Nehemiya 6 - Bibliya Yera 1951 1967 (Burundi)

Abansi bagerageza gutesha igikorwa c’Imana

¹ Bukeye babgira Sanibalati na Tobiya na Geshemu Umwarabo n’abandi bansi bacu, yuko nujuje uruzitiro kandi kw ata kirengero kigisigaye, naho ntaribgatere inzugi ku marembo.

² Nuko Sanibalati na Geshemu baca bantumako ngo ngende duhūrire mu mihana yo mu kiyaya c’i Ono. Arikw ico bāgomba kwar’ ukungirira nabi.

³ Maze mbatumakw intumwa, mut’ Arikw arakora igikorwa gihambaye, ntashobora kuza; muti Ntiyota igikorwa ngo gihagarare, ngw amanuke abasange iyo.

⁴ Bantumako bartyo ibihetangabo bine, nanje ngenda mbishura kwa kundi nyene.

⁵ Ubugira gatanu Sanibalati asubira kuntumak’ umuntu wiwe kuno nyene, amurungikana n’ icete kitazinze,

⁶ canditswemwo ngo Mu mahanga humvikana impuha, kandi na Geshemu aravyemeza, yuko wewe n’Abayuda muri n’imigabo yo kugarariza, kandi kw ari yo nyanduruko yatumye mwubaka uruzitiro, kandi nawe ng’ ugomba kwiyimika.

⁷ Bitayeko ngo Washizeho ba kamenyi bo kukwāmāmaza i Yerusalemu, ngo Mu Bayuda har’ umwami. Izo nkuru ntibobura kuzibgira umwami: none rero n’ uze tubivugane.

⁸ Ndaheza ntuma kumwishura, ut’ Ivyo uvuga nta ho vyigeze bibaho, ut’ Ariko ni wewe wavyigeneye gusa.

⁹ Kuko bose bāgomba kudutera ubgoba, bati Bazohava bacika intege, igikorwa gihere aho. Ariko none Mana, undemeshe.

Shemaya agerageza guca umutima Nehemiya

¹⁰ Bukeye ninjira mu nzu ya Shemaya mwene Delaya, Delaya wa Mehetabeli, kand’ uyo yari yiyugaranye; arambarira, at’ Ingo tuje kubonanira mu ngoro y’ Imana, mu rusengero hagati, twugare inzugi, kuko haza kuza abantu bo kukwica: mbere mur’ iri joro nta kabuza barakwica.

¹¹ Nanje ndamwishura, nti Mbeg’ umuntu nkanje nohunga? Kand’ umuntu nkanje yokwinjira mu rusengero ngo yikize? Eka sinjayo!

¹² Maze mvyitegereje mmenya kw atar’ Imana yabimutumye, ariko yaje kubimbgira kuko Tobiya na Sanibalati bāri bāmuhēreye.

¹³ Bāmuhēreye ngw antere ubgoba, mpeze nemere inama yiwe, mbe ncumuye, na bo ngo baronke urwitwazo rwo kwanda inkuru mbi no kunyambika ibara.

¹⁴ Ndaheza ndasenga, nt’ Ewe Mana yanje, uze wibuke Tobiya na Sanibalati kubg’ ivyo bakoze, hamwe na Nowadiya wa mumenyikazi, n’abandi ba kamenyi bashatse kuntera ubgoba.

Basozera uruzitiro

¹⁵ Ku musi ugira mirongwibiri na gatanu w’ukwezi kwa Eluli ni ho twarangije uruzitiro, tumaze imisi mirongwitanu n’ibiri turwubaka.

¹⁶ Maz’ abansi bacu bose bavyumvise, bo n’abanyamahanga bose bo ku mpande zacu zose, bagira ubgoba, baratētērwa, kuko bamenye kw ar’ Imana yacu yadushoboje kurangiza igikorwa kingana girtyo.

¹⁷ Kandi mur’ iyo misi abakuru b’i Buyuda na Tobiya bandikiranira ivyete vyinshi.

¹⁸ Kandi benshi bo mu Bayuda bari bafitaniye amasezerano na we, kuko yar’ umukwe wa Shekaniya mwene Ara, kand’ umuhungu wiwe Yohanani yar’ afise umukobga wa Meshulamu mwene Berekiya.

¹⁹ Kandi bama bambgira ivyiza kuri we, bakongera bakamubgira amajambo yanje; Tobiya na we akandungikira ivyete vyo kuntera ubgoba.