Yeremiya 51 - Bibliya Yera 1951 1967 (Burundi)

Izindi mbūri zo kuri Babuloni

¹ Uku ni k’Uhoraho agize, at’ Ehe nzovyutsa igihuhuta c’umuyaga kigeseza, ngitēze i Babuloni n’ababa i Lebu‐kamayi.

² Kandi nzorungika i Babuloni abagosozi bazohagosora, kand’ igihugu caho bazogicacura, gisēswe: kuko ku musi w’ivyago bazohakikiza impande zose.

³ Umurashi ntaz’ aruhe afora umuheto wiwe, n’uwambaye ivyuma bimukīngira ntaz’ aruhe yirwanira. Ntimuzigurize imisore yaho; mutotore rwose ingabo zaho zose.

⁴ Bazokwicwa bahindikirane aho nyene i Bukaludaya, batobekeranirizwe mu nzira zaho.

⁵ Kukw Abisirayeli atar’ intābga, cank’ Abayuda, ku Mana yabo, ni we Uhoraho Nyen’ ingabo, nah’ igihugu cabo cuzuye ivyo bācumuye k’Uwera w’Abisirayeli.

⁶ Ni muhunge muve hagati muri Babuloni, umuntu wese yunzūre amagara yiwe; ntimuranduranwe na ho, muzira ibigabitanyo vyaho, kukw ar’ igihe c’uguhōra kw’Uhoraho, agira ahasubirize mu nkōko.

⁷ Babuloni cār’ igikombe c’izahabu mu kuboko kw’Uhoraho, cāboreje isi yose: amahanga yanyoye kuri vino yaco, ni co catumye azimira ubgenge.

⁸ I Babuloni harakomvomvowe giturumbuka, harageseye: muhaborogere; mwābīre umuti wo kuvūra uburibge bgaho, namba kumbure hokira.

⁹ Twagerageje kuvūra Babuloni, ariko ntihakize: reka tuhahebe, umuntu wese ni yisubirire mu gihugu cabo: kukw iteka haciriweko rishitse no kw ijuru, rigiye hejuru gushitsa no mu bicu.

¹⁰ Uhoraho yerekanye ukugororoka kwacu; enda ni muze twamamaze i Siyoni igikorwa c’Uhoraho Imana yacu.

¹¹ Mukarishe imyampi, mubangirize inkinzo: Uhoraho yagayambije imitima y’abami b’Abamedi; kukw imigabo yagīriye i Babuloni n’ukuhageseza: kukw ar’ uguhōra kw’Uhoraho, uguhōra yahōye urusengero rwiwe.

¹² Mushinge ibendera mwerekeye inzitiro z’i Babuloni, mugwize abashibamyi, mushireh’ abateramyi, mugere abaja kuhaca ibico: kuk’ Uhoraho yahagīriye imigabo, agashitsa ivyo yavuze ku baba i Babuloni.

¹³ Ewe uba ku materaniro y’amazi menshi, ukaba mu bihinda vy’ubutunzi, umuhero wawe urashitse, ipfa ryo kudahāga kwawe riraherewe.

¹⁴ Uhoraho Nyen’ ingabo yirahiye ubgiwe, ati N’ukuri i wawe nzohuzuza abansi bagutere nk’inzige: bazokureremesherezakw akarūru.

¹⁵ Rurema ni yo yaremesheje isi ubushobozi bgayo, ikayihamangirisha ubgenge bgayo, ikagaranzuza ijuru ukumenya kwayo:

¹⁶ iy’ ishize ijwi hejuru haba gusūma kw’ amazi yo hejuru; irandisha ibipfungu bikava ku mpera y’isi; iremera imvura imiravyo, kand’ isokorora umuyaga mu bubīko bgayo.

¹⁷ Non’ umuntu wese kw ar’ ikiyingiyingi ata bgenge agira! Umucuzi w’izahabu wese azotēterezwa n’igishushanyo ciwe yasaruye, kukw igishushanyo ciwe yavugutiye mu nkero ar’ ic’ ibinyoma, kandi nta mpwemu ziba muri vyo.

¹⁸ N’ivy’ ubusa gusa, n’igikorwa c’uruhendo; igihe cabo co kūzirwa bizoherengetezwa.

¹⁹ Arik’ umugabane wa Yakobo we si kw ameze, kukw ari we Muremyi wa vyose; kandi Isirayeli ni we muryango yagize ishamvu yiwe: Uhoraho Nyen’ ingabo ni ryo zina ryiwe.

²⁰ Ni wewe nyundo yanje, n’ ibirwanishwa vyanje: ni wewe nzomenaguza amahanga; ni wewe nzogeseresha abami b’ibihugu;

²¹ ni wewe nzomenaguza ifarasi n’ūyigenderako;

²² ni wewe nzomenaguza umukogote n’ūwugenderamwo; ni wewe nzomenaguza umugabo n’umugore; ni wewe nzomenaguza umutāma n’umusore; ni wewe nzomenaguza umuhungu n’umukobga;

²³ ni wewe nzomenaguza umwungere n’umukuku wiwe; ni wewe nzomenaguza umurimyi n’inka arimisha; ni wewe nzomenaguza abagabisha n’abaganza.

²⁴ Kand’ ab’ i Babuloni, bo n’ababa i Bukaludaya bose, nzobasubiriza mu nkōko ibibi vyabo vyose bākoreye i Siyoni mubona, ni jewe Uhoraho mbivuze.

²⁵ Ehe tuzohigūra twe nawe, wa musozi ugeseza we, ni jewe Uhoraho mbivuze, wagesheje isi yose: nzokubangurirak’ ukuboko kwanje, ngucuranguze ngukūre ku rutare, nguhindure umusozi uhiye inkomvorera.

²⁶ Ntibazoba bakigukūrako n’ibuye ryo kugumya imfuruka, cank’ ibuye ry’itanguriro; arik’ uzoba ibitongozi gushitsa ibihe bidashira, ni jewe Uhoraho mbivuze.

²⁷ Mushinge ibendera mu gihugu, muvuze inzamba zitabaza mu mahanga, mwiteguze amahanga arwane na ho, mukoranirize hamwe abami b’i Ararati n’i Mini n’i Ashikenazi kuharwanya; mushinge umugabisha wo kuhagomorera; mudūze amafarasi nk’inzige zishinze urwoya.

²⁸ Mwiteguze amahanga kurwana na ho, bo n’abami b’i Bumedi, n’abagabisha baho, n’ abaganza baho bose, n’ibihugu vyose biganzwa na ho.

²⁹ Isi ihinze agashitsi, irasambagirika: kukw imigabo Uhoraho yagīriye i Babuloni igihamye, ngw ahindure igihugu c’i Babuloni ibitongozi, ata wukihaba.

³⁰ Abahizi b’i Babuloni bahevye kurwana, bigungiye mu bihome vyabo, ubutōre bgabo buraheze, bacitse bga bagore: amazu yaho yanzwe umuriro; ibihindizo vyaho biravunaguritse.

³¹ Intabaza imwe izohūra n’iyindi, n’intumwa imwe ihūre n’iyindi, ngo bamenyeshe umwami w’i Babuloni yukw igisagara ciwe gitsinzwe impande zose:

³² kandi ko bazitiye ivyambu giturumbuka, baturiye n’ urufunzo, kandi kw abahizi bacitse ivutu.

³³ Kuk’ ukw ari k’Uhoraho Nyen’ ingabo agize, ni we Mana y’Abisirayeli, at’ Umukobga ari we Babuloni ameze nk’imbuga iy’ ikubita rigeze; hasigaye igihe gito igihe co kwimburwa kikahashikako.

³⁴ Nebukadineza umwami w’i Babuloni yaramfyonderanije, arandotsa, angira urwavya rusigaye ubusa, yaranyongobeje nk’igisato c’amahēro, yagemereje inda yiwe ivyar’ ivyiza vyanje; yaranyirukanye.

³⁵ Ivyo nagiriwe nabi bikaba no ku mubiri wanje ni bisubire kuri Babuloni, ni k’ ūzoba ar’ i Siyoni azovuga; amaraso yanje arakora ababa i Bukaludaya, ni ko Yerusalemu hazovuga.

³⁶ None rero, uku ni k’ Uhoraho agize, at’ Ehe nzokwitsa mu manza zawe, ndaguhōre; nzokamya ikiyaga caho, n’isōko yaho nzoyimīmūra.

³⁷ Kand’ i Babuloni hazocika ibirundo vy’amasakamburira, n’i wabo w’imbgebge, n’akajoreza, n’ico kuvuzwakw agahwa, ata wukihaba.

³⁸ Bazokwivuga nk’imigunza y’intambge bose icarimwe, bagwangware nk’ ivyana vy’intambge.

³⁹ Bamaze kuborerwa nzobategurira amazimano, kandi nzobaboreza kugira ngo banezerwe, basinzire itiro ry’intashira, batazokwikangura ukundi, ni jewe Uhoraho mbivuze.

⁴⁰ Nzobamanukana nk’ imyagazi y’intama ija kubāgwa, nk’amapfizi y’intama n’ay’ impene.

⁴¹ Ewe kuntu i Sheshaki hatsinzwe! Ahār’ ibihimbaro vy’isi yose ukuntu hazirimukiwe! Ewe kuntu i Babuloni hahindutse ibitongozi hagati mu yandi mahanga!

⁴² Ikiyaga kiradūze kīziye i Babuloni: harengewe n’isinzi ry’ imipfunda yaco.

⁴³ Ibisagara vyaho bihindutse ibitongozi, igihugu cumye c’ubugaragwa, igihugu ata muntu akikibamwo, ata n’umuntu akigihitamwo.

⁴⁴ Kandi nzohanira ca kigirwamana Beli i Babuloni, nzokijiginyura mu menyo ivyo catsontsomeye; kand’ amahanga ntazosubira gusendanisha aja kuri co: mber’ uruzitiro rw’i Babuloni ruzotemba.

⁴⁵ Yemwe bantu banje, ni muve hagati muri ho, mwikize mwese uburake bganje bg’inkazi, jewe Uhoraho.

⁴⁶ Imitima yanyu ntidendebukirwe, ntimuterwe ubgoba n’impuha zumvikana mu gihugu; kukw impuha zizoza mu mwaka umwe, maze mu wundi mwaka hakaza izindi, umuryano ukaba mu gihugu, abaganza bakarwanya abandi.

⁴⁷ Nuko rero, rāba imisi igira ize, nzohana ibishushanyo bibājwe vy’i Babuloni, igihugu caho cose kizotētērwa; abishwe baho bose bazohindikirana hagati muri ho.

⁴⁸ Ni ho ijuru n’isi n’ibirimwo vyose bizoririmbishwa n’umunezero wo kwitamba kuri Babuloni; kukw abanyazi bazohāzira bavuye i burārūko, ni jewe Uhoraho mbivuze.

⁴⁹ Nk’uko Babuloni hāhindikiranije abishwe b’Abisirayeli, ni kw i Babuloni hazohindikirana abishwe b’igihugu caho.

⁵⁰ Yemwe abakize inkota, mugende, ntimuhagarare; munyibuke, jewe Uhoraho, mukiri kure, i Yerusalemu hagaruke mu mitima yanyu.

⁵¹ Turatēterewe, kuko twumvise ibitutsi; mu maso hacu haje ibimāramāre: kukw abanyamahanga binjiye mu myanya yera yo mu ngoro y’Uhoraho.

⁵² Nuko rero, rāba imisi igira ize, ni jewe Uhoraho mbivuze, nzohana ibishushanyo bibājwe vyaho; kandi mu gihugu caho cose abakomeretse bazocura umuniho.

⁵³ Naho Babuloni hodūga hagashika kw ijuru, kandi nah’ ibihome vyaho birebire vyoba uruhatane, na ho nyene abanyazi bohashika bavuye kuri jewe, ni jewe Uhoraho mbivuze.

⁵⁴ Ijwi ry’amarūru riturutse i Babuloni, n’iry’ ukugesera gukomeye riturutse mu gihugu c’Abakaludaya!

⁵⁵ Kuk’ Uhoraho ahoneje i Babuloni, ajibije amajwi yaho ahūrīra; kukw imipfunda y’abanyazi ibomborana nk’amazi menshi, urwamo rw’ijwi ryabo rwumvikana;

⁵⁶ mber’ abanyazi barahashitse, bashitse i Babuloni nyene, abahizi baho barafashwe, imiheto yabo iravunaguritse. Kuk’ Uhoraho ar’ Imana yīhōra, ntazobura kwīhōra.

⁵⁷ Kandi nzoboreza abaganwa baho n’abanyabgenge baho, bo n’abagabisha baho, n’abahaganza n’abahizi baho; bazosinzira itiro ry’intashira, ntibikangure ukundi, ni jewe Umwami mbivuze, izina ryanje nd’ Uhoraho Nyen’ ingabo.

⁵⁸ Uku ni k’Uhoraho Nyen’ ingabo agize, at’ Inzitiro zagutse z’i Babuloni zizosangangurwa rwose, n’amarembo yaho maremare atongozwe umuriro; kand’ amahanga azoba yar’ atamijwe n’ubusa, n’amoko azoba yar’ aruhijwe n’ibizoja mu muriro.

Seraya ajana ayo majambo y’imbūri zo kuri Babuloni kuyasomerayo

⁵⁹ Ivyo uwavugishwa n’Imana Yeremiya yageze Seraya mwene Neriya, Neriya wa Mahaseya, igihe yajana na Zedekiya umwami w’i Buyuda, aja i Babuloni, mu mwaka ugira kane wo kuba ku ngoma kwiwe. Kandi Seraya yar’ umukuru w’abagaranzurira umwami.

⁶⁰ Nuko Yeremiya yari yanditse mu gitabo ivyago vyose bizotera i Babuloni, ni vyo ayo majambo yose yanditswe avuga ivya Babuloni.

⁶¹ Maze Yeremiya abarira Seraya, ati Ni washika i Babuloni, ntubure gusoma aya majambo yose,

⁶² kand’ ut’ Ewe Uhoraho, wavuze ku vy’aha hantu k’uzohahonnya, ngo ntihaze hagire ūzoba akihaba, ar’ umuntu cank’ igitungwa, ariko ko hazoba ibitongozi gushitsa ibihe bidashira.

⁶³ Urangije rero gusoma iki gitabo, uz’ uheze ugihambirane n’ibuye, ugiterere hagati mu ruzi Efurate:

⁶⁴ kand’ uz’ uvuge, ut’ Uku ni ko Babuloni hazodobera, ntihasubire kwiburuka ukundi, kubg’ ivyago Uhoraho azohatēza: kandi bazoba badendebukiwe. Amajambo ya Yeremiya agarukiye aho.