Yesaya 12 - Bibliya Yera 1951 1967 (Burundi)

Gushimira Uhoraho imbabazi ziwe

¹ Kur’ uwo musi uzovuga, ut’ Uhoraho, ndagukengurukiye, kuko naho wandakiye, uburake bgawe burahwamye, nawe uramporahoje.

² Ehe rāba, Imana ni yo gakiza kanje; nzokwama nizigira, sintinye: kuk’ UHORAHO YEHOVA ari we nkomezi zanje n’indirimbo yanje, kandi yacitse agakiza kanje.

³ Ni co gituma muzovomana umunezero mu mariba y’agakiza.

⁴ Kandi kur’ uwo musi muzovuga, muti Ni mukengurukire Uhoraho, mwambaze izina ryiwe, mwamamaze ibikorwa vyiwe mu mahanga, mumenyekanishe izina ryiwe ko rishizwe hejuru.

⁵ Muririmbire Uhoraho, kuko yakoze ivyiza bihambaye: ivyo ni vyamamare mw isi yose.

⁶ Semerera, uvuge cane, yewe uba i Siyoni, kuk’ Uwera w’Abisirayeli, ari hagati muri mwebge, ahambaye.