Yeremiya 30 - Bibliya Yera 1951 1967 (Burundi)

Yeremiya avugishwa ivyo kuzogarukanwa kw’ Abisirayeli

¹ Ijambo ryaje kuri Yeremiya rivuye k’Uhoraho,

² rit’ Uku ni k’Uhoraho agize, ni we Mana y’Abisirayeli, ati Wandike mu gitabo amajambo yose nakubariye.

³ Kukw imisi izoza, ni jewe Uhoraho mbivuze, nzotuma abantu banje b’Abisirayeli n’Abayuda bahindukira, bave mu ngoyi zabo, ni jewe Uhoraho mbivuze; kandi nzotuma bagaruka mu gihugu nahaye ba sekuruza, baciganzire.

⁴ Aya ni yo majambo Uhoraho yavuze ku Bisirayeli n’Abayuda:

⁵ at’ Uku ni ko mbivuze, jewe Uhoraho, nti Twumvise ijwi ry’ abari mu gatengo no mu bgoba, atar’ iry’ abari mu mahoro.

⁶ Banza mubaze, murābe ko hogira umugabo aja ku nda ngw avyare: none n’iki gitumye mbona umugabo wese yifashe ku mafyinga nk’umugore aramutswe, mu maso ha bose hagahindurira?

⁷ Ew’ amagorwa ari hano! Kuk’ uwo musi uhambaye, nta wuhwanye na wo: n’igihe c’umubabaro wa ba Yakobo; yamara bazogikizwa.

⁸ Maze kur’ uwo musi, ni jewe Uhoraho Nyen’ ingabo mbivuze, nzovuna ingōgo bambitswe, ndayikūre kw izosi ryabo, ncagagure imvuto baboheshejwe; kandi ntibazoba bakijakarira amahanga:

⁹ ariko bazosaba jewe, Uhoraho Imana yabo, na Dawidi umwami wabo, uwo nzobahagurukiriza.

¹⁰ None rero ntutinye, ewe Yakobo musavyi wanje, ni k’Uhoraho agize; nturanduke umutima, ewe Isirayeli: kuko rāba nzogukiza ngukūre kure, uruvyaro rwawe ndarukūre mu gihugu rwajanywemwo ar’ inyagano; Yakobo azogaruka, kand’ azoba amahoro ata nkomanzi, kandi nta wuzomutera ubgoba.

¹¹ Kuko ndi kumwe nawe, ni jewe Uhoraho mbivuze, kugira ngo ngukize; kuko nzoherengeteza amahanga yose, ayo nagushwiragirijemwo: ariko weho sinzoguherengeteza; mugabo nzogubana ibigeze, sinzokureka ntaguhannye.

¹² Kuk’ ukw ari ko mvuze, jewe Uhoraho, nt’ Igikomere cawe ntikivūrika, n’igisebe cawe n’ ikigoye.

¹³ Nta wo kukwitsa ariho, kugira ng’ upfukwe igikomere: nta n’imiti ufise yo kukuvūra.

¹⁴ Abūzure bawe bose barakwibagiye; ntibakikubabaye; kuko ngukomerekeje nk’ūkomerekejwe n’umwansi, ngukubise bga ruburakigongwe; ni kubg’ ibigabitanyo vyawe vyinshi, kukw ivyaha vyawe vyari vyiyongeranije.

¹⁵ Non’ igikomere cawe kikuririza iki? K’uburibge bgawe butavūrika; ni kubg’ ibigabitanyo vyawe vyinshi, kukw ivyaha vyawe vyari vyiyongeranije, ivyo ni vyo vyatumye nkugira ntyo.

¹⁶ Yamar’ abo bose bakurya na bo bazoribga; abarwanizi bawe bose, umuntu wese muri bo, bazojanwa ar’ inyagano; abākugize umunyagwa na bo bazonyagwa, abākunyaga bose nzobagira inyagano.

¹⁷ Ariko nzosubira kugukomeza, nzogukiza ibikomere vyawe, ni jewe Uhoraho mbivuze; kuko bakwise uwirukanywe, bati Ni Siyoni, hatagifise ūkihababara.

¹⁸ Uku ni ko ndabivuze, jewe Uhoraho, nti Rāba nzotuma abo mu mahema ya Yakobo bahindukira, bave mu ngoyi zabo, ngirire ikigongwe amazu yabo; kand’ igisagara kizokwubakwa mu bitongozi vyaho, n’ ingoro isubire kumera nk’uko yahora.

¹⁹ Muri vyo hazoba gushima, n’ijwi ry’abanezerewe: kandi nzobagwiza, ntibazoba bake; nzobaha icubahiro, ntibazoba abo hasi.

²⁰ Abana babo bazomera nk’uko bār’ ubga mbere, kand’ ikoraniro ryabo rizokomezwa imbere yanje, nanje nzohana abābahahaza bose.

²¹ Umwami wabo azoba uwo muri bo bgite, ūbaganza akomoke hagati muri bo: nanje nzomwiyegereza, kand’ azonshikīra: kuko ni nde yohangara kunshikīra? ni jewe Uhoraho mbibajije.

²² Kandi muzoba abantu banje, nanje nzoba Imana yanyu.

²³ Rāba ikirura c’Uhoraho, ni bgo burake bgiwe, kirahinze, mbere n’ikirura c’inkubebe: kizorindimukira ku mitwe y’abanyavyaha.

²⁴ Uburake bg’inkazi bg’Uhoraho ntibuzohwama kugeza ah’ azoba ashikije ivyo umutima wiwe wagabiye, abiheraheje: mu misi yo hanyuma muzobitahura.