Umusiguzi 4 - Bibliya Yera 1951 1967 (Burundi)

Ibibi n’amarushwa vyo mur’ ubu bugingo

¹ Nuko ndasubira nitegereza ivy’ agahahazo vyose bikorerwa musi y’izuba: kand’ eh’ amosozi y’abahahazwa ntibaronke ikibīrūra; kand’ ububasha bgari ku ruhande rw’ ababahahaza, ariko bo ntibaronke ikibīrūra.

² Ni co catumye nshima abahisi bamaze gupfa kurusha abariho bakibona;

³ mbere kurusha abo bose nshima ūtigeze kubaho, atigeze kubona amabi akorerwa musi y’izuba.

⁴ Maze mbona ubutame bgose n’ igikorwa cose c’ubuhinga, yuko kubg’ ivyo umuntu agirirwa ishari na mugenzi we. Ivyo na vyo n’ ubusa, no guhahamira umuyaga.

⁵ Igipfu kizinga amaboko, kikīrya inyama.

⁶ Urushi rumwe rwuzuye rufatanye n’impore ruruta amashi yuzuye afatanye n’ubutame no guhahamira umuyaga.

⁷ Nuko ndasubira nitegereza ubundi busa musi y’izuba.

⁸ Har’ umuntu w’inyakamwe, atagira uwundi; mbere ntagira n’umwana cank’ uwo bavukana; yamar’ umuruho wiwe wose ntugira iherezo, kand’ amaso yiwe ntahāga ubutunzi. Aribaza, ati None nduhira nde, nkiyima ivyiza? Ivyo na vyo nyene n’ubusa, mbere n’umuruho ugoye.

⁹ Babiri baruta umwe, kuko baronka impēra kubg’ ubutame bgabo.

¹⁰ Kuk’ umwe ni yatemba mugenzi we azomuvyura: arik’ ūtemvye ari wenyene, adafise ikimuvyura, aba agowe.

¹¹ Kand’ ikindi, babiri iyo baryamanye barasusuruka: arik’ umuntu umwe gusa yosusuruka ate?

¹² Nah’ umuntu yoshobora kunesha umwe, babiri bomunanira, kand’ igitsibo c’imigozi itatu ntigicika vuba.

¹³ Umuhungu mworo w’umunyabgenge aruta umwami ashāje akaba igipfu, atacemera guhanūrwa.

¹⁴ Kuko yavuye mw ibohero ngw abe umwami; mbere yavutse mu bgami bgiwe ari mworo.

¹⁵ Nitegereje abariho bose bagendagenda musi y’izuba, mbona bikumiye ku ruhande rwa wa musore umwe yakurikiye umwami ku ngoma, akamusubirira mu gishingo.

¹⁶ Abo bantu bose yaganza, ubginshi bgabo ntibgagira uko bungana: yamar’ abazobaho hanyuma ntibazomunezererwa. N’ ukuri ivyo na vyo n’ubusa, no guhahamira umuyaga.