Matayo 8 - Bibliya Yera 1951 1967 (Burundi)

Yesu akiza umunyamibembe

¹ Amanutse uwo musozi, ishengero ryinshi riramukurikira.

² Maz’ umunyamibembe aza kuri we, aramupfukamira, ati Mugenzi, ukunze, woshobora kumpumanura.

³ Aramvura ukuboko, amukorako, ati Ndakunze, humanuka.

⁴ Bun’ aca akira imibembe yiwe. Yesu aramubgira, ati Wirinde, ntugire uwo ubgira, ariko genda wiyereke umuherezi, utange ishikanwa ryagezwe na Mose, ribe ikimenyetso kibabere icabona.

Yesu akiza umushumba w’umugabisha w’abasoda

⁵ Ashitse i Kaperinawumu, haza umugabisha w’abasoda ijana, aramwinginga,

⁶ ati Mushingantahe, umuhungu wanje n’ikimuga, aryamye mu nzu, arasinzikaye cane.

⁷ Aramubgira, ati Ndaje kumukiza.

⁸ Umugabisha aramwishura, ati Mugenzi, ntibimbereye ko winjira mu nzu yanje; vuga ijambo gusa, uwo muhungu arakira.

⁹ Kuko nanje nd’umuntu agendera musi y’abanganza, mfise abasoda ntwara: iyo mbariye umwe, nti Genda, aragenda; n’uwundi nti Ngwino, akaza; nabarira umushumba wanje, nti Kora iki, akagikora.

¹⁰ Yesu avyumvise, biramutangaza, abgira abamukurikiye, ati Ndababgire ukuri: Sinaribgabone ukwizera kungana gurtyo no mu Bisirayeli.

¹¹ Ndababgira yuko benshi bazoza, bavuye i burasirazuba n’i burengerazuba, bazokwicarana na Aburahamu na Isaka na Yakobo mu bgami bgo mw ijuru;

¹² arikw abana b’ubgo bgami bazohindirwa hanze mu mwiza, ni ho hazoba amarira no kuryanya insya z’amenyo.

¹³ Yesu abgira uwo mugabisha, at’ Igīre, bikubere nk’uko wizeye. Nuko wa muhungu akira uno mwanya.

Yesu akiza inabukwe wa Petero

¹⁴ Yesu yinjiye mu nzu kwa Petero, abona inabukwe aryamye afashwe n’umururumbo.

¹⁵ Amukora ku kuboko, umururumbo urazima; aravyuka, aramuzimana.

¹⁶ Ku kagoroba, bamuzanira benshi binjiwemwo n’abadayimoni; izo mpwemu mbi azirukanisha ijambo, akiza abāri barwaye bose,

¹⁷ ngw ivyavuzwe n’uwavugishwa n’Imana Yesaya biboneke, ng’ Ubgiwe ni we yatwara ubumuga bgacu, akikorera n’indwara zacu.

Gukurikira Yesu

¹⁸ Yesu abonye ishengero ryinshi rimukikije, agera ko bajabuka hakurya.

¹⁹ Haza umunyabgenge w’ivyanditswe, aramubgira, ati Mwigisha, ndagukurikira ah’ uja hose.

²⁰ Yesu aramubgira, at’ Imbgebge ziri n’imyobo, n’ibiguruka mu kirēre biri n’ivyari; arik’ Umwana w’umuntu we ntagira ah’ arambika umusaya.

²¹ Uwundi mu bigishwa aramubgira, ati Mugenzi, banza undekure, ngende mpambe data.

²² Ariko Yesu aramubgira, ati Nkurikira, reka abapfuye bahambe abapfuye babo.

Inkūbi y’umuyaga mu kiyaga

²³ Atambukira mu bgato, abigishwa biwe baramukurikira.

²⁴ Haza igihuhuta gikomeye mu kiyaga, bituma ubgato buzimirira mu mipfunda: ariko we yar’ asinziriye.

²⁵ Baraza baramukangura, bati Mugenzi, dukize, turapfuye.

²⁶ Arababaza, ati N’iki kibateye ubgoba, mwa bafise ukwizera guke mwe? Bun’ aravyuka azibiza ingunza n’ikiyaga, haba agahwekere rwose.

²⁷ Maz’ abo bantu baratangara, bat’ Uyu n’umuntu ki, umuyaga n’ikiyaga ko bimwumvira?

Yesu asenda abadayimoni mu bantu babiri

²⁸ Afashe hakurya mu gihugu c’Abagadareni, babiri binjiwemwo n’abadayimoni baramusanganira bava mu masenga y’imva, bari bakaze cane, bituma ata wushobora guhita mur’ iyo nzira.

²⁹ Barasemerera, bati Duhuriye hehe ga Mwana w’Imana? Uje hano kutubabaza agashinyaguro igihe cacu kitarashika?

³⁰ Kure yabo hār’ umukuku w’ingurube nyinshi zirisha.

³¹ Abadayimoni baramwinginga, bati Namb’ udusenda, uturungike mur’ uriya mukuku w’ingurube.

³² Arababgira, ati Ni mugende. Babasokorokamwo, baragenda, baja mur’ izo ngurube. Wa mukuku wose wirukira ku gatembge, zīsuka mu kiyaga, zihonera mu mazi.

³³ Abāziragira barahunga; bashitse mu gisagara bavuga ivyo babonye vyose n’ivy’ abāri binjiwemwo n’abadayimoni.

³⁴ Abo mur’ ico gisagara bose baja gusanganira Yesu. Bamubonye, baramwinginga ngw ave mu ntāra yabo.