Umusiguzi 1 - Bibliya Yera 1951 1967 (Burundi)

Mu bintu vyose nta kimazi

¹ Amajambo y’Umusiguzi, ni we mwene Dawidi, umwami aba i Yerusalemu.

² N’ubusa gusa, ni k’Umusiguzi agize; n’ubusa gusa, vyose n’ubusa.

³ Mbeg’ umuntu aronka inyungu ki mu butame bgiwe bgose ubg’ atamira musi y’izuba?

⁴ Urwaruka rumwe ruragenda, rukabisa urundi; isi igahorah’ ibihe vyose.

⁵ Izuba na ryo rikarasa, hanyuma rikarenga, rikihutira gusubira ahantu haryo rizorasira.

⁶ Umuyaga ushira i bumanuko, ugahindura ushira i burārūko; uhindagura akanya kose mu rugendo rwawo, maz’ ugasubira mu gushira irya n’ino kwawo.

⁷ Inzūzi zose zitembera mu kiyaga, yamar’ ikiyaga nticuzura; ahantu inzūzi zija ni ho zama zishishikara.

⁸ Ibintu vyose vyuzuye uburuhe; n’ubg’ umuntu atovuga: ijisho ntirihāga kurāba, n’ugutwi ntiguhāga kwumva.

⁹ Icāhozeho ni co kizobaho, kand’ icākozwe ni co kizokorwa: kandi nta kintu gisha kiriho musi y’izuba.

¹⁰ Mbega har’ ikintu abantu bavuga, bat’ Ehe rāba, iki ni gisha? Erega kiba carabayeho kera, mu bihe tutaribgabeho.

¹¹ Ivy’ ibihe vyahise ntibicibukwa, kand’ ivy’ ibihe bizoza ntibizoba bicibukwa n’abazobikurikira.

Ubgenge nta kimazi

¹² Jewe Umusiguzi nar’ umwami w’Abisirayeli i Yerusalemu.

¹³ Nashize umutima wanje ku kuronderesha ubgenge no kubuserangurisha ibikorerwa musi y’ ijuru vyose: n’umuruho ugoye, Imana yahaye abana b’abantu ng’ ubaruhishe.

¹⁴ Namaze kubona ibikorwa vyose bikorerwa musi y’izuba; nasanze vyose ar’ ubusa, ar’ uguhahamira umuyaga.

¹⁵ Ikigoramye ntigishobora kugororwa, kand’ igihaze ntigishobora guharūrwa.

¹⁶ Nibgiye mu mutima wanje, nt’ Ehe nironkeye ubgenge bginshi kurusha abanyitangiye imbere bose i Yerusalemu: mber’ umutima wanje wiboneye ubgenge bginshi n’ukumenya.

¹⁷ Kandi nashize umutima wanje ku kumenya ubgenge, no ku kumenya ubujuju n’ubupfu ivy’ ari vyo: na vyo nyene nabonye kw ar’ uguhahamira umuyaga.

¹⁸ Kuko mu bgenge bginshi harimw’ intuntu nyinshi, kand’ ūgwiza ukumenya aba agwije umubabaro.