Umusiguzi 3 - Bibliya Yera 1951 1967 (Burundi)

Imana yashingiye ikintu cose igihe caco

¹ Ikintu cose cashingiwe igihe caco, kand’ igikorwa cose musi y’ijuru gifise akanya kaco:

² har’ igihe co kuvuka n’igihe co gupfa; igihe co gutera n’igihe co kurandura ivyatewe;

³ igihe co kwica n’igihe co gukiza; igihe co gusambura n’igihe co kwubaka;

⁴ igihe co kurira n’igihe co gutwenga; igihe co kuboroga n’igihe co kuvyina;

⁵ igihe co gushibura amabuye n’igihe co kurunda amabuye; igihe co kugumbirana n’igihe co kwirinda kugumbirana;

⁶ igihe co kurondera n’igihe co gutakaza; igihe co kubungabunga n’igihe co guta;

⁷ igihe co gutabura n’igihe co kubarīra; igihe co gucereza n’ igihe co kuvuga;

⁸ igihe co gukundana n’igihe co kwankana; igihe c’intambara n’igihe c’impore.

⁹ Mbeg’ ūkora aronka inyungu ki mu vyamutamije?

¹⁰ Nitegereje umuruho Imana yahaye abana b’ abantu ng’ ubaruhishe.

¹¹ Ikintu cose yakiremye ari ciza mu gihe caco: kandi yashize ivyiyumviro vy’ibihoraho mu mitima yabo, nah’ umuntu adashobora guserangura igikorwa Imana yakoze uhereye kw itanguriro ugashitsa kw iherezo.

¹² Ndazi yukw ata kintu kibagirira ikimazi kuruta kunezerwa no gukora ivyiza imisi yose bakiriho;

¹³ kand’ ikindi, yuk’ ubuntu bg’Imana ar’ uk’ umuntu wese yorya, akanywa, akanezererwa ivyiza mu butame bgiwe bgose.

¹⁴ Ndazi yukw ico Imana ikora cose kizokwamaho: nta kintu gishobora kwongerwa kuri co, kandi nta kintu gishobora gukūrwa kuri co: Imana ni yo yagikoze, kugira ngw abantu bayubahe.

¹⁵ Ikiriho ni co cāhozeho, kand’ ikizobaho na co cāhozeho: kand’ Imana isubira kugarukana icamaze guhita.

¹⁶ Kand’ ikindi nongeye kubona musi y’izuba n’uko mw ikombe ry’imanza har’ ukugabitanya; no mw ikombe ry’ubugororotsi na ho har’ ukugabitanya.

¹⁷ Navuze mu mutima, nt’ Imana izocira imanza umugororotsi n’umunyakibi: kuko kuri yo ari ho har’ igihe c’ikibaho cose n’igikorwa cose.

¹⁸ Navuze mu mutima, nti Bimera birtyo kubg’ abana b’abantu, kugira ngw Imana ibagerageze, no kugira ngo babone ubgabo ko bameze nk’ibikōko gusa.

¹⁹ Kukw iherezo ry’abana b’abantu ari ryo herezo ry’ibikōko; iherezo ni rimwe: nk’uko bapfa ni ko bipfa; mbere vyose bihumeka kumwe, kand’ umuntu nta co asumbije ibikōko: kuko vyose ar’ ubusa.

²⁰ Vyose bija ahantu hamwe; vyose biva mu mukungugu, kandi vyose bizosubira mu mukungugu nyene.

²¹ Impwemu z’umuntu iyo zimuvuyemwo, ni nde yomenya ko zidūga? Cank’ impwemu z’igikōko iyo zikivuyemwo ko zimanuka mu kuzimu?

²² Ni co catumye mbona yukw ata kintu kirenze ibi, umuntu kunezererwa ibikorwa vyiwe; kukw ico ari co mugabane wiwe: none ni nde azomugarukana kurāba ibizobaho hanyuma yiwe?