Matayo 4 - Bibliya Yera 1951 1967 (Burundi)

Yesu ageragezwa na Satani

¹ Buno Yesu adūganwa na Mpwemu mu bugaragwa ngw ageragezwe n’Umurwanizi.

² Amaze imisi mirongwine n’amajoro mirongwine yisonzesheje, abona gusonza.

³ Umugeragezi aza kuri we, ati Ni waba ur’ Umwana w’Imana, bgira aya mabuye acike imitsima.

⁴ Aramwishura, ati Vyanditswe ng’ Umuntu ntatungwa n’umutsima gusa, arikw atungwa n’ijambo ryose riva mu kanwa k’Imana.

⁵ Bun’ Umurwanizi amujana mu gisagara cera, amuhagarika ku gatwe k’urusengero,

⁶ aramubgira, ati Ni waba ur’ Umwana w’Imana, ikororere hasi, kuko vyanditswe, ngw Azokuragiza abamarayika biwe, Na bo bazokuramira mu maboko yabo, Ngo kumbure ntutsitare kw ibuye.

⁷ Yesu aramubgira, ati Vyongeye haranditswe, ngo Ntukagerageze Uhoraho, Imana yawe.

⁸ Umurwanizi yongera kumujana ku musozi uhagaze cane, amwereka ubgami bgose bgo mw isi n’ubgiza bgabgo,

⁹ at’ Ivyo vyose ndabiguha, ni wampfukamira, ukansenga.

¹⁰ Buno Yesu aramubgira, ati Mvako, Satani, kuko vyanditswe, ng’ Uhoraho, Imana yawe, abe ari yo usenga, kand’ abe ari yo usaba yonyene.

¹¹ Maz’ Umurwanizi aramureka, kand’ abamarayika baraza, baramukorera.

Yesu yigishiriza i Kaperinawumu

¹² Yumvise ko Yohana yashizwe mw ibohero, aja i Galilaya.

¹³ Yimuka i Nazareti, aja kuba i Kaperinawumu hafi y’ikiyaga mu rugabano rwa Zebuloni na Nafutali,

¹⁴ ngw ivyanditswe na Yesaya yavugishwa n’Imana bishike,

¹⁵ ngw Igihugu ca Zebuloni n’igihugu ca Nafutali, Aherekeye ku kiyaga, hakurya ya Yorodani, I Galilaya h’abanyamahanga,

¹⁶ Abantu bāri bicaye mu mwiza, Babonye umuco mwinshi, Kand’ abāri bicaye mu gihugu c’urupfu no mu gitutu carwo, Umuco urasiye kuri bo.

¹⁷ Guhera ubgo, Yesu atangura kwigisha, ati Mwihane, kuk’ ubgami bgo mw ijuru buri hafi.

Yesu ahamagara abigishwa biwe ba mbere

¹⁸ Aciye i ruhande y’ikiyaga c’i Galilaya, abona abavukana babiri, Simoni yitwa Petero, na Andereya mwene nyina, bariko baraterera urusenga mu kiyaga, kuko bār’ abarovyi.

¹⁹ Arababgira, ati Ni munkurikire, nzobagira abaroba abantu.

²⁰ Baca bareka insenga, baramukurikira.

²¹ Yīgiye imbere yaho, abona abavukana bandi babiri, Yakobo mwene Zebedayo, na mwene nyina Yohana, bari kumwe na se Zebedayo mu bgato, bariko barasana insenga zabo, arabahamagara.

²² Baca bareka ubgato na se, baramukurikira.

Yesu agenda yigisha, akiza abarwaye

²³ Yesu agendagenda i Galilaya hose, yigisha mu masinagogi yabo, ababgira ubutumwa bgiza bg’ubgami, akiza indwara n’ubumuga vy’uburyo bgose mu bantu.

²⁴ Inkuru yiwe ikwira i Siriya hose, bamuzanira abarwaye bose bātewe n’indwara zitari zimwe n’ibibasheshereje, n’abinjiwemwo n’abadayimoni, n’abarwaye intandara, n’ibimuga; arabakiza.

²⁵ Kand’ ishengero ryinshi riramukurikira bavuye i Galilaya n’i Dekapoli n’i Yerusalemu n’i Yudaya no hakurya ya Yorodani.