Rusi 1 - Bibliya Yera 1951 1967 (Burundi)

Elimeleki na Nawomi basuhukira i Mowabu

¹ Mu misi y’abacamanza ikigoyi cateye mu gihugu. Nuk’ umugabo w’i Betelehemu h’i Buyuda asuhukira mu gihugu c’i Mowabu, bo n’umugore wiwe n’abahungu biwe bompi.

² Uwo mugabo yitwa Elimeleki, umugore wiwe yitwa Nawomi, abahungu biwe bompi umwe yitwa Mahaloni, uwundi yitwa Kiliyoni, bār’ Abanyefurata b’i Betelehemu h’i Buyuda. Bashika mu gihugu c’i Mowabu, babayo.

³ Elimeleki, umugabo wa Nawomi, arapfa; asigarana n’abahungu biwe bompi.

⁴ Bābīra Abanyamowabukazi; umwe yitwa Orupa, uwundi yitwa Rusi: bamaray’ imyaka nk’ icumi.

⁵ Maze Mahaloni na Kiliyoni bompi barapfa; uwo mugore abura abana biwe bompi n’umugabo wiwe.

Rusi yanka guheba inabukwe

⁶ Bukeye avana hasi n’abakazana biwe, kugira ngw ave mu gihugu c’i Mowabu asubire i wabo: kuko yari yumvise ari mu gihugu c’i Mowabu yuk’ Uhoraho yagendeye abantu biwe, akabaha ivyo kurya.

⁷ Ava aho hantu yar’ ari, bo n’abakazana biwe bompi, bajana inzira isubira mu gihugu c’i Buyuda.

⁸ Nawomi abgira abakazana biwe bompi, ati Ni mugende, musubire mu mazu ya ba nyoko: Uhoraho abagirire neza, nk’uko mwagiriye neza abahisi, bo nanje.

⁹ Uhoraho abahe mwempi gusubira kwubaka ingo mugire abagabo. Arabagūmbīra, baraturikisha, bararira.

¹⁰ Baramwishura, bat’ Oya, ariko turasubiranayo nawe mw ihanga ryanyu.

¹¹ Nawomi arabishura, ati Bakobga banje, ni mwisubirire inyuma: n’iki gitumye mugomba kujana nanje? Har’ abandi bana ngifise mu nda, ngo baze babe abagabo banyu?

¹² Ni mwisubirire inyuma, bakobga banje, mwīgīre; kuko ndenze gucūrwa. Iyo mba mvuzeho, nti Ndi n’ivyizigiro; ndeke naho noronka umugabo iri joro nyene nkazovyara abahungu;

¹³ mbeg’ ivyo vyotuma mubarīndīra gushitsa aho bazokurira? Ivyo vyotuma mureka kurondera abagabo? Vyoye kuba birtyo, bakobga banje, kuko muntera akagongwe, kuk’ ukuboko kw’Uhoraho kwaramvuriye kundwanya.

¹⁴ Barongera baraturikīsha, bararira: Orupa agūmbīra inabukwe, ariko Rusi we amugumakw akaramata.

¹⁵ Nawomi aravuga, ati Rāba, mugenzawe asubiye mu b’i wabo no ku mana yabo: nawe subirayo, ukurikire mugenzawe.

¹⁶ Rusi aramwishura, ati Reka kunyinginga kuguheba, no gusubira inyuma ngo noye kugukurikira; kukw ah’ uzoja ari ho nzoja, kand’ ah’ uzorāra ari ho nzorāra; ihanga ryanyu ni ryo rizoba ihanga ryacu, Imana yawe ni yo izoba Imana yanje;

¹⁷ ah’ uzogwa ni ho nzogwa, bahampambe: Uhoraho arakabimpanira, kandi birushirije, ni nagira ikizontandukanya nawe, atar’ urupfu.

¹⁸ Nawomi abonye yukw amaramaje kujana na we aca arahora.

¹⁹ Nuko bompi barajana kurinda bashika i Betelehemu. Nuko rero bashitse i Betelehemu abo mu gisagara bose barashwabāduka, abagore barabazanya, bati Mbeg’ uyo yoba Nawomi?

²⁰ Arabishura, ati Ntimube mukinyita Nawomi, ariko munyite Mara; kuko Rugira Vyose ivyo yangiriye vyambereye umururāzi.

²¹ Navuye ino nninahaye, Uhoraho angarukanye i wacu nd’ imbokoboko: munyitira iki Nawomi, Uhoraho ko yantuntuje, kandi Rugira Vyose akaba yanteye ivyago?

²² Uko ni ko Nawomi yagarukanye na Rusi Umunyamowabukazi umukazana wiwe, bavuye mu gihugu c’i Mowabu: bashika i Betelehemu mw itangura ry’igenya rya sayiri.