Matayo 22 - Bibliya Yera 1951 1967 (Burundi)

Ubukwe bg’umwana w’umwami

¹ Yesu yongera kuvuganira na bo mu migani,

² at’ Ubgami bgo mw ijuru busa n’umwami atahisha ubukwe bg’umwana wiwe arongora.

³ Atuma abagendanyi biwe, ngo bahamagare abātōrewe gutaha ubukwe, banka kuza.

⁴ Yongera gutuma abandi bagendanyi, ati Mubgire abatowe, muti Rāba amazimano yiwe yayiteguye, n’amapfizi n’amagumba vyiwe vyābāzwe, kandi vyose biriteguwe: ni muze mutahe ubukwe.

⁵ Ariko barirengagiza barīgīra, umwe aja mw itongo ryiwe, uwundi mu bidandazwa vyiwe.

⁶ Abasigaye bafata abo bagendanyi biwe, babakorera ibara, barabica.

⁷ Uwo mwami araraka, agomora ingabo ziwe, ahonnya abo bicanyi, ayigiza igisagara cabo.

⁸ Maz’ abgira abagendanyi biwe, at’ Ubukwe buriteguwe, arikw abābutorewe ntibāri babukwiye.

⁹ Nuko ni mugende mu mayirabiri, abo muribuboneyo bose mubahamagare, baze babutahe.

¹⁰ Abo bagendanyi baragenda baja mu nzira bakoranya abo babonye bose, ababi n’abeza; mu bukwe huzura ababutorewe.

¹¹ Umwami yinjiye kurāba abatowe abonamw’ umuntu atambaye impuzu y’ubukwe;

¹² aramubaza, ati Mugenzi wanje, winjiye ute hano utambaye impuzu y’ubukwe? Arajorerwa.

¹³ Maz’ umwami abgira abakozi biwe, ati Ni mumubohe amaboko n’amaguru, mumuterere hanze mu mwiza; ni ho hazoba amarira n’ukuryanya insya z’amenyo.

¹⁴ Kukw abatowe ari benshi, arikw abatoranijwe bakaba bake.

Abafarisayo bamugezesha ivy’ ikori

¹⁵ Bun’ Abafarisayo baragenda baja inama, ngo baronke ingene bomutegera mu majambo yovuga.

¹⁶ Bamutumakw abigishwa babo hamwe n’abantu ba Herode, bati Mwigisha, turazi yuk’ ur’ umunyakuri, kandi ko wigisha inzira y’Imana vy’ukuri, kandi k’udatinya umuntu n’umwe ku kigohe; kuk’ udatinya ijunja ry’abantu:

¹⁷ non’ utubgire, wiyumvira ute? Biremerwa gutanga ikori rya Kayisari, canke ntivyemerwa?

¹⁸ Ariko Yesu amenya ububi bgabo, arababaza, ati Mungereza iki ga mwa ndyarya mwe?

¹⁹ Ni munyereke ihera ry’ikori. Bamuzanira idenariyo.

²⁰ Arababaza, at’ Iki gishushanyo n’ibi vyanditsweko n’ivya nde?

²¹ Bati N’ivya Kayisari. Bun’ arababgira, ati Nuko rer’ ivya Kayisari ni mubihe Kayisari, ivy’ Imana mubihe Imana.

²² Bavyumvise baratangara, bamusigaho barīgīra.

Yesu yishura Abasadukayo ivy’ ukuzuka

²³ Nya musi Abasadukayo baza kuri we, abahakana yukw ata kuzuka kuriho, baramubaza,

²⁴ bati Mwigisha, Mose yavuze ng’umuntu ni yapfa adasize abana, mwene nyina acūre umugore wiwe, ngw ahonore mwene nyina.

²⁵ I wacu hār’ abavukana ndwi. Uwa mbere yararongoye, arapfa, maze kukw adasize umwana umugore wiwe amuraga mwene nyina.

²⁶ Nuko n’uwa kabiri, n’uwa gatatu biba birtyo gushitsa ku wa ndwi.

²⁷ Hanyuma ya bose nya mugore arapfa.

²⁸ None mw izuka azoba muka nde mur’ abo ukw ar’ indwi? Ko bari bamufise bose!

²⁹ Yesu arabishura, ati Mwarazimiye, ko mutāmenye ivyanditswe n’ubushobozi bg’Imana.

³⁰ Mw izuka ntibazorongora kandi ntibazoshingirwa: bazoba nk’abamarayika bo mw ijuru.

³¹ Arikw ivyo kuzuka kw’abapfuye nta ho murasoma ico Imana yababgiye,

³² iti Ni jewe Mana ya Aburahamu, Imana ya Isaka, Imana ya Yakobo? Imana s’iy’ abapfuye, n’iy’ abariho.

³³ Ishengero rivyumvise, ritangazwa n’inyigisho ziwe.

Ibgirizwa rikuru

³⁴ Abafarisayo bumvise ko Yesu yajoreje Abasadukayo, bakoranira hamwe.

³⁵ Umwe muri bo w’umwigisha w’ivyagezwe aramubaza amugeza,

³⁶ ati Mwigisha, ibgirizwa risumba ayandi mu vyagezwe n’irihe?

³⁷ Aramwishura, ati Mukundishe Uhoraho Imana yanyu imitima yanyu yose n’ubugingo bganyu bgose n’ubgenge bganyu bgose.

³⁸ Iryo ni ryo rihambaye rya mbere.

³⁹ Har’ irindi rya kabiri rimeze nka ryo, n’iri: Mukunde bagenzi banyu nk’uko mwikunda.

⁴⁰ Kur’ ayo mabgirizwa yompi ivyagezwe vyose n’amajambo y’abavugishwa n’Imana ni yo vyenenako.

Umwana wa Dawidi

⁴¹ Abafarisayo bagikoraniye hamwe, Yesu arababaza,

⁴² at’ Ivya Kristo muvyiyumvira mute? Ni mwene nde? Baramwishura, bati Ni mwene Dawidi.

⁴³ Na we arababaza, ati None Dawidi mu vya Mpwemu yamwitiye iki Umwami?

⁴⁴ at’ Uhoraho yabariye Umwami wanje, At’ Icara i buryo bganje, Ushitse aho nzoshirira abansi bawe musi y’ibirenge vyawe.

⁴⁵ None Dawidi ko yamwise Umwami, yoshobora ate kuba umwana wiwe?

⁴⁶ Ntihāgira ūshobora kumwishura ijambo na rimwe, kand’ uhereye kur’ uwo musi nta muntu yubahutse gusubira kumubaza ikindi.