Matayo 18 - Bibliya Yera 1951 1967 (Burundi)

Umukuru mu bgami bgo mw ijuru uw’ ari we

¹ Mur’ uwo mwanya abigishwa baza kuri Yesu, baramubaza, bat’ Umukuru mu bgami bgo mw ijuru ni nde?

² Ahamagara akana, agahagarika hagati yabo,

³ arababgira, ati Ndababgire ukuri: Ni mutirimbura ngo mucike nk’abana bato, ntimuzoruha mwinjira mu bgami bgo mw ijuru.

⁴ Nuk’ ūzokwicisha bugufi nk’aka kana ni we mukuru mu bgami bgo mw ijuru.

⁵ Kand’ ūzokwākīra akana kamwe nk’aka mw izina ryanje azoba anyakiriye.

⁶ Arik’ ūzotsitaza n’umwe mur’ abo bato banyizera, icoroshe n’uko yohambirirwa urusyo ruremereye kw izosi, akadobezwa i bgina mu kiyaga.

⁷ Isi izobona ibara kubg’ ibitsitaza, kukw ivyo bitsitaza bitazobura kuza, arik’ uyo muntu azana igitsitaza azobona ibara.

⁸ Ukuboko kwawe cank’ ikirenge cawe ni hagira ikigutsitaza muri vyo, ugice, ugite kure; vyokubera vyiza kwinjira mu bugingo ucitse igikonjo cank’ ikirenge, hak’ utererwa mu muriro utazima ufise amaboko yompi n’ibirenge vyompi.

⁹ Kand’ ijisho ryawe ni ryagutsitaza, urinogore urite kure; vyokubera vyiza kwinjira mu bugingo upfuye ijisho, hak’ utererwa muri Gehinomu y’umuriro ufise amaso yompi.

¹⁰ Mwirinde ntimukēngēre n’umwe mur’ aba bana bato: ndababgira yuko mw ijuru abamarayika babo bama barāba mu nyonga ha Data wo mw ijuru. [

¹¹ Kand’ Umwana w’umuntu yaje gukiza icari cazimiye.]

¹² Mugira ngw iki? Umuntu afise intama ijana, imwe yozimira, ntiyosiga zimwe mirongwicenda n’icenda, akagenda mu misozi kurondera iyazimiye?

¹³ Kand’ iy’ ayibonye, ndababgira ukuri yukw ayinezererwa kuyirutisha zimwe mirongwicenda n’icenda zitāzimiye.

¹⁴ Ni ko bidakundwa mu nyonga za So wo mw ijuru k’umwe mur’ abo bato apfa rubi.

Guharira abatugiriye nabi

¹⁵ Mugenzawe ni yakugirira nabi, ugende umuhishuke mwiherereye; ni yakwumvira, uzoba wigaruriye mugenzawe.

¹⁶ Ariko n’atakwumvira, ujane umwe canke babiri, kugira ngw ijambo ryose rize riringanizwe, bivuye mu kanwa k’ivyabona bibiri canke bitatu.

¹⁷ N’atabumvira ubgire ishengero; ni yanka kwumvira ishengero na ryo, kuri wewe azoba nk’umunyamahanga n’umutozakori.

¹⁸ Ndababgire ukuri: Ivyo muzohambira mw isi vyose bizoba bihambiriwe mw ijuru; kand’ ivyo muzohamburura mw isi vyose bizoba bihamburuwe mw ijuru.

¹⁹ Kandi ndababgira ukuri yukw ababiri muri mwebge ni bahuriza inama mw isi gusaba ikintu cose, Data wo mw ijuru azokibakorera

²⁰ Kukw aho babiri canke batatu bazoba bakoraniye mw izina ryanje, nanje nzoba ndi hagati muri bo.

Umugani w’abariye umwenda babiri

²¹ Maze Petero aza kuri we, aramubgira, ati Mushingantahe, incuti yanje ni yangirira nabi, nzomuharira ngeze kangahe? Ngeze indwi?

²² Yesu aramubgira, ati Jeho sinkubgira yuk’ ugeza indwi, arik’ ugeze indwi‐indwi gushitsa ibihetangabo mirongwirindwi.

²³ Ni co gituma ubgami bgo mw ijuru busa n’umwami yagomvye gusuzuma ivyo yabīkije abantu biwe.

²⁴ Atanguye guharūra, bamuzanira uwamurīriye umwenda w’italanto ibihumbi cumi.

²⁵ Ariko kukw atar’ afise ico yishura, shebuja agera ko bamugura, n’umugore, n’abana, n’ivy’ afise vyose, ng’ umwenda wishurwe.

²⁶ Wa muntu yikubita hasi, amwitembagaza imbere, ati Mwami, nyihanganira, nzokwishura vyose.

²⁷ Shebuja w’uyo muntu amugirira akagongwe, aramurekura, amuhebera wa mwenda amufitiye.

²⁸ Uno muntu asohotse, abona mugenzi we yamurīriye umwenda w’idenariyo ijana; aramufata, amugwa mu gahogo, ati Nyishura ivyo umperaniye.

²⁹ Uyo mugenzi we yikubita hasi, aramutakambira, ati Nyihanganira, nzokwishura vyose.

³⁰ Wa wundi aranka, aragenda, amushirisha mw ibohero, gushitsa ah’ azomwishurira ivy’ amufitiye.

³¹ Bagenzi biwe babonye ibibaye, barababara cane, baragenda babgira shebuja ibibaye vyose.

³² Buno shebuja aramuhamagaza, aramubgira, ati Wa muntu mubi we, naguhebeye wa mwenda wose aho wantakambira:

³³ none nawe ntiwar’ ukwiye kugirira imbabazi mugenzawe, nk’uko nanje nazikugiriye?

³⁴ Shebuja araraka, amuhereza abasoda, gushitsa ah’ azokwishurira ivy’ amufitiye vyose.

³⁵ Na Data wo mw ijuru ni kw azobagirira, ni mutāharirana, umuntu wese ngw aharire mugenzi we bivuye mu mutima.