Yeremiya 48 - Bibliya Yera 1951 1967 (Burundi)

Imbūri zo kuri Mowabu

¹ Ku vya Mowabu. Uku ni k’Uhoraho Nyen’ ingabo agize, ni we Mana y’Abisirayeli: at’ I Nebo habonye ibara! Kuko hakomvomvowe: i Kiriyatayimu haratēterewe, haratsinzwe: i Misigabu haratēterewe, harasanganguwe.

² Icubahiro c’i Mowabu kiraheze; bahahigiye imihigo bar’ i Heshiboni, bat’ Enda ni muze tuhageseze, ntihabe hakiba ihanga. Nawe Madumeni, uzozibizwa; inkota izogukurikirana.

³ Ijwi ry’amaborogo rituruka i Horonayimu: har’ ukunyaga n’ ugutikiza gukomeye.

⁴ I Mowabu haratikiye; abana baho bumvikanisha urwānāga.

⁵ Kuko bazodūga ku kadūgo k’i Luhiti barira ingenda badahengeshanya; ku kamanuko k’i Horonayimu bumvise umunihiro w’umuborogo w’ abagesezwa.

⁶ Muhunge, mwunzūre amagara, mube nk’agasaka k’inkōkōre mu bugaragwa.

⁷ Ko wishimiye ibikorwa vyawe n’ubutunzi bgawe, nawe nyene uzotsindwa: kand’ ikigirwamana Kemoshi kizojanwa ar’ inyagano, bo n’abaherezi baco n’abaganwa baco.

⁸ Kand’ umunyazi azoshika ku gisagara cose, nta gisagara na kimwe kizomukira: ababa mu mwonga bazohona, n’ababa mu kiyaya bazogesezwa, nk’uk’ Uhoraho yabivuze.

⁹ Muhe Mowabu amababa, kugira ngo haguruke hīgīre: ibisagara vyaho bizocika amatongo, ata wukiriho wo kuhaba.

¹⁰ Aravumwe uwanjanjwa ku gikorwa c’Uhoraho; aravumwe ūbuza inkota yiwe kuvisha amaraso.

¹¹ Mowabu hamye hidibamiye uhereye mu buto bgaho, hireretse ku mvūzo, ntihāsukanuwe ngo have mu mubindi haje mu wundi, ntihājanywe kw inyagano; ni co gituma uburyohe bgaho bukiri muri ho, n’ubumote bgaho ntibutītūke.

¹² Nuko rāba, imisi igira ize, ni k’Uhoraho agize, nzoharungikira abacuranguza, bazohacuranguza, barangūze imibindi yaho, bamenagure amakarabo yaho.

¹³ Abanyamowabu bazomāramāzwa na Kemoshi, nk’ ukw ab’ inzu ya Isirayeli bāmāramājwe n’ivy’ i Beteli bāri bishimiye.

¹⁴ Muvuga ngw iki ngo Mur’ abahizi, kandi ngo Mur’ intōre zo kuja mu ntambara?

¹⁵ Mowabu hacitse imisaka, badūze gutera ibisagara vyaho, kand’ imisore yaho y’intōre imanutse gukekagurwa, ni k’Umwami agize, yitwa Uhoraho Nyen’ ingabo.

¹⁶ Ukugesezwa kw’i Mowabu kuri hafi gushika, ivyago vyaho bije akabushungwe.

¹⁷ Mwebge abahakikije mwese muharirire, namwe mwese abazi izina ryaho, muvuge, mut’ Es’ ukuntu ubuhiri bukomeye buvunitse, ya nkoni ishajije!

¹⁸ Yewe wa mukobga uba i Diboni, manuka uve mu cubahiro cawe, wicare ahagadutse; kuk’ umunyazi w’i Mowabu adūze kukurwanya, yasanganguye ibihome vyawe bikomeye.

¹⁹ Ewe uba i Aroweri, hagarara i ruhande y’ inzira, wirābire indore: baza umugabo ahunze n’umugore yiyunzūra, uti Bibaye bite?

²⁰ Mowabu haratēterewe; kuko hasanganguwe; muboroge, murire; muvuge inkuru kuri Arunoni kw i Mowabu hageseye.

²¹ Iteka haciriweko rishitse mu ntāra yo hasi mu kiyaya, no kuri Holoni, no kuri Yahaza, no kuri Mefata,

²² no kuri Diboni, no kuri Nebo, no kuri Beti‐dibulatayimu,

²³ no kuri Kiriyatayimu, no kuri Beti‐gamuli, no kuri Beti‐meyoni,

²⁴ no kuri Keriyoti, no kuri Bosira, no ku bisagara vyose vyo mu gihugu c’i Mowabu, ibiri kure n’ibiri hafi.

²⁵ Ihembe ry’i Mowabu rirakondowe, n’ukuboko kwaho kuravunitse, ni k’Uhoraho agize.

²⁶ Muhaboreze, kuko hinantaje k’ Uhoraho; nuko Mowabu hazokwivurunga mu bidashwe vyaho, hacike agatwengo.

²⁷ None Isirayeli ntiwamugize agatwengo? Mbega yabonetsek’ ubusuma? Kuk’ uk’ umuvuga kwose uzunza umutwe.

²⁸ Yemwe ababa i Mowabu, ni muve mu bisagara, muje kuba mu masenga; mube nk’ inuma yārika icāri cayo mu mbavu z’umuryango w’isenga.

²⁹ Twumvise ivy’ ubgibone bg’i Mowabu, yuko hafise ubgibone bginshi; ivy’ ukwishira hejuru kwaho, n’ivy’ ubgibone bgaho, n’ivy’ amanyama yaho, n’ivy’ ukwigira hanini kwo mu mutima waho.

³⁰ Nzi uburake bgaho, ni k’Uhoraho agize, yukw ata co bumaze; ukwihayagiza kwaho nta co kwakoze.

³¹ Ni co kizotuma mborogera Mowabu; mbere nzotakira i Mowabu hose: bazovugiriza amarūru abagabo b’i Kiri‐heresi.

³² Ewe ruzabibu rw’ i Sibuma, nzokuririra kurusha kurira kw’i Yazeri; amashami yawe aca hejuru y’ikiyaga, agashika no ku kiyaga c’i Yazeri: umunyazi afashe ku vyo weze no ku vyo wimbuweko vya vino.

³³ Umunezero n’uguhimbarwa bikūweho, bikūwe mu ndimiro imera no mu gihugu c’i Mowabu; natumye vino ibura mu mato akanyirwamwo: nta wuzoganisha ibirenge n’akāmo k’umunezero: akāmo kazobaho kazoba ar’ ak’ intambara, ntikazoba ar’ ak’ umunezero.

³⁴ Gutaka kw’i Heshiboni kwumvikana gushitsa n’i Eleyale; mber’ amajwi yabo ashika n’i Yahazi, kand’ ahēra i Sowari agashitsa n’i Horonayimu bo n’i Egilati‐shelishiya: kuko n’amazi y’i Nimurimu azocika iyondoyondo.

³⁵ Ikigeretseko nzoherengeteza i Mowabu ūtangira ikimazi mu gitabo, n’uwosereza imibavu imana ziwe, ni k’Uhoraho agize.

³⁶ Ni co gitumye Mowabu umutima wanje uhacurira intimba mu mwironge, abagabo b’i Kiri‐heresi ubacurira intimba mu mwironge: kukw ivy’ ibitayega hāronse bihonnye.

³⁷ Kukw imitwe yabo yose imowe inkomvorera, n’ ubganwa bgose bumowe; ku maboko yose har’ ibikebagure, no mu rukenyerero hose hakenyeye amagunira.

³⁸ Hejuru ku nzu zose z’i Mowabu no mu nzira zaho, hose hose har’ amaborogo: kuko nasābije Mowabu nk’urujo rudashimwa, ni k’Uhoraho agize.

³⁹ Ewe kuntu hasābijwe! Ewe kuntu baboroga! Ewe kuntu ab’ i Mowabu baroye irya bomotse batēterewe! Uko ni ko Mowabu hazohinduka agatwengo n’akumiza ku bahakikije bose.

⁴⁰ Kuk’ ukw ari k’Uhoraho agize, at’ Eh’ umwansi azoza aguruka nk’inkukuma, azosanza amababa i Mowabu.

⁴¹ I Keriyoti haratsinzwe, ibihome bineshejwe giturumbuka; kur’ uwo musi imitima y’abahizi b’i Mowabu izomera nk’umutima w’ umugore ari mu bise.

⁴² Kandi Mowabu hazogesezwa ngo ntihabe hakiba ihanga, kuko hinantaje k’Uhoraho.

⁴³ Wewe uba i Mowabu, ibiteye ubgoba n’urusumanyenzi n’umutego bigushitseko, ni k’Uhoraho agize.

⁴⁴ Ūhunga ibiteye ubgoba azogwa mu rusumanyenzi; uwūrira ngw ave mu rusumanyenzi umutego uzomufata: kukw i Mowabu nzohashitsako umwaka wo kūzirwa kwabo, ni k’Uhoraho agize.

⁴⁵ Abāhunze basigaye ata nkomezi mu gitūtu c’i Heshiboni: arik’ umuriro uturutse i Heshiboni, urubeya ruturutse hagati y’i Sihoni, rutongoye impande z’i Mowabu, n’igitwariro c’abanyamuvurungano.

⁴⁶ Ubonye ibara, Mowabu! Abantu ba Kemoshi baragowe! Kukw abahungu bawe bajanywe ar’ inyagano, n’abakobga bawe mu ngoyi.

⁴⁷ Yamara nzotuma ab’i Mowabu bahindukira bave mu kinyago mu misi yo hanyuma, ni k’Uhoraho agize. Ivy’ iteka Mowabu haciriwe bigarukiye aho.