Umusiguzi 10 - Bibliya Yera 1951 1967 (Burundi)

Ubgenge n’ubupfu uko bimeze

¹ Isāzi zipfuye zituma amavuta yinjijwe n’abahinga babimogoreye anuka umuduhu: ni ko n’ubupfu naho bgoba buke bgonona ubgenge n’icubahiro.

² Umutima w’umunyabgenge umuroresha i buryo, arik’ umutima w’igipfu ukiroresha i bufuti.

³ Mbere kandi, igipfu iyo kigenda mu nzira, ubgenge bgaco burazimira, kikabarira umuntu wese, ng’ Ur’ igipfu!

⁴ Uburake bg’ūganza ni bgakugurumanira, ntutirimuke ah’ uri; kuko kwiyorosha gutesha ibicumuro bikomeye.

⁵ Har’ ikibi nabonye musi y’izuba, umenga n’ifuti ryavuye k’ ūganza:

⁶ ubupfu gushirwa hejuru cane, abapfasoni bakicara mu mwanya w’inyuma.

⁷ Nabonye abashumba bagendera ku mafarasi, abaganwa na bo bagendesha amaguru hasi nk’abashumba.

⁸ Uwimba icobo azogikorokeramwo, kand’ ūmena urugo inzoka izomukomora.

⁹ Uwimba amabuye azomukomeretsa, kand’ ūsatura ibiti bimushira mw irinde.

¹⁰ Incabiti iy’ ipfushe, umuntu ntayikarishe, azoba akwiye kwongerakw inkomezi zo gushimika; arik’ ubgenge bugira ikimazi mu kurōngōra umuntu.

¹¹ Inzoka iy’ ikomoye itaragotwa, uwari kuyigota nta co aba akimaze.

¹² Amajambo yo mu kanwa k’umunyabgenge n’ay’ igikundiro; arik’ umunwa w’igipfu uzogicisha umutwe.

¹³ Intango y’amagambo yo mu kanwa kaco n’ubupfu, kand’ iherezo ry’ibivuye mu kanwa kaco n’ibisazi vy’icago.

¹⁴ Kand’ igipfu gihogomboka mu magambo; umuntu ntazi ibizobaho; kand’ ibizobah’ inyuma yiwe yobibgirwa na nde?

¹⁵ Ibikorwa vy’igipfu cose birakiruhisha, kuko kitazi n’ inzira ija i bgami.

¹⁶ Uzobona ibara, wa gihugu, umwami wawe iy’ ar’ umwana, abaganwa bawe bakazindukira kurya.

¹⁷ Uzoba uhiriwe, wa gihugu, umwami wawe iy’ ar’ uwo mu nda y’abami, abaganwa bawe bakarīra mu gihe gikwiye, kugira ngo baronke inkomezi, atar’ ukugira ngo baborerwe.

¹⁸ Ubute butuma inzu igira ibibonde, kand’ ubunebge bg’amaboko butuma inzu iva.

¹⁹ Amazimano azimanirwa gutera akanyamuneza, kandi vino inezereza umushaha: arikw amahera ni bimari vya vyose.

²⁰ Ntukavume umwami, eka naho vyoba mu vyiyumviro vyawe; kandi ntukavume umutunzi naho woba haruguru mu mpete: kukw inyoni yo mu kirēre izoritwara, kand’ igisīga kizovyandagaza.