Yesaya 13 - Bibliya Yera 1951 1967 (Burundi)

Imbūri yo kuri Babuloni

¹ Imbūri yo kuri Babuloni, iyo Yesaya mwene Amosi yeretswe.

² Ni mushinge ibendera ku musozi muremure w’uruharabuga, shira ijwi hejuru mubahamagare, mubākure, kugira ngo bace mu birimba vy’abaganwa.

³ Nahaye icagezwe abo nirobanuriye, mbere nahamagaye abahizi banje, bo n’abanyirahira bampayagiza, kugira ngo bashitse ivyo uburake bganje bgāgabiye.

⁴ Umve ukwo guhinda kw’igugu ku musozi, nk’ukw’ igitero gikomeye! Umve urwo rwamo rw’amahanga y’abami akoraniye hamwe! Uhoraho Nyen’ ingabo arikw arakoranya ingabo azitegurira intambara.

⁵ Ziva mu gihugu ca kure, ku mpera y’ijuru; Uhoraho azananye n’ibirwanishwa vy’ugushangashirwa kwiwe, guhonnya igihugu cose.

⁶ Ni muboroge, kuk’ umusi w’Uhoraho uri hafi; uzoza ar’ umusi wo guhonnya uvuye kw Īshobora vyose.

⁷ Ivyo bizotuma amaboko yose adendebuka, n’umutima w’umuntu wese ushonga.

⁸ Bazokwiheba; umubabaro n’uburibge bibafate; bazobabara nk’umugore ari ku nda; bazorābana bumirwe; kandi mu maso habo hazohindurira nk’umuriro.

⁹ Eh’ umusi w’Uhoraho uraje, ni ruburakigongwe uzananye ishavu n’uburake bg’inkazi; ng’uhindure igihugu imisaka, ugeseze abanyavyaha baho ngo bagishiremwo.

¹⁰ Kukw inyenyeri zo kw ijuru n’uburundo bgazo bitazokwaka, izuba rizocura umwiza rikirasa, n’ukwezi ntikuzobonesha umuco wakwo.

¹¹ Kandi nzohana ab’ isi kubg’ ibibi vyabo, n’abanyakibi kubg’ ukugabitanya kwabo; nzomara amanyama abibone, n’ ukwishira hejuru kw’abantu b’ agaterabgoba nzogusubiza hasi.

¹² Nzotuvya abantu barushe izahabu nziza‐nziza kuba imparūrwa, mber’ abantu bazoba imparūrwa kurusha izahabu ziramuye zivuye muri Ofiru.

¹³ Ni co kizotuma ntigitisha amajuru, kand’ isi na yo izonyiganyiga ive ahayo, kubg’ uburake bganje Uhoraho Nyen’ ingabo, ku musi w’uburake bganje bg’inkazi.

¹⁴ Maz’ umuntu wese azosubira mu b’i wabo, yiruka nk’ingeregere ihīgwa, canke nk’intama itagira ūyiragiye, umuntu wese ahungire mu gihugu c’i wabo.

¹⁵ Uwo bazobona wese bazomusogota, kand’ ūzofatwa mpiri wese bazomwicisha inkota.

¹⁶ Utuyoya twabo na two bazotubamenagurira imbere; amazu yabo azosahurwa, kand’ abagore babo bazobenda ku kagōbēro.

¹⁷ Rāba nzovyutsa Abamedi ngo babatere; ntibazorāba ifeza, kandi naho zoba izahabu ntibazozibabara.

¹⁸ Imiheto yabo izokenyagura imisore, kandi ntibazogirira akagongwe inda ikiri mu nda, n’ijisho ryabo ntirizobabarira abana bato.

¹⁹ Kandi Babuloni, icubahiro c’amahanga y’abami, ubgiza bg’ubgibone bg’Abakaludaya, hazomera nk’uko vyabaye hamwe Imana yakomvomvora i Sodomu n’i Gomora.

²⁰ Ntihazokwigera hasubira kweyerwa ngo hubakwe, kand’ uk’ urunganwe rwabo ruzogenda rukurikirana, nta wuzosubira kuhaba. Umwarabo ntazohashinga ihema, kandi n’abungere ntibazohavyagiza imikuku yabo.

²¹ Arikw ibikōko vyo mu bugaragwa ni vyo bizohagandagaza: amazu yabo azokwuzura ibihuna; ibisīga vyitwa imbuni na vyo bizohaba, n’ibisigo vy’amapfizi y’impene bizohatēganira.

²² Amabingira azotontomera mu bihome vyabo, n’imbgebge mu ngoro z’igikundiro. Igihe caho kigira gishike, kand’ imisi ir’ imbere yaho ntizokwongerwako.