Yeremiya 15 - Bibliya Yera 1951 1967 (Burundi)

Uhoraho yishura Yeremiya

¹ Maz’ Uhoraho arambarira, ati Naho Mose na Samweli bohagarara imbere yanje, umutima wanje ntiwohangaza ubu bgoko: bahinde, bave mu nyonga zanje, bagende.

² Maze ni bakubaza, bati Tuje hehe? ubabarire, ut’ Uku ni k’Uhoraho agize, at’ Abagerewe gupfa, baje mu rupfu; abagerewe inkota baje ku nkota; abagerewe kigoyi baje muri kigoyi; abagerewe gufatwa mpiri bafatwe mpiri.

³ Kandi ndabagereye ivyago bine, ni k’ Uhoraho agize: inkota yo kwica, n’imbga zo gutabagura, n’ibisīga vyo mu kirēre n’ibikōko vyo kw isi vyo gutsontsomera no gutikiza.

⁴ Kandi nzobagira akabarore mu bihugu vy’abami bose bo mw isi, kubga Manase mwene Hezekiya, umwami w’i Buyuda, kubg’ ivyo yakoreye i Yerusalemu.

⁵ Ni nde azokugirira akagongwe, ewe Yerusalemu? Ni nde azokuririra? Ni nde azokikama ngw abaze udukuru twawe?

⁶ Warantaye, ni jewe Uhoraho mbivuze, wasubiye inyuma; ni co gitumye nagushōreyek’ ukuboko nkaguhonnya; kwigarura kurandambiye.

⁷ Nabagosoje urutaro ku marembo y’igihugu; nabakūyekw ibibondo, mponnya abantu banje: ariko ntibāhindukira ngo bave mu nzira zabo mbi.

⁸ Abapfakazi babo baragwiriye kurusha umusenyi wo ku kiyaga imbere yanje: nabagomoreye abanyazi ku murango w’amashōka, ngomoreye nyina w’abahungu; namusutseko giturumbuka umubabaro n’ ibiteye ubgoba.

⁹ Umugore yavyaye ndwi arahondobereye, aregutse; izuba ryiwe ryacokeye hakiri ku murango; aratēterewe, aramāramāye; amasigarira yabo nzoyagaburira inkota imbere y’ abansi babo, ni jewe Uhoraho mbivuze.

¹⁰ Erega mama, mbonye ibara, kuko wamvyaye nd’ umutēzi w’ intambara, nd’ umutēzi w’amahane mw isi yose! Nta we nagurāniye kuzohabga ay’ inyungu, kandi nta bāngurānye ngo nze mbahe ay’ inyungu: arik’ umuntu wese muri bo aramvuma.

¹¹ Uhoraho arambarira, ati N’ukuri nzogukomeza umere neza; n’ukuri nzotuma abansi bagukomera ibōbo mu gihe c’ivyago no mu gihe c’amagorwa.

¹² Mbega har’ uwoshobora kuvuna icuma, kand’ ar’ icuma kivuye i burārūko, bo n’umuringa?

¹³ Ibintu vyawe n’itunga ryawe nzobigomorera binyagwe ata biguzi, kubg’ ivyaha vyawe vyose, bihereye ku mbibe zawe zose.

¹⁴ Kandi nzotuma bijanwa n’abansi bawe mu gihugu utazi: kuk’ umuriro ucanywe kubg’ uburake bganje, uzobatongora.

¹⁵ Ewe Uhoraho, ivyo urabizi: nyibuka, ungendere, umpōre abandendereza; ntunkūreho, kubg’ ukwihangana kwawe: menya kw ari kubgawe ntukwa.

¹⁶ Amajambo yawe yarabonetse, ndayarya; kand’ amajambo yawe yambereye akanyamuneza n’ibihimbaro vy’umutima wanje: kuko nitiriwe izina ryawe, Uhoraho Mana Nyen’ ingabo.

¹⁷ Sinicaranye n’abaremye akarwi bitwengera, bihimbarirwa: nicaye ukwanje jenyene kubg’ ukuboko kwawe; kuko wanyujuje umwikomo.

¹⁸ N’iki gituma uburibge bganje bgamaho, n’igisebe canje kikaba ikitavūrika, kikanka gukira? Mbega wombera nk’uruzi ruhendana, nk’amazi akamye?

¹⁹ None rero, uku ni k’Uhoraho agize, ati Ni wahindukira nzokugarukana, ubone guhagarara imbere yanje; kandi ni warobanura ivy’ ingirakimazi ukabikūra mu vy’imburakimazi, uzoba nk’akanwa kanje: abandi baze baguhindukirire, ariko weho ntuz’ ubahindukirire.

²⁰ Kandi mur’ ubu bgoko nzoguhindura uruzitiro rukomeye rw’imiringa; bazokurwanya, ariko ntibazokunesha, kuko nzoba ndi kumwe nawe ngo ngukize, nkurokore, ni jewe Uhoraho mbivuze.

²¹ Nzokurokora ngukūre mu maboko y’ abanyakibi, kandi nzogucungura ngukūre mu maboko y’abantu b’agaterabgoba.