Yeremiya 23 - Bibliya Yera 1951 1967 (Burundi)

Ivy’ abami baganza nabi, n’ivy’ Umwami azoza agororotse

¹ Bazobona ibara, abungere batikiza intama zo mu canya canje, bakazishwiragiza! ni jewe Uhoraho mbivuze.

² None rero, uku ni k’Uhoraho agize, ni we Mana y’Abisirayeli, ku vyo ageneye abungere baragira abantu biwe: ati Mwashwiragije umukuku wanje, murawirukana, ntimwawurāba; nuko rero nanje nzobāzira, mbazanekw ivyago bihwanye n’ ukugira nabi kwanyu, ni jewe Uhoraho mbivuze.

³ Kandi nzokoraniriza hamwe amasigarira y’ umukuku wanje, ndazikūre mu bihugu vyose aho nazirukaniye, ndazigarukane ukundi gusha mu mpongore zazo; zizorondoka zigwire.

⁴ Kandi nzoshira abungere kuri zo, baziragire: ntizizoba zikigira ubgoba ukundi, canke ngo zihagarike imitima, kandi ntihazotākara n’imwe muri zo, ni jewe Uhoraho mbivuze.

⁵ Rāba imisi izoza, ni jewe Uhoraho mbivuze, nzonagisha kuri Dawidi uwitwa Shami w’umugororotsi, kand’ azoganza nk’ umwami, agire ikiganza ciza, ace iziroranye n’izibereye mu gihugu.

⁶ Mu gihe ciwe Abayuda bazokizwa, Abisirayeli bibere amahoro: kand’ iri ni ryo zina azokwitwa, ng’ Uhoraho ni we kugororoka kwacu.

⁷ Nuko rero, mu misi izoza, ni jewe Uhoraho mbivuze, ntibazoba bakirahira uguhoraho kwanje, jewe Uhoraho, ko nakūye Abisirayeli mu gihugu ca Egiputa,

⁸ ariko bazorahira uguhoraho kwanje Uhoraho, ko nakūye uruvyaro rw’ab’ inzu ya Isirayeli mu gihugu c’i burārūko, nkabarōngōra, nkabakūra mu bihugu vyose aho nzoba narabirukaniye; kandi bazokwibera mu gihugu cabo bgite.

Imana ibūrira ba kamenyi

⁹ Ku vya ba kamenyi. Umutima wanje unsābiye mu nda, amagufa yanje yose aratetemera; mmeze nk’imborerwa, nk’umuntu yaneshejwe na vino, kubg’ Uhoraho n’amajambo yiwe yera.

¹⁰ Kukw igihugu cuzuye abasambanyi; kubg’ umuvumo igihugu kiragandaye; imyīmīro yo ku mirāmbi irumye; ingeso zabo ni mbi, ububasha bgabo ni bubi.

¹¹ Kuko ba kamenyi n’abaherezi ar’ ibihumane; mbere no mu ngoro yanje nabonye ivyaha vyabo, ni jewe Uhoraho mbivuze.

¹² Ni co gitumye inzira yabo izobabera nk’ahanyerera mu mwiza: bazokwirukanwa bahagwe, kuko nzobazanakw ivyago, ni wo mwaka wo kūzirwa kwabo, ni jewe Uhoraho mbivuze.

¹³ Nabonye ubupfu bga ba kamenyi i Samariya; bāvugishijwe na Bayali, bakazimiza abantu banje b’Abisirayeli.

¹⁴ Mbonye ubuyobe muri ba kamenyi b’i Yerusalemu: barasambana, bagendera mu binyoma, baremesha inkozi z’ibibi, bigatuma ata wigarura ngw ave mu bibi vyiwe: bose bampindukiye nk’i Sodomu, n’ababayo bampindukiye nk’i Gomora.

¹⁵ Nuko rero, uku ni k’Uhoraho Nyen’ ingabo agize ku vya ba kamenyi: at’ Ehe rāba, nzobagaburira ivy’ umururazi, nzobanywesha amazi y’ubumara: kukw ibihumanya vyasāvye igihugu cose, biturutse kuri ba kamenyi b’i Yerusalemu.

¹⁶ Nuk’ uku ni k’ Uhoraho Nyen’ ingabo agize, ati Ntimwumvirize amagambo abo ba kamenyi bababarira; babigisha ibitagira ikimazi; barotora ivyo beretswe bivuye mu mitima yabo ubgabo, bitavuye mu kanwa kanje Uhoraho.

¹⁷ Ntibahengeshanya kubarira abakēngēra ijambo ryanje, bat’ Uhoraho yavuze ngo Muzoba amahoro; kand’ umuntu wese agendera mu budadarare bg’umutima wiwe, baramubgira, bati Nta cago kizobazako.

¹⁸ Ni nde yabaye mu nama yanje, jewe Uhoraho, canke ngw amenye ijambo ryanje, aryumve? Ni nde yategereye ijambo ryanje akaryumva?

¹⁹ Rāba ikirura canje, jewe Uhoraho, ni bgo burake bganje, kirahinze, mbere n’ikirura c’imvugusi: kizorindimukira ku mitwe y’abanyavyaha.

²⁰ Uburake bganje jewe Uhoraho ntibuzokebanuka kugeza aho nzoba nshikije ivy’ umutima wanje wagabiye, mbiheraheje: mu misi yo hanyuma muzobitahura rwose.

²¹ Erega si jewe natumye abo ba kamenyi, yamara bārirukanze; jewe nta co navuganye na bo, yamara baravugishwa.

²² Iyaba bārabaye mu nama yanje baba bātumye abantu banje bumva amajambo yanje, kandi baba bārabahindukije bakava mu nzira yabo mbi, no mu bikorwa vyabo bibi.

²³ Mbega nd’ Imana igarukira hafi gusa? ni jewe Uhoraho mbibajije; sind’ Imana ishika kure na ho?

²⁴ Har’ uwoshobora kwinyegeza ahantu hihishije ngo nanje sindamubone? ni jewe Uhoraho mbibajije. Mbega sinkwiye ijuru n’isi? ni jewe Uhoraho mbibajije.

²⁵ Numvise ivyo ba kamenyi bavuga, barotora ibinyoma mw izina ryanje; bati Narose, narose.

²⁶ Ivyo bizogeza ryari kuba mu mitima ya ba kamenyi barotora ibinyoma, ni bo bavugishwa n’ubugunge bgo mu mitima yabo?

²⁷ Bibgira ko bokwibagiza abantu banje izina ryanje, babibagirisha inzozi zabo barotora, izo umuntu wese arotorera mugenzi we, nk’ uko ba sekuruza babo bibagijwe izina ryanje na Bayali.

²⁸ Kamenyi ni yagira ico yarose, n’akirotore; kand’ ūfise ijambo ryanje n’ avuge iryo jambo adacishije i ruhande. Mbeg’ umuguruka uhwanye ute n’ingano? ni jewe Uhoraho mbibajije.

²⁹ Mbeg’ ijambo ryanje si nk’umuriro? ni jewe Uhoraho mbibajije; canke si nk’inyundo imenagura igitandara?

³⁰ Nuko rer’ ehe rāba, abo ba kamenyi tuzohigūra twe na bo, ni jewe Uhoraho mbivuze, abība amajambo yanje, umuntu wese akayība uwundi.

³¹ Rāba, nzohigūra n’abo ba kamenyi, ni jewe Uhoraho mbivuze, ababishira mu kanwa kabo, ngo ni ko nabivuze.

³² Rāba, nzohigūra n’abarotora inzozi z’ibinyoma, ni jewe Uhoraho mbivuze, bakazisigura, bakazimirisha abantu banje ibinyoma vyabo n’ukwihayagiza kwabo kw’ ubusa: yamara jewe nta ho nabatumye, nta co nabageze; kandi nta co bazomarira ubu bgoko na gatoya, ni jewe Uhoraho mbivuze.

³³ Kand’ aba bantu canke kamenyi cank’ umuherezi, ni hagira ūkubaza, at’ Imbūri y’Uhoraho ivuga iki? uz’ umwishure, ut’ Ugize ngw imbūri n’iki? N’ukw agira ngw abate, ni k’Uhoraho agize.

³⁴ Kandi kamenyi cank’ umuherezi cank’ uwo mu bantu ni hagira ūpfa kuvuga ivy’ imbūri yanje jewe Uhoraho, uwo muntu nzomuhana, bo n’abo mu nzu yiwe.

³⁵ Uku az’ abe ari k’umuntu wese abaza umubanyi wiwe, abaze na mugenzi we, ati Mbeg’ Uhoraho yishuye iki? Kand’ ati Mbeg’ Uhoraho yavuze iki?

³⁶ Imbūri y’Uhoraho ntimuze muyivuge ukundi: kukw ijambo ry’umuntu wese ari ryo rizomubera imbūri; erega mwagoretse amajambo y’Imana nzima, ni yo y’Uhoraho Nyen’ ingabo Imana yacu.

³⁷ Uz’ ubaze ūvugishwa, uti Mbeg’ Uhoraho yakwishuye iki? Cank’ ut’ Uhoraho yavuze iki?

³⁸ Ariko ni mwavuga ivy’ imbūri y’Uhoraho, uku ni k’Uhoraho agize, ati Ko muvuga iryo jambo ry’imbūri yanje Uhoraho, nanje nkaba nabatumyeko ndabibabuza, nti Ntimukavuge ivy’ imbūri yanje, jewe Uhoraho;

³⁹ nuko rero nzobībagira rwose, nzobashiburana n’igisagara nabahānye na ba sogokuruza, ngo mumve imbere;

⁴⁰ kandi nzobazanira umuvumo utazovaho, ibitētērwa bitazoshira, bitazoruha vyibagirana.