Matayo 16 - Bibliya Yera 1951 1967 (Burundi)

Yesu yima Abayuda ikimenyetso kiva mw ijuru

¹ Abafarisayo n’Abasadukayo baraza, barondera kw abereka ikimenyetso kiva mw ijuru, bamugeza.

² Na we arabishura, at’ Iyo bugorovye, muravuga muti Buca haba umuco, kukw ijuru ryirasiye.

³ Mu mutwenzi, muravuga muti Hagira hafurungane, kukw ijuru ryirasiye, kandi ryiraburaniwe. Murazi kugenzura ijuru uko risa, arikw ibimenyetso vy’ibihe ntimuzi kubigenzura.

⁴ Ab’ igihe kibi c’ubumaka barondera ikimenyetso, kandi nta kimenyetso bazohabga, atar’ ikimenyetso ca Yona. Abasigaho, arīgīra.

Umwambiro w’Abafarisayo, ni wo nyigisho zabo

⁵ Abigishwa bafata hakurya, bāri bibagiye gutekera imitsima.

⁶ Yesu arababgira, ati Mumenye, mwirinde umwambiro w’Abafarisayo n’Abasadukayo.

⁷ Bībūranya bati Ntitwatekeye imitsima.

⁸ Yesu arabimenya, arababaza, ati Yemwe ab’ukwizera guke, n’iki gitumye mwībūranya ngo nta mitsima mufise?

⁹ Ntimuraruha mubimenya, ntimwibutse ya mitsima itanu ku bihumbi bitanu, n’ibisimbo mwatororokanije uko vyangana?

¹⁰ Canke ya mitsima ndwi ku bihumbi bine, n’ibivumvu mwatororokanije uko vyangana?

¹¹ N’iki kibabujije gutahura ko ntababgiye imitsima? Ariko mwirinde umwambiro w’Abafarisayo n’Abasadukayo.

¹² Buno batahura kw atababgiye kwirinda umwambiro w’umutsima butsima, ariko kw ar’ inyigisho z’Abafarisayo n’Abasadukayo.

Petero ashinga intahe yuko Yesu ari Kristo

¹³ Yesu aja mu misozi ihera i Kayisariya mu bga Filipo, abaza abigishwa biwe, at’ Abantu bagira ng’ Umwana w’umuntu ndi nde?

¹⁴ Na bo bati Bamwe bagira ng’ uri Yohana Umubatizi, abandi ng’ uri Eliya, abandi ng’ uri Yeremiya cank’ umwe mu bavugishwa n’Imana.

¹⁵ Arababaza, at’ Ariko mweho, mugira ngo ndi nde?

¹⁶ Simoni Petero aramwishura, at’ Uri Kristo, Umwana w’Imana nzima.

¹⁷ Yesu aramwishura, at’ Ur’ umuhirwe, Simoni mwene Yona, kukw ata w’inyama n’amaraso yabiguhishuriye, ariko ni Data wo mw ijuru.

¹⁸ Nanje ndakubgira yuk’ uri Petero, kandi kur’ urwo rutare nzorwubakakw ishengero ryanje, kand’ amarembo y’i kuzimu ntazorishobora.

¹⁹ Nzoguha impfunguzo z’ubgami bgo mw ijuru: kand’ ico uzohambira mw isi kizoba gihambiriwe mw ijuru; n’ico uzohamburura mw isi kizoba gihamburuwe mw ijuru.

²⁰ Maze yihanikiriza abigishwa ngo ntihagire umuntu babgira kw ari we Kristo.

Petero agirira Yesu impuhwe

²¹ Kuva ubgo Yesu atangura guserurira abigishwa biwe kw akwiye kuzoja i Yerusalemu no kuzobabazwa uburyo bginshi n’abashingantahe n’abaherezi bakuru n’abanyabgenge b’ivyanditswe, no kuzokwicwa, no kuzozurwa ku musi ugira gatatu.

²² Petero aramwihererana, atangura kumwamira, ati Ntibikāze, Mwami wanje, ntibize bikubeko na gato.

²³ Ahindukirira Petero, ati Herēra inyuma yanje, Satani; ur’ ikintsitaza, kukw ivy’ Imana atari vyo ubabaye, ubabaye ivy’ abantu.

Gukurikira Yesu mu nzira y’umusaraba

²⁴ Buno Yesu abgira abigishwa biwe, at’ Umuntu ni yagomba kunkurikira, ni yiyanke, yikorere umusaraba wiwe, ankurikire.

²⁵ Kuk’ ūgomba gukiza ubugingo bgiwe azobubura, arik’ ūzoheba ubugingo bgiwe kubganje azoburonka.

²⁶ Kand’ umuntu vyomumarira iki kwunguka ivyo mw isi vyose ni yākwa ubugingo bgiwe kw icīru? Cank’ umuntu yotanga iki ngw acungure ubugingo bgiwe?

²⁷ Kuk’ Umwana w’umuntu azohava aza afise ubgiza bga Se, azananye n’abamarayika biwe; ni ho azoca yishura umuntu wese ibikwiranye n’ivyo yakoze.

²⁸ Ndababgire ukuri: Mur’ aba bahagaze hano harimwo bamwe batazobona urupfu gushitsa aho bazobonera Umwana w’umuntu aje mu bgami bgiwe.