Yesaya 49 - Bibliya Yera 1951 1967 (Burundi)

Umushumba w’Uhoraho, ni we muco w’amahanga

¹ Ni munyumve, yemwe ababa ku kiyaga; namwe mahanga ya kure, tega amatwi. Uhoraho yampamagaye ntaravuka; nkiri mu nda ya mama yamvuze izina:

² akanwa kanje yakagize nk’inkota ikarishe, ampisha mu gitūtu c’ukuboko kwiwe; kandi yampinduye umwampi usennye, mu mutana wiwe ni ho anzigamira rwose.

³ Kandi yarambariye, ati Ni wewe musavyi wanje, Isirayeli, uwo nzoherwamw’ icubahiro.

⁴ Ariko ndavuga, nti Naruhijwe n’ubusa, inkomezi zanje zapfuye ubusa, nazikoresheje ibitagira ikimazi: yamara rer’ urubanza rwanje ruseguwe n’Uhoraho, kand’ Imana yanje ni yo izompēra.

⁵ None rero, uku ni k’Uhoraho agize, ni we yambumvye nkiri mu nda ngo mbe umusavyi wiwe, ngo ndamugarukanire Yakobo, Abisirayeli bakoranirizwe kuri we; kuko nd’ umwubahwa mu nyonga z’Uhoraho, kand’ Imana yanje yambereye inkomezi;

⁶ aravuga, ati Kuba umushumba wanje, ugashira hejuru imiryango ya Yakobo, ukagarukana abarokotse b’Abisirayeli, ivyo ntibihāgije: ariko kandi ndagushizeho ng’ ube umuco wākira amahanga, kugira ngo n’ abo ku mpera y’isi ubashikirize agakiza kanje.

⁷ Uku ni k’Uhoraho agize, Umucunguzi wa Isirayeli, Uwera wiwe, abgira umwe abantu bakēngēra, uwo ihanga ryanka urunuka, umushumba w’ abaganza, at’ Abami bazobirāba bahaguruke; bo n’abaganwa, bakome amashi; kubg’ Uhoraho umwizigirwa, ni we Wera wa Isirayeli yagutoranije.

⁸ Uku ni k’Uhoraho agize, ati Mu gihe co kwemererwamwo ndakwishuye, no ku musi wo gukirizwako ndagutabaye; kandi nzogukiza, ngushireho ube isezerano ry’abantu, kugira ng’ usibure igihugu, utume basubizwa mw ishamvu yabo yabaye imisaka.

⁹ Kand’ ubgire imbohe, uti Ni musohoke; n’ abari mu mwiza, uti Ni museruke ahabona. Bazogenda barisha umwagambo ku mayira, kand’ ahār’ uruharabuga hejuru ku misozi hazobabera ivyanya.

¹⁰ Ntibazokwicwa n’inzara canke n’inyota, kand’ indugumba ntizobahundagaza cank’ izuba: kuk’ uwabagiriye ikigongwe azobaja imbere, akabashikana no ku masōko y’amazi.

¹¹ Imisozi yanje yose nzoyihindura inzira, n’amarango yanje nzoyashira hejuru.

¹² Ehe bamwe bazova kure: eh’ abandi bazova i burārūko n’i burengerazuba, kand’ abandi bazova mu gihugu c’i Sinimu.

¹³ Ririmba, mwa majuru; nezerwa wa si we; turika muririmbe, mwa misozi miremire, kuk’ Uhoraho amaze umubabaro abantu biwe, kand’ atewe akagongwe n’abāhahajwe biwe.

¹⁴ Ariko Siyoni ho haravuga, hat’ Uhoraho yarampevye, Umwami Imana yaranyibagiye.

¹⁵ Mbeg’ umugore yokwibagira umwana akiri kw ibere, ngo yoye kugirira akagongwe ubura bgiwe? Ni koko, abo boshobora kwibagira, ariko jeho sinoshobora kukwibagira.

¹⁶ Ehe ngushushanije mu biganza vyanje; inzitiro zawe ndazihozakw amaso.

¹⁷ Abana bawe baza bihuta; abāguhoneje n’abāguhinduye amatongo bazokuvamwo bagende.

¹⁸ Unamura amaso urābe impande zose: ba bandi bose barakoranye, bariko baraza kuri wewe. Ndahiye ukubaho kwanje, ni k’Uhoraho agize, uzobīsakara nk’uwambaye utugenegene, uzobakenyera use n’umugeni.

¹⁹ Kukw amatongo yawe n’ imisaka yawe n’igihugu cawe cāgeshejwe, n’ukuri noneho hazokwagira abazohaba, kand’ abāri baragutsontsomeye bazoba kure.

²⁰ Abana wari wānyazwe bazovugira mu matwi yawe, bat’ Aha hantu haratwagiye: segenya turonke aho tuba.

²¹ Maz’ uzokwibaza mu mutima, uti Mbeg’ aba nabavyariwe na nde? Ko nari naranyazwe abana banje, nkaba nd’ imbura n’igicibga n’inyererezi! Ko nari nsigaye nd’ inyakamwe, aba bo bamye hehe?

²² Uku ni k’Umwami Uhoraho agize, ati Nzorāmvurira amahanga ukuboko kwanje, nshingire amoko ibendera yanje; nuko bazozana abahungu bawe babakikiye mu gikiriza, n’abakobga bawe babateruye ku bitugu.

²³ Kand’ abami bazokubera ba se babakurerera, n’abamikazi babo bazokubera ba nyina babakwonkereza; bazokwikubita imbere bubamye hasi, barigate umukungugu wo ku birenge vyawe; nawe uzomenya ko nd’ Uhoraho, kand’ abanyiteze ntibazomāramāra.

²⁴ Mbeg’ abahizi bonyagwa iminyago, cank’ abagororotsi bajanywekw inyagano borokorwa?

²⁵ Arik’ uku ni k’Uhoraho agize, at’ Abāfashwe mpiri n’abahizi, na bo bazobanyagwa, kand’ iminyago y’abantu b’agaterabgoba izorokorwa: kukw ari jewe nzokurwanira, nkarwanya ūkurwanya, kandi nzokiza abana bawe.

²⁶ Kand’ abaguhahaza nzobagaburira inyama zabo ubgabo, bazoborerwa ayabo maraso nk’ūborewe vino novu; kand’ abantu bose bazomenya ko jewe Uhoraho nd’ Umukiza wawe, n’Umucunguzi wawe, Inyenkomezi ya Yakobo.