Matayo 27 - Bibliya Yera 1951 1967 (Burundi)

¹ Umutwenzi utambitse abaherezi bakuru bose n’abashingantahe b’ubgo bgoko bagīra inama Yesu ngo bamwice.

² Baramuboha baramujana, bamushikiriza Pilato, icēgēra ca Kayisari.

Yuda aja kwiyahura

³ Maze Yuda yamuguze, abonye Yesu ko bamutsindishije, aricuza, asubiza abaherezi bakuru n’abashingantahe za ntete z’ifeza mirongwitatu,

⁴ ati Nācumuye, naguze amaraso y’ūtagira icaha. Na bo baramwishura, bati Bidutwaye iki? N’ivyawe.

⁵ Aterera izo ntete z’ifeza ahēra h’urusengero, aragenda, arīmanika.

⁶ Abaherezi bakuru bāndūra zino feza, bati Ntizemerwa gushirwa mu mashikanwa, kukw ar’ ibiguze amaraso.

⁷ Baja inama, bazigura ubgatsi n’umubumvyi, ngo baze bahahambe injabuka.

⁸ Ni co catumye ubgo bgatsi bgitwa Ubgatsi bg’amaraso, na bugingo n’ubu.

⁹ Ni ho ivyavuzwe na Yeremiya yavugishwa n’Imana vyashikiye, ngo Bābiriye za ntete z’ifeza mirongwitatu, ni zo giciro yaciriwe, uwo bamwe mu Bisirayeli baciriye,

¹⁰ bazigura ubgatsi n’umubumvyi, nk’uk’ Uhoraho yambariye.

Pilato acira urubanza Yesu

¹¹ Ariko Yesu yar’ ahagaze mu maso ya ca cēgēra ca Kayisari; ico cēgēra kiramubaza, kiti Ni wewe Mwami w’Abayuda? Yesu aramwishura, at’ Urarivuze.

¹² Ariko mu vyo arezwe n’abaherezi bakuru n’abashingantahe ntiyishura na rimwe.

¹³ Pilato aramubaza, ati Ntiwumva ingene bakwagiriza vyinshi?

¹⁴ Ariko ntiyamwishura n’ijambo na rimwe, bituma ico cēgēra gitangara cane.

¹⁵ Mur’ iyo misi mikuru icēgēra camenyereye kurekurira abantu imbohe imwe, iyo bagomba.

¹⁶ Kandi bāri n’imbohe imwe yari rurangiranwa yitwa Baraba.

¹⁷ Bakoranye, Pilato arababaza, at’ Uwo mugomba ko ndabarekurira ni nde? Ni Baraba, canke ni Yesu yitwa Kristo?

¹⁸ Kuko yamenye yukw ishari ari ryo rimubatangishije.

¹⁹ Acicaye ku ntebe y’imanza umugore wiwe amutumako, ati Ntihagire ico ugira uwo mugororotsi; kuko narāye ndose mbona mbabazwa vyinshi kubgiwe.

²⁰ Arikw abaherezi bakuru n’abashingantahe bosha ishengero ngo rimusabe Baraba, ryicishe Yesu.

²¹ Ico cēgēra kirababaza, kiti Mur’ abo bompi uwo mugomba ko ndabarekurira ni nde? Na bo baramwishura, bati Ni Baraba.

²² Pilato arababaza, ati None Yesu yitwa Kristo, we ndamugire nte? Bose bati N’abambge.

²³ Arababaza, ati Ku ki? Yakoze ikibi ki? Ariko barushiriza gusemerera cane, bati N’abambge.

²⁴ Maze Pilato abonye kw arushwa n’ubusa, ariko ko barushirije kuvyura umugūmūko, yābīra amazi akarabira imbere y’ishengero, ati Jeho ndacuna kubg’ amaraso y’uyu mugororotsi: n’ivyanyu.

²⁵ Abantu bose baramwishura, bat’ Amaraso yiwe araba ari twebge akora n’abana bacu.

²⁶ Maz’ abarekurira Baraba, ariko Yesu aramutonagura, amutanga ngw abambge.

Abasoda bashinyagurira Yesu

²⁷ Maz’ abasoda b’ico cēgēra ca Kayisari bajana Yesu mw iboma, bateraniriza ingabo zose kuri we.

²⁸ Bamwambura iziwe mpuzu bamwambika umutamana w’agahama,

²⁹ batsiba igitsibo c’amahwa, bakimwambika mu mutwe, bashira n’irenga mu kuryo kwiwe; baramupfukamira, baramucurīra, bati Ndagize bgakeye Mwami w’Abayuda!

³⁰ Bamuvuma amate, bamushikura rya renga, barimukubita mu mutwe.

³¹ Bamaze kumucurīra, bamwambura wa mutamana, bamwambika iziwe mpuzu, bamujana kumubamba.

Ukubambga kwa Yesu

³² Bakirenga irembo bahūra n’Umunyakurene yitwa Simoni, uyo baramufata kugira ngw amutwaze umusaraba.

³³ Bashitse ahantu hitwa i Gologota, risobanurwa ngw Ahantu h’agahanga,

³⁴ bamuha vino ivanze n’umuti w’umururazi, ngw ayinywe; ayumvirije yanka kuyinywa.

³⁵ Bamaze kumubamba, bagabura impuzu ziwe, barazipfindira,

³⁶ bicara hano baramurinda.

³⁷ Hejuru y’umutwe wiwe bahashira ikirego ciwe, canditswe ng’ UYU NI YESU, UMWAMI W’ABAYUDA.

³⁸ Maze babambana na we abambuzi babiri, umwe i buryo, uwundi i bumoso.

³⁹ Abahahita baramutuka, bazunguza imitwe,

⁴⁰ bat’ Ewe usambura urusengero, ukarwubaka mu misi itatu, ni wikize: ni waba ur’ Umwana w’Imana imanure ku musaraba.

⁴¹ N’abaherezi bakuru n’abanyabgenge b’ivyanditswe n’abashingantahe bamucurīra bartyo na bo,

⁴² bati Yakijije abandi, we ntashobora kwikiza. N’Umwami w’Abisirayeli, ni yīmanure ku musaraba ubu nyene, duheze tumwizere.

⁴³ Yizigiye Imana, n’imukize ubu nyene ni yaba imubabaye: kuko yīgira ngo Nd’ Umwana w’Imana.

⁴⁴ N’abambuzi babambanywe na we na bo barabimutuka.

Urupfu rwa Yesu

⁴⁵ Uhereye kw isaha ya gatandatu ubgirakabiri bukorana mu gihugu cose gushitsa kw isaha y’icenda.

⁴⁶ Nko kw isaha y’icenda Yesu asemerera n’ijwi rirenga, ati Eli, Eli, lama sabakatani? risobanurwa ngo Mana yanje, Mana yanje, n’iki kikumpebesheje?

⁴⁷ Bamwe mu bahahagaze bavyumvise, baravuga, bat’ Uyo ahamagaye Eliya.

⁴⁸ Umwe muri bo aca arirukanga yābīra sipongo, ayuzuza inkarisha ayirungikisha irenga, arayimusomesha.

⁴⁹ Arikw abandi bati Banza ugume: turābe ko Eliya yoza kumukiza.

⁵⁰ Yesu yongera gusemerera n’ijwi rirenga, umutima uraca.

Ibitangaza vyabaye Yesu acikanye

⁵¹ Igihuzu gikingiriye ahēra cane h’urusengero gitantamukamwo kubiri, uhereye hejuru ugashitsa hasi; isi iratigita; ibitandara birasaduka;

⁵² imva ziruguruka, imivyimba myinshi y’abera bāri basinziriye irazurwa;

⁵³ bava mu mva amaze kuzuka, bashika mu gisagara cera, babonekera benshi.

⁵⁴ Umugabisha w’abasoda ijana n’abāri kumwe na we barinda Yesu, babonye isi itigita n’ibibaye, baratinya cane, bati N’ivy’ ukuri, uyo yar’ Umwana w’Imana.

⁵⁵ Hāriho n’abagore benshi bāri kure babirāba; ni bo bākurikiye Yesu ava i Galilaya, bamukorera.

⁵⁶ Muri bo hārimwo Mariya Magadalene na Mariya nyina wa Yakobo na Yose, na nyina wa bene Zebedayo.

Yosefu aja guhamba Yesu

⁵⁷ Ariko bugorovye haza umutunzi w’i Arimataya yitwa Yosefu, kandi na we yar’ umwigishwa wa Yesu;

⁵⁸ uyo aja kuri Pilato asaba ikiziga ca Yesu. Maze Pilato avuga ko bakimuha.

⁵⁹ Yosefu ajana ico kiziga, akizingira mu mpuzu yera nziza,

⁶⁰ agishira mu mva yiwe nsha, yari yarimbishije mu bitandara; atembagaza ikibuye kinini acugaza umuryango w’imva, aragenda.

⁶¹ Mariya Magadalene na Mariya wundi ni ho bāri bari, bicaye berekeye ku mva.

Barinda imva ya Yesu

⁶² Bukeye bgaho, ni wo musi wakurikira uwo Kwitegura, abaherezi bakuru n’Abafarisayo bakoranira kwa Pilato,

⁶³ baramubgira, bati Mugenzi, twibutse yuko wa muhumvyi akiriho yagize ngw imisi itatu ishize azozuka.

⁶⁴ Nuko n’ugere barinde imva cane gushitsa ku musi ugira gatatu, kugira ngw abigishwa biwe ntibaze kumwiba, bakabgira abantu ngo yazutse mu bapfuye; maz’ ubuhumvyi bga nyuma bgoruta ubga mbere.

⁶⁵ Pilato arababgira, at’ Abarinzi ngabo: ni mubajane; muyīrindishirize uko muzi.

⁶⁶ Nuko baragenda barindisha imva, ca kibuye bagihomakw ishashara, bayidomamw’ ikimenyetso, abo barinzi babona.