Yesaya 23 - Bibliya Yera 1951 1967 (Burundi)

Imbūri yo kuri Tiro

¹ Imbūri yo kuri Tiro. Boroga, yemwe māto y’i Tarushishi: kukw i Tiro hageseye, bigatuma ata mazu akiriho, ata n’aho gutaha; izo nkuru bazibgiwe zivuye mu gihugu c’i Kupuro.

² Ni mujorerwe, mwa baba mu kizinga co mu kiyaga, mwa badandaza b’i Sidoni, mwahora muca mu kiyaga,

³ ku mazi menshi; inyungu zanyu zar’ impeke zivuye kuri Shihori, n’ivyimburwa vyo kuri Nili; mwabaye abadandaza b’amahanga.

⁴ Ewe Sidoni māramāra; kukw ikiyaga kivuze, igihome co ku kiyaga kiravuze, kiti Sinaramutswe, sinavyaye, kandi sinonkeje abahungu, sinareze n’abakobga.

⁵ Inkuru ni yashika muri Egiputa bazobabazwa cane n’izo nkuru zivuye i Tiro.

⁶ Ni mujabuke muje i Tarushishi; muboroge, mwa baba mu kizinga co mu kiyaga.

⁷ Mbeg’ iki ni ca gisagara canyu c’umunezero, camyeh’ uhereye imisi ya kera cane, cagendesha amaguru kure kugerērayo?

⁸ Ni nde yagabiye kugirira Tiro ivyo, kand’ ar’ igisagara cambika ibitsibo, abadandaza baho bakaba abahambaye, n’abahanjo baho bakaba ar’ abanyacubahiro mw isi?

⁹ Uhoraho Nyen’ ingabo ni we yabigabiye, kugira ngw akengereze ubgibone bg’ icubahiro cose, kandi ngw agayishe abanyacubahiro bose bo mw isi.

¹⁰ Sendanisha mu gihugu cawe nk’uko Nili rusendanisha, wa mukobga w’i Tarushishi, kukw ata kikikubujije.

¹¹ Yabānguye ukuboko hejuru y’ikiyaga, anyiganyiza ibihugu vy’abami; Uhoraho agera ivy’ i Kanani ngo bakomvomvore ibihome vyaho.

¹² Aravuga, ati Ntugisubira kunezerwa, wa nkumi y’i Sidoni yononekaye; va hasi ujabuke uje i Kupuro, kandi n’iyo na ho ntuzoharonka uburuhukiro.

¹³ Ni murābe igihugu c’Abakaludaya: ubgo bgoko ntibukiriho; Abashuri bahahinduye ah’ ibikōko vyo mu bugaragwa. Bashinga ivyo būririrako, basambura ingoro zaho; bahaca amatongo.

¹⁴ Boroga, mwa māto y’i Tarushishi: kukw igihome canyu gisanganguwe.

¹⁵ Maze kur’ uwo musi i Tiro hazokwibagirana imyaka mirongwirindwi, ihwanye n’imisi umwami umwe yomara ku ngoma; iyo myaka mirongwirindwi ni yashira, ibizoba kuri Tiro bizomera nk’ivyo mu kavyino ka maraya.

¹⁶ Abira inanga ugendagende mu gisagara, wewe maraya wari waribagiranye; ucurarange neza, uvyine utuvyino twinshi kugira ngo wibukwe.

¹⁷ Nukw iyo myaka mirongwirindwi ni yashira Uhoraho azogendera i Tiro, hasubire ku mpēra y’ubumaraya bgaho, hasambane n’ibihugu vy’ abami bose bo mw isi.

¹⁸ Inyungu n’impēra vyaho bizoba ivyera k’Uhoraho; ntibizobīkwa kandi ntibizoshirwa ukwavyo, kukw inyungu zaho zizoba iz’ abahora imbere y’Uhoraho, kugira ngo barye bahāge, baronke n’imyambaro myiza.