Yesaya 34 - Bibliya Yera 1951 1967 (Burundi)

Amateka azocirwa amahanga, no kugesera kwa Edomu

¹ Mwa mahanga, ni mwīgire hafi kugira ngo mwumve; mutege amatwi mwa moko mwe; isi ni yumve, bo n’ibiyuzuye; n’ivu n’ibirimeramwo.

² Kuk’ Uhoraho ashangashiriwe amahanga yose, akaba arakiye ingabo zayo zose, arabagesheje rwose, arabagabuye ngo bicwe.

³ Abishwe babo bazoshiburirwa hirya, umunuko w’imivyimba yabo uzoduhuka, imisozi izojegeshwa n’ ibitenga vy’amaraso yabo.

⁴ Ingabo z’inyenyeri zo kw ijuru zose zizokamangana, kand’ amajuru azozingirwa hamwe nk’umuzingo w’igitabo, n’izo ngabo zayo zose zizokabirana, nk’ukw akaragarira kava ku muzabibu, kandi nk’ ukw akaragarira kava ku musukoni.

⁵ Kukw inkota yanje inyoye mw ijuru igahāga; non’ igira igwe ku Banyedomu, no ku bantu navumye, ngw ibahane.

⁶ Inkota y’Uhoraho yuzuyekw amaraso, ihāze ibinure, amaraso y’imyagazi y’intama n’impene, n’ibinure vyo ku mafyigo y’amasuguru y’intama; kuk’ Uhoraho yifitiye ikimazi i Bosira, n’ukugeseza gukomeye mu gihugu ca Edomu.

⁷ Imbogo zizogwa hamwe na vyo, amashūri hamwe n’amapfizi; igihugu cabo kizoborerwa amaraso, n’ivu ry’i wabo rizohāga ibinure.

⁸ Kuk’ uwo musi ari wo wo guhōra kw’ Uhoraho, n’umwaka wo kubasubiriza mu nkōko ku vyo bāgiriye Siyoni.

⁹ Imigezi yaho izohinduka kaburimbi, n’ivu ryaho rizohinduka amazuku; kand’ igihugu caho kizohinduka kaburimbi yaka.

¹⁰ Ntikizozimwa ku murango no mw ijoro, umwotsi waco uzopfunduka ibihe bidashira; kizohora ar’ amatongo uk’ urunganwe rwabo ruzogenda rukurikirana: kandi nta wuzogicamwo gushitsa ibihe bitazoshira.

¹¹ Arikw inkongori n’ibinyogoto ni vyo bizocegukira, ibihuna n’ibikona na vyo bizokibamwo; azohageresha umugozi, ni wo bitongozi, na karisho, ni ko gusigara ubusa.

¹² Bazohamagara abashingantahe b’ico gihugu ngo bimike umwami, ariko nta bazoba bariho; kand’ abaganwa baho bose bazoba bacitse ubusa.

¹³ Ingoro zaho zizomeramw’ amahwa, n’ibihome vyaho bizomeramw’ ibisuru n’ibitovu; hazoba ubgishinzo bg’ imbgebge n’inama y’ibisīga vyitwa imbuni.

¹⁴ Ibikōko vyo mu bugaragwa bizohūrirayo n’amabingira, n’igisigo c’impfizi y’impene kizohamagarana na mugenzi waco, mbere n’ikinyejoro kizohagerēra, kihibonere uburuhukiro.

¹⁵ Ni ho imvuvyi izokwigirira umwimba, ihatere amagi, ihamenagurire, ikumakumire musi y’igitūtu cayo: mber’ aho ni ho ibinyakabaka bizokoranira, ikigore cose kiri kumwe n’ikigabo caco.

¹⁶ Ni murondere mu gitabo c’Uhoraho musome: nta na kimwe co mur’ ivyo kizobura, nta kigore kizobura ikigabo caco, kukw akanwa kiwe ari ko kabigeze, kand’ impwemu ziwe akaba ari zo zibikoranije.

¹⁷ Yabipfindiye ubupfindo, kand’ ukuboko kwiwe ni kwo kwahabigaburiye n’umugozi; bizohegukira gushitsa ibihe vyose, bihabe ukw ibihe bihaye ibindi.