose gitotahaye, mukicira abana mu myonga, no mu bihoro vyo mu bitandara?

⁶ Mu nguru ziba mu mwonga ni ho har’ umugabane wawe; izo nyene ni zo mugabane wawe; izo ni zo wūhiye ishikanwa ry’ibiturire, ukaziterekēra. Mbeg’ ivyo novyiyumanganya?

⁷ Ku musozi muremure ni ho wubatse uburiri bgawe; kandi ni ho wadūga, ukaja gutanga ibimazi.

⁸ Kandi washize icibutso cawe inyuma y’inzugi n’ibishimaryango; kuko wampemukiye, ukiyambikira abandi ubusa; wūrira ku buriri bgawe, urabgagura, wemeranya na bo impēra; wanezererewe kuryamana na bo, ubona ubgambure bgabo.

⁹ Washengereye umwami ujanye amavuta atāmirana n’imbazi wagwijije; utuma intumwa zawe kure, urīmanura, urinda ushika i kuzimu.

¹⁰ Wagenze urugendo runini rurakunaniza, yamara ntiwisubiramwo, uti Nta kimazi; urahava uriyungunganya, ni co catumye utihebura.

¹¹ Mbeg’ uwo watinya ukamugirira ubgoba ni nde, bigatuma ubesha, ntunyibuke, ng’ ubishirek’ umutima? Mbega simmaze igihe kinini ncereje, si co catumye utanyubaha?

¹² Nzoserura ukugororoka kwawe n’ibikorwa vyawe; ariko ntibizogira ico bigufasha.

¹³ Ni watakamba, vya bigirwamana warundanije birakurokora! Yamara rer’ umuyaga uzobitwara, impwemu zihumetswe gusa zibikūreho vyose: arik’ ūnyizigira ni we azoganza igihugu, kandi ni we azoragwa umusozi wanje wera.

¹⁴ Kand’ azovuga, ati Ni muharure, ni muharure, mutunganye inzira, mukūre ibitsitaza mu nzira y’abantu banje.

Imana ibana n’ūfise umutima umenetse

¹⁵ Kuk’ ukw ari kw Imwe iri hejuru isumba vyose igize, iba ahatazoshira, izina ryayo n’Uwera; iti Mba hejuru ahantu hēra, kandi mbana n’ūfise umutima umenetse wicisha bugufi, kugira ngo mpēmbūre imitima y’abicisha bugufi, mpēmbūre n’abafise imitima imenetse.

¹⁶ Kuko ntotongana ibihe vyose, kandi sinokwama ndatse: kukw imitima n’ubugingo naremye vyodendebukirirwa imbere yanje.

¹⁷ Icaha ciwe c’igono ni co candakije ndamukubita, ndihisha, ndaraka: yamar’ ashishikara gukikamira mu nzira ikundwa n’umutima wiwe.

¹⁸ Inzira ziwe narazibonye, kandi nzomukiza; nzomurōngōra, nzoheruka kumwirurana n’abāmuborogera.

¹⁹ Ni jewe ndema ishimwe riva mu minwa. Amahoro, amahoro abe k’ūri kure no k’ūri hafi, nanje nzomukiza, ni k’Uhoraho agize.

²⁰ Arikw abanyakibi bameze nk’ikiyaga gisuriranya; kuko kidashobora guhwekera, kand’ amazi yaco azīkurura isūri n’imyanda.

²¹ Nta mahoro ku banyakibi, ni kw Imana yanje igize.