Matayo 10 - Bibliya Yera 1951 1967 (Burundi)

Yesu atuma abigishwa biwe cumi na babiri kwigisha

¹ Ahamagara abigishwa biwe cumi na babiri, abaha ububasha ku mpwemu zihumanye n’ubgo kuzisenda, no gukiza indwara zose n’ubumuga bgose.

² Amazina y’izo ntumwa cumi na zibiri n’aya: Uwa mbere ni Simoni, yitwa Petero, na mwene nyina Andereya, na Yakobo mwene Zebedayo na mwene nyina Yohana,

³ na Filipo na Barutolomayo na Toma na Matayo umutozakori, na Yakobo mwene Alufayo, na Tadayo,

⁴ na Simoni Umunyakananayo, na Yuda Isikaryota, umwe yamugura.

⁵ Abo cumi na babiri Yesu arabatuma ababarira, ati Ntimuze mujane inzira ija mu banyamahanga, canke mu bisagara vy’Abasamariya.

⁶ Ariko muje mu ntama zazimiye zo mu muryango wa Isirayeli.

⁷ Uko mugenda kwose mwigishe, mut’ Ubgami bgo mw ijuru buri hafi.

⁸ Mukize abarwaye, muzure abapfuye, mukize abanyamibembe, musende abadayimoni. Mubiherewe ubusa, mubitangire ubundi.

⁹ Ntimutekere izahabu cank’ ifeza cank’ amahera mu mipfuko yanyu,

¹⁰ cank’ isaho y’impamba, kandi ntimujane amapfundo abiri, cank’ inkweto cank’ inkoni, kuk’ umukozi akwiye impembo yiwe.

¹¹ Igisagara cose cank’ imihana muzoshikamwo, muhabaze ūbereye, mumurārire gushitsa aho muzovirayo.

¹² Mucinjira mu nzu muyiramutse;

¹³ nya nzu ni yaba ibereye, amahoro yanyu azoyizako. Ni yaba itabereye, amahoro yanyu azobagarukako.

¹⁴ Kand’ umuntu n’atabākīra, canke ngo yumve amajambo yanyu, mukiva mur’ ino nzu canke muri nya gisagara, muze mukunkumure umukungugu wo mu birenge vyanyu.

¹⁵ Ndababgire ukuri, ku musi w’amateka igihugu c’i Sodomu n’i Gomora kizogira agahengekezo kurusha nya gisagara.

Amarushwa azoba ku ntumwa

¹⁶ Rāba mbatumye muri nk’intama mu mabingira hagati. Nuko mugire ubgenge nk’inzoka, mumere nk’inuma ata karohe.

¹⁷ Mwirinde abantu. Bazobashengerana mu manza, babatonagurire mu masinagogi yabo.

¹⁸ Bazobajana imbere y’abaganza n’abami babampōra, muzoba ikimenyetso kibabere icabona, bo n’abanyamahanga.

¹⁹ Ariko babashengeranye, ntimuze muhagarikire imitima ico muyuga n’ingene muzokivuga, kukw ivyo muvuga muzobihabga mur’ ako kanya.

²⁰ Kukw atazoba ari mwebge muvuga, azoba ari Mpwemu wa So avugira muri mwebge.

²¹ Umuntu azoshengerana uwo bavukana ngo bamwice, na se w’umwana azomushengerana, n’abana bazogābagābira abavyeyi babicishe.

²² Muzoba mwanswe na bose babahōra izina ryanje; arik’ uwihangana agashitsa iherezo ni we azokira.

²³ Ni babahama mu gisagara kimwe, muhungire mu kindi: kuko mbabgira ukuri yuko mutazohetura ibisagara vyose vy’i Bgisirayeli, Umwana w’umuntu ataraza.

Yesu aremesha intumwa

²⁴ Umwigishwa ntaruta umwigisha; kandi n’umushumba ntaruta shebuja.

²⁵ Umwigishwa biramubereye kumera nk’umwigisha wiwe, n’umushumba nka shebuja. Nyen’ urugo ko bamwise Beyezebuli, non’ abo mu rugo rwiwe ntibazorushiriza kubīta bartyo?

²⁶ Nuko ntimuze mubatinye, kukw ata catwikiriwe kitazotwikururwa, canke kinyegejwe kitazomenyekana.

²⁷ Ico mbabaririra mu mwiza muze mukivugire mu muco, kand’ ico mwongorewe mu gutwi muze mukivugire ku mazu hejuru.

²⁸ Ntimuze mutinye abica umubiri, badashobora kwica ubugingo: cane‐cane mutinye ūshobora guhonereza ubugingo n’umubirimuri Gehinomu.

²⁹ Mbeg’ utunyoni tubiri ntitugurwa ikuta? Ariko muri two nta na kamwe gakorokera hasi, So atabizi.

³⁰ Ariko n’umushatsi wo ku mitwe yanyu wose waraharūwe.

³¹ Nuko ntimutinye: mwebge muruta utunyoni twinshi.

³² Umuntu wese azonyaturira imbere y’abantu, nanje nzomwaturira imbere ya Data wo mw ijuru.

³³ Arik’ umuntu wese azonyihakanira imbere y’abantu, nanje nzomwihakanira imbere ya Data wo mw ijuru.

Kwikorera umusaraba

³⁴ Mwoye kwiyumvira ngo naje gutera amahoro mw isi: sinaje gutera amahoro, atar’ inkota.

³⁵ Kuko naje guteranya umwana na se, n’umukobga na nyina, n’umukazana na inabukwe.

³⁶ Kand’ abansi b’umuntu bazoba abo mu rugo rwiwe.

³⁷ Ūkunze se canke nyina akabandutisha, ntaba ankwiye: kand’ ūkunze umuhungu wiwe cank’ umukobga wiwe akabandutisha, ntaba ankwiye.

³⁸ Kand’ ūtikoreye umusaraba wiwe ngw ankurikire, ntaba ankwiye.

³⁹ Ūrokora ubugingo bgiwe azobubura; n’ūheba ubugingo bgiwe kubganje azoburonka.

⁴⁰ Ūbākiriye aba anyakiriye, kand’ ūnyakiriye aba yākiriye uwantumye.

⁴¹ Uwākīra umuntu avugishwa n’Imana kukw avugishwa na yo azohabga impēra nk’iy’ ūvugishwa n’Imana; uwākīra umuntu agororotse kukw agororotse azohabga impēra nk’iy’ umugororotsi.

⁴² Kand’ ūzoha umwe mur’ abo bato urwato rw’amazi apfutse gusa kukw ar’ umwigishwa, ndababgira ukuri yukw atazobura impēra yiwe.