Matayo 24 - Bibliya Yera 1951 1967 (Burundi)

Ibimenyetso vyerekana uguhona kw’i Yerusalemu, n’ukugaruka kwa Yesu

¹ Yesu arasohoka ava mu rusengero; akigenda abigishwa biwe baramwēgēra ngo bamwereke inyubako y’urusengero.

² Arababgira, ati Ntimubona ivyo vyose? Ndababgire ukuri: Aha ntihazosigazwa ibuye rigeretse ku rindi, ridasamburiwe hasi.

³ Yicaye ku musozi wa Elayono, abigishwa biwe baramwēgēra bihereranye, baramubaza, bati Tubgire, ivyo bizobaho ryari, kand’ ikimenyetso kizoba iki c’ukuza kwawe n’ic’ umuhero w’isi?

⁴ Yesu arabishura, ati Mwirinde, ntihagire ūbazimiza.

⁵ Kuko benshi bazoza mw izina ryanje, bati Ni jewe Kristo, kandi bazozimiza benshi.

⁶ Muzokwumva intambara n’impuha z’intambara: mwirinde, ntimugahagarike imitima; kuko bitazobura kubaho, arik’ umuhero uzoba utaraza.

⁷ Kukw ihanga rizotera irindi hanga, n’ubgami buzotera ubundi bgami; amapfa no kunyiganyiga kw’isi bizobaho henshi;

⁸ arikw ivyo vyose n’itanguriro ryo kuramukwa.

⁹ Ni ho bazobatanga ngo muzigirizwe, bazobica, kandi muzokwankwa n’amahanga yose, abahōra izina ryanje.

¹⁰ Ni ho benshi bizobatsitaza, bazoryarukana, bazokwankana.

¹¹ Kandi hazokwaduka abīgira abavugishwa n’Imana benshi, bazimize benshi.

¹² Maze kuk’ ubugarariji buzogwira urukundo rw’abenshi ruzotimba.

¹³ Arik’ uwihangana, agashitsa kw iherezo, ni we azokira.

¹⁴ Kand’ ubu butumwa bgiza bg’ubgami buzovugwa mw isi yose, ngo bube ikimenyetso kibere icabona amahanga yose, maz’ umuhero uzoca uza.

¹⁵ Nukw aho muzobonera ca kizira c’ubuyobe bg’ubugesera, gihagaze ahantu hēra, cavuzwe na Daniyeli yavugishwa n’Imana — ūsoma ni yiyubare —

¹⁶ ico gihe abazoba bar’ i Yudaya baze bahungire ku misozi miremire,

¹⁷ ūzoba ari hejuru ku nzu ntaze yururutswe no gusahura ibiri mu nzu yiwe,

¹⁸ ūzoba ari mu mirima ntaz’ asubizwe inyuma no gusahura umutamana wiwe.

¹⁹ Ariko mur’ iyo misi abazoba batwaye inda n’abonsa bazobona ibara.

²⁰ Kandi muze musenge kugira ng’ uruhungo rwanyu ntiruze rube mu rushana canke kw isabato.

²¹ Kuko mur’ iyo misi hazoba amarushwa ahambaye atigeze kubaho kuva kw itanguriro ry’isi ugashitsa n’ubu, kandi ntazokwongera kubaho.

²² Kand’ iyo misi iy’ itagerurwa ntihorokotse umuntu n’umwe; ariko kubg’ abatoranijwe iyo misi izogerurwa.

²³ Ico gihe ni hāgira umuntu ababgira, at’ Ehe Kristo ari hano, canke, at’ Ari hariya: ntimuze muvyemere.

²⁴ Kuko hazokwaduka abīgira Kristo n’abīgira abavugishwa n’Imana, bagakora ibimenyetso bihambaye n’ibitangaza, kugira ngo bazimize n’abātoranijwe ni vyashoboka.

²⁵ Rāba ndabibabgiye bitaraba.

²⁶ Nuko ni bababgira, bat’ Eh’ ari mu bugaragwa, ntimuze mujeyo; canke, ngw Ari haruguru mu mpete, ntimuze muvyemere.

²⁷ Nk’uk’ umuravyo urabiriza i burasirazuba ukabonekera iyo rirengera, ni k’ukuza kw’Umwana w’umuntu kuzomera.

²⁸ Ah’ umuvyimba uri hose, ni ho ibinyakabaka bizokoranira.

²⁹ Hanyuma y’ayo marushwa y’ico gihe, uwo mwanya izuba rizocura umwiza, n’ukwezi ntikuzoba kucaka umuco wakwo, n’inyenyeri zizokoragurika zive kw ijuru, n’ivy’ inkomezi vyo mu majuru bizonyiganyizwa.

³⁰ Bun’ ikimenyetso c’Umwana w’umuntu kizobonekera kw ijuru, ni ho amoko yose yo mw isi azoboroga, bazobona Umwana w’umuntu aje mu bicu vyo kw ijuru ari n’ububasha n’ubgiza bginshi.

³¹ Azotuma abamarayika biwe n’ijwi rirenga ry’inzamba, bakoranye abatoranijwe biwe, bave mu birēre bine, guhēra iy’ ijuru ritangurira kugeza iyo riherera.

³² Ni mwigire ku musukoni umugani wawo: ishami ryawo iyo ritoshe, amababi agatutuza, mumenya yukw agatāsi kari hafi.

³³ Nuko namwe, ni mwabona ivyo vyose bishitse, muze mumenye kw ari hafi, ku rugi.

³⁴ Ndababgire ukuri: Ab’ iki gihe ntibazorangira, ivyo vyose bitarashika.

³⁵ Ijuru n’isi bizorangira, arikw amajambo yanje nta co azoba.

³⁶ Arik’ uwo musi cank’ iyo saha nta wubizi, n’iyo boba abamarayika bo mw ijuru, cank’ Umwana w’Imana, atari Data gusa.

³⁷ Kand’ uko vyari biri mu misi ya Nowa ni ko bizoba mu kuza kw’Umwana w’umuntu.

³⁸ Kukw ari ko bāri bameze mu misi umwuzure utaribgatere: bārarya, bāranywa, bārarongora, bārashingira, bageza kuri wa musi Nowa yinjiye muri bga bgato,

³⁹ ntibagira ico bamenya kugeza ah’ umwuzure waziye ubatwara bose; ni k’ukuza kw’Umwana w’umuntu kuzomera.

⁴⁰ Ico gihe abagabo babiri bazoba mu murima, umwe azojanwa, uwundi arekwe.

⁴¹ Abagore babiri bazoba bariko barasēra hamwe ku rusyo, umwe azojanwa, uwundi arekwe.

⁴² Nuko mwame mugavye, kuko mutazi umusi Umwami wanyu azozako.

⁴³ Arikw ibi mubimenye: iyaba nyen’ urugo yar’ asanzwe azi igihe igisuma kiziramwo, yogavye, ntiyokunze kw inzu yiwe yimbga.

⁴⁴ Nuko namwe mwame mwiteguye, kuk’ Umwana w’umuntu azoza mu gihe mutiyumviriye.

⁴⁵ None ni nde mushumba wo kwizigirwa w’ubgenge shebuja yosigarana abo mu rugo rwiwe, ngw abagaburire igihe kigeze?

⁴⁶ Hahirwa uwo mushumba shebuja agarutse azosanga akora artyo.

⁴⁷ Ndababgira ukuri yukw azomuha kugaba ivy’ afise vyose.

⁴⁸ Arik’ umushumba mubi ni yibgira mu mutima wiwe, ati Databuja aracatevye:

⁴⁹ maz’ agatangura gukubita abashumba bagenzi biwe no gusangira n’ababorerwa;

⁵⁰ shebuja w’uwo mushumba azoza ku musi atamwiteze no mu gihe atazi:

⁵¹ azomucamwo kubiri, amusangize umugabane wiwe n’indyarya: ni ho hazoba amarira no kuryanya insya z’amenyo.