Yeremiya 10 - Bibliya Yera 1951 1967 (Burundi)

Itandukaniro ry’Uhoraho n’ibigirwamana

¹ Ni mwumve ijambo Uhoraho ababgira, yemwe ab’ inzu ya Isirayeli:

² uku ni k’Uhoraho agize, ati Ntimukige ingeso z’amahanga, ntimugahagarikwe imitima n’ivyitwa imbitsi ziboneka mw ijuru, kukw ari zo zihagarika amahanga imitima.

³ Kukw imigenzo y’amahanga ar’ iy’ ubusa: baca igiti co mu kibira, amaboko y’umuhumbizi akagitunganisha incabiti.

⁴ Bagisakara ifeza n’izahabu; bakagikomeresha imisumari n’inyundo, ngo coye kunyiganyiga.

⁵ Ben’ ivyo bishushanyo bisa n’ibikanganyoni bishinzwe mu mirima, bitazi kuvuga: bikwiye guterurwa kuko bidashobora kwijana. Ntimukabitinye; kuko bidashobora gukora ikibi, canke ngo bibashe gukora iciza.

⁶ Nta gihwanye nawe, Uhoraho, kuk’ uhambaye, kand’ izina ryawe rikaba irihambaye kubg’ ububasha bgawe.

⁷ Ni nde atogutinya ga Mwami w’amahanga? kuko bikubereye; kuko mu banyabgenge bose bo mu mahanga, uko bāgatsindaje kwose nk’abami, ata wuhwanye nawe.

⁸ Ariko bose uko bangana n’ibiyingiyingi n’ibipfu; ukwigisha kw’igishushanyo guhwanye n’igiti buti.

⁹ Bakoresha ifeza zātabatabge zavuye i Tarushishi, n’izahabu zavuye i Ufazi, ibikorwa vy’umuhinga, n’ivy’ amaboko y’umucuzi w’izahabu; bavyambika impuzu z’amasufe n’iz’ inyambarabami; vyose n’ibikorwa vy’abahinga.

¹⁰ Arik’ Uhoraho ni we Mana y’ukuri; ni we Mana nzima, n’Umwami yamaho ibihe bidashira: uburake bgiwe buhindisha isi agashitsi, kand’ amahanga ntashobora kwihanganira ubushangashirwe bgiwe.

¹¹ Uk’ ukwiye kubabgira n’uku: ut’ Imana zitāremye ijuru n’isi, izo ni zo zizoherengetezwa mw isi no musi y’ijuru.

¹² Rurema ni yo yaremesheje isi ubushobozi bgayo, ikayihamangirisha ubgenge bgayo, ikagaranzuza ijuru ukumenya kwayo;

¹³ iy’ ishize ijwi hejuru haba gusūma kw’amazi yo hejuru; irandisha ibipfungu bikava ku mpera y’isi; iremera imvura imiravyo, kand’ isokorora umuyaga mu bubīko bgayo.

¹⁴ Non’ umuntu wese kw ar’ ikiyingiyingi ata bgenge agira! Umucuzi w’izahabu wese azotēterezwa n’igishushanyo ciwe yasaruye, kukw igishushanyo ciwe yavugutiye mu nkero ar’ ic’ ibinyoma, kandi nta mpwemu ziba muri vyo.

¹⁵ N’ivy’ ubusa gusa, n’igikorwa c’uruhendo; igihe cabo co kūzirwa bizoherengetezwa.

¹⁶ Arik’ Umugabane w’ aba Yakobo we si kw ameze, kukw ari we Muremyi wa vyose; kand’ Abisirayeli ni bo muryango yagize ishamvu yiwe: Uhoraho Nyen’ ingabo ni ryo zina ryiwe.

¹⁷ Andūra utuntu twawe, wewe wugarijwe impande zose.

¹⁸ Kuk’ ukw ari k’Uhoraho agize, at’ Eh’ ababa mu gihugu iki gihe nzobashiburira kure, nzobababaza kugira ngo bibonereko.

¹⁹ Ewe jewe ndagowe, ndatonekaye! Uruguma rwanje rurambabaje: maze ndavuga, nt’ Ereg’ aya n’amagorwa nyene, nkwiye gupfa kuyihanganira.

²⁰ Ihema ryanje rirononekaye, imigozi yose iracitse; abana banje bamvuyeko, ntibakiriho: nta wugisigaye wo kwagura ihema ryanje, ngw abambe ibihuzu vyaryo.

²¹ Kukw abungere bācitse ibiyingiyingi, ntibagīsha Uhoraho inama: ni co cababujije kumererwa neza, kand’ imikuku yabo yose yarasābagiye.

²² Umve ijwi ry’impuha, ngw imivurungano ikomeye iraje, ivuye mu gihugu c’i burārūko, kugira ngw ibisagara vy’i Buyuda bigirwe imisaka, habe i wabo w’imbgebge.

²³ Uhoraho, nzi yukw inzira umuntu yogenderamwo atari we ashobora kuyigaba; ntibiri mu muntu agenda kwitunganiriza intambuko ziwe.

²⁴ Uhoraho, umpane, ariko bitarenze urugero: ntumpanane ishavu, ng’ uhave unzimiriza.

²⁵ Rekurira uburake bgawe ku mahanga atakuzi, no ku miryango itambaza izina ryawe, kuko bātsontsomeye aba Yakobo, mbere barabatsontsomeye barabaherengeteza, bākomvomvoye aho bāba.