Yeremiya 18 - Bibliya Yera 1951 1967 (Burundi)

Yeremiya yigishwa n’ivy’ umubumvyi

¹ Ijambo ry’Uhoraho rija kuri Yeremiya,

² riti Va hasi, umanuke uje ku nzu y’umubumvyi, aho ni ho nzokwumvishiriza amajambo yanje.

³ Nuko ndamanuka, nja ku nzu y’umubumvyi, nsanga arikw arabumbira ku rujo.

⁴ Maz’ ikintu yarikw arabumba cononekarira mu ntoke z’uwo mubumvyi, nuko yongera kukibumbamw’ ikindi ukundi gusha, kimeze nk’ukw agomba.

⁵ Maz’ ijambo ry’Uhoraho rinzako,

⁶ riti Yemwe ab’ inzu ya Isirayeli, mbega jewe sinoshobora kubagira nk’uyu mubumvyi? ni k’Uhoraho abaza. Rāba nk’ukw ibumba riri mu kuboko kw’umubumvyi, namwe ni ko muri mu kuboko kwanje, yemwe ab’ inzu ya Isirayeli.

⁷ Igihe kimwe novuga ku vy’ihanga no ku vy’ ubgami ku vyo kuzorirandura no kuzorisangangura no kuzorihonnya:

⁸ maz’ iryo hanga navuzeko ryohindukira rikareka ibibi vyaryo, nanje nzokwigarura ndeke ibibi nari namaramaje kuzobakorera.

⁹ Ikindi gihe novuga ku vy’ihanga no ku vy’ubgami, ku vyo kuzoryubaka no kuzoritēragira:

¹⁰ maze ni ryakora ibibi mu nyonga zanje, ntiryumvire ijwi ryanje, nuko nanje nzogarwa, ndeke ivyiza nari namaramaje kuzobagirira neza.

¹¹ Nuko rer’ ubarire abagabo b’i Buyuda n’ababa i Yerusalemu, ut’ Uku ni k’Uhoraho agize, at’ Ehe mbagereye ikibi, nīgīriye imigabo y’ivyo nzobagirira: enda ni mugaruke, umuntu wese ave mu nzira yiwe mbi, mutunganye inzira zanyu n’ ingeso zanyu.

¹² Ariko bo baravuga, bati N’utwiziguruke, kuko twebge tugomba gukurikira imigabo yacu ubgacu, kand’ umuntu wese muri twebge agomba gukora nk’uk’ ubudadarare bg’umutima wiwe mubi bumeze.

¹³ Nuko rero, uku ni k’Uhoraho agize, at’ Enda ni mubaze mu mahanga ko hoba har’ uwumvise ibimeze birtyo; inkumi, ni yo Bisirayeli, yakoze ibibi vy’ubuyobe.

¹⁴ Mbega shelegi y’i Lebanoni yoreka kugwa kuri vya bitandara vyaho vyibonekeza mu gihugu? Cank’ amazi yayo atimvye atemba ava kure yokamuka?

¹⁵ Yamar’ abantu banje baranyibagiye, boshereje imibavu ibitagira ikimazi; vyatumye batsitara mu nzira zabo, ni zo nzira za kera, ngo bajane inzira zikikamye, inzira zitanoze,

¹⁶ bituma bahindura igihugu cabo akajoreza, n’ico kuvuzwakw agahwa ubudasība; umuntu wese azohaca azojorerwa, azunguze umutwe.

¹⁷ Nzobasābagiza imbere y’abansi nk’ūbasābagirishije umuyaga uvuye i burasirazuba; nzobatera ibitugu, mbime mu nyonga hanje, ku musi bazobonerakw ibara.

Basubira guhigira imihigo Yeremiya

¹⁸ Maze baravuga, bat’ Enda ni muze, duhigire imihigo Yeremiya; kukw ahar’ umuherezi hatobura n’ivyagezwe, kand’ ahar’ umunyabgenge ntihobura n’inama, kand’ ahar’ ūvugishwa n’ Imana ntihobura ijambo ryayo. Enda ni muze, tumukubitishe intega y’ururimi, ntidushire umutima ku magambo yiwe, mwo na rimwe.

¹⁹ Nshirak’ umutima weho Uhoraho, wumvirize ijwi ry’abandwanya.

²⁰ Mbeg’ iciza cokwishurwa ikibi? Ko banyimbiye icobo! Ibuka ingene nahagaze imbere yawe kugira ngo mbavugire neza, kugira ng’ uburake bgawe bubaveko!

²¹ Kubg’ ivyo tanga abana babo ubahe inzara, ubagaburire ubugi bg’inkota; abagore babo ni babure abana babo, bateko bapfakare; abagabo babo ni bicwe n’urupfu, imisore yabo ni yicwe n’inkota yo mu ntambara.

²² Induru ni zumvikane mu ngo zabo, igihe uzobashikanakw igitero giturumbuka, kuko banyimbiye icobo, bagatega ibirenge vyanje imitego.

²³ Yamara wewe, Uhoraho, urazi imihigo bampigiye yose yo kunyica; ntuharire igicumuro cabo, ntusibanganye icaha cabo ngo kive mu nyonga zawe: ariko batsindwe imbere yawe; abe ari k’ubagirira mu gihe c’uburake bgawe.