Matayo 25 - Bibliya Yera 1951 1967 (Burundi)

Umugani w’inkumi cumi

¹ Ico gihe ubgami bgo mw ijuru buzosa n’inkumi cumi, zajanye amatara yazo, zija gusanganira umukwe.

² Batanu muri bo bār’ ibijuju, bandi batanu bār’ abanyabgenge.

³ Kuko vya bijuju, mu kujana amatara yavyo, bitajananye n’amavuta.

⁴ Arikw abanyabgenge bo, bajananye n’amavuta mu macupa yabo hamwe n’amatara yabo.

⁵ Umukwe agitebaganye bose barahūnyiza, barasinzira.

⁶ Mu gicugu humvikana urwamo, ngo Nguyu umukwe, ni musohoke mumusanganire.

⁷ Buno za nkumi zose zirazanzamuka, zitunganya amatara yazo.

⁸ Vya bijuju bibgira abanyabgenge, biti Ni muduhe se ku mavuta yanyu, kukw amatara yacu arikw arazima.

⁹ Arikw abanyabgenge barabishura, bati Kumbure ntiyodukwira twese: ivyiza ni muje ku badandaza mwigurire.

¹⁰ Bakigiye kugura umukwe arashika; abiteguye binjirana na we mu bukwe, urugi rurugarwa.

¹¹ Mu nyuma za nkumi zindi na zo ziraza, ziti Mupfasoni, mupfasoni, n’utwugururire.

¹² Na we arabishura, ati Ndababgire ukuri: Simbazi.

¹³ Nuko mwame mugavye kuko mutazi umusi cank’ isaha.

Umugani w’ababikijwe italanto

¹⁴ Bizoba nk’ivy’ umuntu agira agende mu mahanga, ahamagara abantu biwe, abasigarana ivyo atunze.

¹⁵ Umwe amuha italanto zitanu, uwundi zibiri, uwundi imwe, uk’ umuntu wese ashobora, aja mu mahanga.

¹⁶ Uwo mwanya uwahawe italanto zitanu aragenda arazicurūza, yungukamw’ izindi talanto zitanu.

¹⁷ N’uwa zibiri abigenza artyo, yungukamw’ izindi zibiri.

¹⁸ Arik’ uwahawe imwe arīgīra, yimba mu kuzimu, ahisha amahera ya shebuja.

¹⁹ Hashize igihe kirekire, shebuja w’abo bantu aragaruka, asuzuma ivyo yabasigaranye.

²⁰ Uwari yahawe italanto zitanu araza, azana italanto zindi zitanu, ati Mugenzi, wari wansigaranye italanto zitanu, ehe nungutsemw’ izindi talanto zitanu.

²¹ Shebuja aramubgira, ati Wagize neza, muntu wanje mwiza wo kwizigirwa, wizigiwe kuri bike, nzoguha kugaba vyinshi. Injira mu munezero wa shobuja.

²² Haza uwari yahawe italanto zibiri, ati Mugenzi, wari wansigaranye italanto zibiri, ehe nungutsemw’ izindi talanto zibiri.

²³ Shebuja aramubgira, ati Wagize neza, muntu wanje mwiza wo kwizigirwa, wizigiwe kuri bike, nzoguha kugaba vyinshi. Injira mu munezero wa shobuja.

²⁴ Kandi haza uwahawe italanto imwe, ati Mugenzi, nari nkuzi k’ur’ umuntu w’ingāre, wimbura ivyo utārimye, ukumakuma ivyo utāsanzaje;

²⁵ ndatinya, ndagenda mpisha italanto yawe mu kuzimu: ehe ngibi ivyawe.

²⁶ Shebuja aramwishura, ati Wa muntu wanje mubi we, wa kinebge we, war’ uzi ko nimbura ivyo ntārimye, nkumakuma ivyo ntāsanzaje.

²⁷ Nuko war’ ukwiye kujana amahera yanje mu bayacurūza, nanje nagaruka nkaronka ayanje n’inyungu yayo.

²⁸ Nuko ni mumwake italanto, muyihe ūfise italanto cumi.

²⁹ Kuk’ ūfise wese azohabga, asesekarizwe: arik’ ūdafise azokwakwa n’ico yar’ afise.

³⁰ N’uyo muntu wanje w’imburakimazi ni mumute hanze mu mwiza, ni ho hazoba amarira no kuryanya insya z’amenyo.

Gucira amahanga urubanza

³¹ Arik’ Umwana w’umuntu ah’ azozira afise ubgiza bgiwe ari kumwe n’abamarayika biwe bose, ni ho azovyagira ku ntebe yiwe y’ubgiza:

³² amahanga yose azokoranirizwa mu nyonga ziwe, na we azobarobanura, nk’uk’ umwungere arobanura intama mu mpene.

³³ Intama azoziherereza i buryo bgiwe, impene na zo i bumoso.

³⁴ Maz’ Umwami azobgira abar’ i buryo bgiwe, ati Ni muze, abo Data yahezagiye, muragwe ubgami mwateguriwe, uhereye ku kuremwa kw’isi.

³⁵ Nari nshonje, murangaburira, nari mfise inyota, mumpa ico nnywa; nar’ ingenzi, mumpa indāro;

³⁶ nagenda gusa, muranyambika; nari ndwaye, muza kurāba uko mmeze; nari mw ibohero, muza kundāba.

³⁷ Maz’ abagororotsi bazomubaza, bati Mwami, twakubonye ryari ushonje, tukakugaburira; cank’ ufise inyota, tuguha ico unywa?

³⁸ Twakubonye ryari ur’ ingenzi, tuguha indāro; cank’ ugenda gusa tukakwambika?

³⁹ Twakubonye ryari urwaye, cank’ uri mw ibohero, tuza kukurāba?

⁴⁰ Umwami na we azobishura, ati Ndababgire ukuri: Ko mwabigiriye umwe mur’ aba bene Data bari hanyuma y’abandi, ni jewe mwabigiriye.

⁴¹ Maz’ azobgira n’abar’ i bumoso, ati Mva i ruhande, mwa bivume mwe, muje mu muriro utazima wateguriwe wa Murwanizi n’abamarayika biwe.

⁴² Nari nshonje, ntimwangaburira; nari mfise inyota ntimwampa ico nnywa;

⁴³ nar’ ingenzi, ntimwampa indāro; nagenda gusa, ntimwanyambika; nari ndwaye, nari mw ibohero, ntimwaza kundāba.

⁴⁴ Maze na bo bazomwishura, bati Mwami, twakubonye ryari ushonje, cank’ ufise inyota, cank’ ur’ ingenzi, cank’ ugenda gusa, cank’ urwaye, cank’ uri mw ibohero, ntitwagira ico tugukorera?

⁴⁵ Maz’ azobishura, ati Ndababgire ukuri: Ko mutabigiriye umwe mur’ aba bari hanyuma y’abandi, nanje ntimwabingiriye.

⁴⁶ Abo bazoja mu gihano kidashira, arikw abagororotsi bazoja mu bugingo budashira.