Tito 2 - Bibliya Yera 1951 1967 (Burundi)

Uk’ Umukristo akwiye kumera

¹ Ariko weho uvuge ibihwanye na kwa kwigisha kuzima.

² Bgira abatāma boye kurenza urugero, babe inyankamugayo, badahugumba, babe abahangaye mu kwizera no mu rukundo no mu kwihangana.

³ N’abatāmakazi nyene, ubabgire bagende nk’uko bibereye abera, batarementaniriza abandi, batanohorwa imitima na vino nyinshi, bigisha ivyiza,

⁴ kugira ngo batoze abagore bakiri bato ubgenge bgo gukunda abagabo babo n’abana babo,

⁵ no kudahugumba, no kwirinda ubgēruzi, no kwubaka ingo zabo, no kuba inda nziza, bagororokere abagabo babo, kugira ngw ijambo ry’Imana ntiritukwe.

⁶ N’imisore n’uko ubahanūre ntibahugumbe;

⁷ nawe ubgawe wiyerekane muri vyose nk’icitegererezo c’ibikorwa vyiza, ugire ukwigisha kudatosekaye, ube inyankamugayo,

⁸ ugire n’ijambo rizima ritogawa, kugira ng’ umuntu ari mu ruhande rw’abansi amāramāre, abuze ikibi yotuvuga.

⁹ Hanūra abagurano bagororokere ba shebuja, babahimbare muri vyose, ata guhārīra,

¹⁰ badakorakora, ariko berekane ukuyoboka kwiza kwose, kugira ngo muri vyose basharize ivyigishwa vy’Imana, Umukiza wacu.

Uk’ ubuntu bg’Imana bgatuzaniye agakiza

¹¹ Kuk’ ubuntu bg’Imana bgaserutse, buzanira abantu bose agakiza,

¹² butwigisha kwikunkumura ukutubaha Imana n’ukwifuza ivy’ isi, bukatwigisha kwama tudahugumba, tugororoka, twubaha Imana, mu gihe ca none,

¹³ twitega ivyizigiro vy’amahirwe no kuzoseruka kw’ubgiza bga Yesu Kristo, ni we Mana yacu ihambaye n’Umukiza,

¹⁴ yatwiguze kugira ngw aducungure, adukūrekw ivyo twagabitanije vyose, kandi yihumanurire ubgoko ngo babe icibare ciwe, barwane ishaka ry’ibikorwa vyiza.

¹⁵ Wame uvuga ivyo, ubahanūra, ubahana, nk’ūfise ububasha rwose. Ntihakagire ūgukēngēra.