Nehemiya 9 - Bibliya Yera 1951 1967 (Burundi)

Abisirayeli barisonzesha, barihana

¹ Maze ku musi ugira mirongwibiri na kane wo mur’ ukwo kwezi, Abisirayeli barakorana, barisonzesha bambaye amagunira, bīrengeje imikungugu ku mitwe.

² Ab’ uruvyaro rwa Isirayeli bītandukanya n’abanyamahanga bose, barahagarara bātura ivyaha vyabo n’ibicumuro vya ba sekuruza.

³ Bahagarara aho bari, bamara igice ca kane c’umurango basoma igitabo c’ivyagezwe vy’ Uhoraho Imana yabo, ikindi gice ca kane nyene bakimara bātura ivyaha vyabo, basenga Uhoraho Imana yabo.

⁴ Maze Yosuwa na Bani na Kadimiyeli na Shebaniya na Buni na Sherebiya na Bani wundi na Kenani bahagarara ahataramutse hubakiwe Abalewi, bashira ijwi hejuru batakambira Uhoraho Imana yabo.

⁵ Nukw abo Balewi, Yosuwa na Kadimiyeli na Bani na Hashabuneya na Sherebiya na Hodiya na Shebaniya na Petahiya baca baravuga, bati Ni muve hasi muhimbaze Uhoraho Imana yanyu, nk’uko vyamye uhereye kera hose ugashitsa ibihe bitazoshira. Baraheza bahimbaza izina ryiwe ry’icubahiro, ari ryo rishizwe hejuru gusumba ah’ ugushima kwose n’uguhimbaza kwose bigarukira.

Ezira ashemagiza Uhoraho

⁶ Ezira araheza aravuga, ati Ni wewe Uhoraho wenyene nta wundi, ni wewe waremye ijuru, mbere n’amajuru asumba ayandi, n’ ingabo zose zo kuri yo; waremye n’isi n’ibiri kuri yo vyose, n’ibiyaga n’ibiri muri vyo vyose, kandi ni wewe ubibeshaho vyose; ingabo zo kw ijuru ziraguhimbaza.

⁷ Uhoraho Mana, ni wewe watoye Aburamu, umukūra muri Uri h’i Bukaludaya, umwita izina Aburahamu;

⁸ wabonye umutima wiwe kw ar’ uwo kwizigirwa imbere yawe, usezerana na we isezerano ryo kuzoha uruvyaro rwiwe igihugu c’Abanyakanani n’ic’ Abaheti n’ic’ Abamori n’ic’ Abaferizi n’ic’ Abayebusi n’ic’ Abagirugashi; kand’ iryo sezerano wararishikije kuko wama ugororoka.

⁹ Wabonye ivyago vya ba sogokuruza bacu bari muri Egiputa, wumva ugutakamba kwabo bari ku Kiyaga Gitukura,

¹⁰ werekanye ibimenyetso n’ibitangaza kuri Farawo no ku basavyi biwe no ku bantu bose bo mu gihugu ciwe, kuko war’ uzi ko bāgenda babīhayagizako. Uko ni ko wironkeye izina rya rurangiranwa, ari ryo ugifise na bugingo n’ubu.

¹¹ Watandukanije ikiyaga mu maso yabo, na bo bagicamwo nk’ abagenda ku musozi, arikw ababakurikiye babahīga ubakororera i bgina, badobera mu mazi maremare nk’ ibuye.

¹² Ubarōngōza inkingi y’igicu ku murango n’ inkingi y’umuriro mw ijoro, kugira ng’ ubamurikire mu nzira bacamwo.

¹³ Uramanuka uhagarara ku musozi Sinayi, uvugana na bo uri mw ijuru, ubaha amateka agororotse n’ivyagezwe vy’ukuri, n’ivyashinzwe bo n’amabgirizwa vy’agahore.

¹⁴ Wabamenyesheje isabato yawe yera, ubashirirah’ amabgirizwa n’ivyashinzwe n’ ivyagezwe, ubitumye umusavyi wawe Mose.

¹⁵ Ubaha umutsima uvuye mw ijuru wo kubamara inzara, ubaha n’amazi adudubiza mu gitandara yo kubamara inyota, ubagera kuja kwinjira igihugu warahiye k’uzokibaha.

¹⁶ Ariko ba sogokuruza bacu babaye intahetwa, bagamika amazosi, ntibumvira amabgirizwa yawe;

¹⁷ banka kuyumvira, canke ngo bibuke ibitangaza wakoze muri bo; ariko bagamika amazosi yabo, baragarariza, bironderera umugabisha ngo basubire mu buja bāhozemwo. Ariko wewe ur’ Imana ikunda guharira, ur’ inyabuntu, wuzuye imbabazi, uteba kuraka, ugira ikigongwe cinshi; nuko rero ntiwabataye.

¹⁸ Mbere naho bicuriye igishushanyo c’ imasa kivugutiwe, bakavuga, bat’ Eh’ imana yanyu yabakuye muri Egiputa! bagakora ivyo kukuratsa bikomeye;

¹⁹ ariko na ho nyene kubg’ imbabazi zawe nyinshi ntiwabataye mu bugaragwa; inkingi y’igicu ntiyabavuye imbere ku murango ibarōngōra mu nzira, cank’ inkingi y’umuriro mw ijoro yo kubamurikira, ngw ibereke inzira bacamwo.

²⁰ Wabahaye Mpwemu wawe mwiza wo kubaha ubgenge, ntiwabimye manu yawe yo kurya, ubaha n’amazi yo kubamara inyota.

²¹ Wabatungiye mu bugaragwa kumara imyaka mirongwine, ntibāgira ico bakena; impuzu zabo ntizabashirirako, ibirenge vyabo ntivyavyimba.

²² Wabagabiye ibihugu vy’abami ubaha n’amahanga, ubagabanganya imigabane nk’ukw imiryango yabo iri, begukira igihugu ca Sihoni umwami w’i Heshiboni, n’ igihugu ca Ogi umwami w’i Bashani.

²³ Wagwije abana babo bangana n’inyenyeri zo kw ijuru, ubashira mu gihugu wabariye ba sekuruza babo ngo bacinjire bacegukire.

²⁴ Nukw abo bana babo baraza binjira ico gihugu baracegukira, nawe unesha imvukira zaho ari bo Banyakanani, ubagabura mu maboko yabo, hamwe n’abami babo n’abantu bo mur’ ico gihugu, kugira ngo babagirire uko bashaka.

²⁵ Batsinda ibisagara bikomeye bifise inzitiro z’amabuye, bashikīra n’intāra zimera cane, binjira n’amazu yuzuye ivyiza vyose, bashikīra n’ ivyobo vyimbiwe kubīka amazi, n’imirima y’imizabibu n’iy’ imyelayo, n’ibindi biti vyama vy’isinzi, bararya barahāga baravyibuha, bidibamira mu vyiza vyose wabahaye.

²⁶ Ariko ntibakwumviye, barakugarariza, bashiburira ivyagezwe vyawe inyuma yabo, bica abavugishwa nawe bāhora babahanura ngo babasubize kuri wewe, bakora ivyo kukuratsa bikomeye.

²⁷ Ni co catumye ubagabura mu maboko y’abansi babo babashira mu vyago. Maze babonye bari mu vyago, ngo bagutakambire ukabumva uri mw ijuru, ukarungika ababatabara, bakabakūra mu maboko y’abansi babo kubg’ imbabazi zawe nyinshi.

²⁸ Yamara ngo babone impore, bagasubira gukorera ibibi imbere yawe, nawe ukongera kubagabura mu maboko y’abansi babo bakabaganza. Mugabo, basubiye kugutakambira ukabumva uri mw ijuru, ukabarokora ibihe n’ibihe kubg’ imbabazi zawe.

²⁹ Wama ubahanura kugira ngo basubire gukurikira ivyagezwe vyawe, ariko bo bakagira ubgibone, ntibumvire ivyagezwe vyawe, bagacumura ku mabgirizwa yawe, kand’ ari yo abeshah’ umuntu iy’ ayitondeye; bagakūtsa ibitugu, bakagamika amazosi, bakanka kwumva.

³⁰ Wamaze imyaka myinshi ubihanganira, watumye Mpwemu wawe kubahanura, avugiye mu bavugishwa bawe, ariko banka kwumva; ni co catumye ubagabura mu maboko y’abanyamahanga bo mu bindi bihugu.

³¹ Yamara naho bimeze birtyo, imbabazi zawe nyinshi zakubujije kubahonnya rwose, ntiwabata, kuk’ ur’ Imana y’inyabuntu kandi y’imbabazi.

³² None, Mana yacu, Mana nkuru, uhambaye uteye ubgoba, ni wewe ugumya isezerano n’ikigongwe, turakwinginze amagorwa yose twabonye ntuyite ikintu coroshe, ayatubayeko twe n’abami bacu, n’abakuru bacu, n’abaherezi bacu, n’abavugishwa bacu, na ba sogokuruza bacu, eka n’abantu bawe bose, uhereye igihe c’abami b’i Ashuri ugashitsa na bugingo n’ubu.

³³ Ariko mur’ ivyo vyose vyatubayeko, weho wama uboneka ugororotse, wama ukora ibiroranye, yamara twebge twakoze ibibi.

³⁴ Abami bacu n’abakuru bacu n’abaherezi bacu na ba sogokuruza bacu ntibitondeye ivyagezwe vyawe, ntibumviye amabgirizwa yawe n’imbūri wababūriye.

³⁵ Ariko mu kuganza kwabo, no mu vyiza vyinshi wabahaye, no mu gihugu kininiya kimera cane wabagabiye, ntibāgukoreye ngo bahindukire bareke ibikorwa vyabo bibi.

³⁶ Rāba none twebge tur’ abaja! Rāba twagizwe abaja mu gihugu wahaye ba sogokuruza ngo bakibemwo, bacimburiremwo, barye ivyiza vyaco vyose.

³⁷ Ereg’ imyimbu myinshi abami waduhaye ngo batuganze kubg’ ivyaha vyacu, ni bo bayimburirwa; badufisek’ ubushobozi bgo kutugirira uko bagomba, ari ku mitumba yacu, ari ku nka zacu; eka turagowe rwose!

Abisirayeli basezerana kwitondera ivyagezwe

³⁸ Nuko kubg’ ivyo dusezerana isezerano ry’intahava, turaryandika; maz’ abakuru bacu n’Abalewi bacu bo n’abaherezi bacu barishirakw ikimenyetso kidomye mw ishashara.